ADផ្ទាំងផ្សព្វផ្សាយពាណិជ្ជកម្ម

Picture

វិបត្តិអសន្តិសុខនៅម៉ាលី៖ ក្រុមឧទ្ទាម​ប្រកាសវាយដណ្ដើមក្រុងធំៗ និងព្យាករណ៍ពីការដួល​រលំ​នៃរបបយោធា

6 ខែ មុន

ប្រទេស​ម៉ា​លី ៖ ពួក​ឧទ្ទាម​បំបែក​ខ្លួន​និយម​ទាមទារ​ឯករាជ្យ​ទូ​អា​រេស​នៃ​រណសិរ្ស​រំដោះ​ALZAWAD ប្រកាស​នា​ថ្ងៃ​ទី​២៩​ មេ​សា​ ពី​បំណង​ពួក​គេ​វាយ​ដណ្ដើម​កាន់កាប់​ទីក្រុង​ធំ​ៗ​ នា​ភាគ​ខាងជើង​ម៉ា​លី ហើយ​ព្យាករណ៍​ថា របប​យោធា​កំពុង​កាន់​អំណាច​នឹង​ដួល​រលំ​ក្រោយ​ការ​វាយលុក​ពី​ថ្ងៃ​ទី​២៥
​មេ​សា​ មក របស់​ពួក​គេ​ និង​ពួក​ជី​ហា​ដ​ជា​សម្ព័ន្ធមិត្ត​ ។

សេចក្ដីថ្លែងការណ៍​បែប​នេះ​ របស់​អ្នកនាំពាក្យ​ក្រុម​ឧទ្ទាម​នោះ​ គឹ​ជា​ការ​ឆ្លើយ​តប​ដោយ​ផ្ទាល់ ចំពោះ​សេចក្ដីថ្លែងការណ៍ ​កាលពី​យប់​ថ្ងៃ​ទី​២៨ ​មេ​សា របស់​ប្រមុខ​របប​យោធា​ម៉ា​លិ​ឧត្ដមសេនីយ៍​អាស៊ី​មី​ហ្គោ​អ៉ី​តា ដែល​បង្ហាញ​មុខជា​ថ្មី ក្រោយ​ពី​លោក​ស្ថិត​នៅ​ស្ងៀមស្ងាត់​អស់​ពេល​៣​ថ្ងៃ​មក ដោយ​លោក​អះអាង​ថា ​សភាពការណ៍​សន្តិសុខ​ក្នុង​ប្រទេស​បាន​វិល​មក​ ស្ថិត​ក្រោម​ការ​ត្រួតត្រា​វិញ​ហើយ​ ។

ប្រទេស​ម៉ា​លី​កំពុង​ជួប​ប្រទះ​សភាពការណ៍​សន្តិសុខ​ប្រកបដោយ​គ្រោះថ្នាក់ និង​កំពុង​ស្ថិត​ក្នុង​សភាព​មាន​ច្បាស់លាស់ បន្ទាប់​ពី​ការ​ប្រយុទ្ធ​គ្នា​ចាប់ផ្ដើម​ពី​ព្រឹក​ព្រលឹម​ថ្ងៃ​ទី​២៥​មេ​សា​មក​។ ប្រជា​ជន​ក្រុង​បា​ម៉ា​កូ​រដ្ឋធានី​ប្រទេស​នេះ ​ច្រើន​នាក់​និយាយ​ថា សភាព​ស្ងប់ស្ងាត់​បាន​វិល​ត្រឡប់​មក​
វិញ​។ ការ​វាយប្រហារ​ដែល​មានការ​សម្របសម្រួល​គ្នា​កើត​មាននៅ​តាម​កន្លែង​ជា​ច្រើន​របស់​ប្រទេស ដោយ​ពួក​ជី​ហា​ដ​ក្រុម​អាល់​កៃ​ដា​ និង​ពួក​ឧទ្ទាម​ទូ​អា​រេស​នៃ​រណសិរ្ស​រំដោះ​ALZAWAD ដែល​ទាមទារ​ឯករាជ្យ​ភាព​នៅ​ភាគ​ខាងជើង​ប្រទេស​ ។

តំបន់​យុទ្ធសាស្ត្រ​ជា​ច្រើន​រង​ការ​វាយប្រហារ ក្នុង​នោះ​ មាន​ទាំង​នៅ​ច្រកចូល​រដ្ឋធានី​និង​ព្រ​លាន​យន្តហោះ​ផង​។ ការ​វាយប្រហារ​កើត​មាន​ពិសេស ​នៅ​ទីក្រុង​គី​ទី ជា​មូលដ្ឋាន​សំខាន់​របស់​របប​យោធា បណ្ដាល​ឲ្យ​ស្លាប់​រដ្ឋមន្ត្រី​ការពារ​ប្រទេស​ម៉ា​លី ហើយ​ជន​ស៊ី​វិល ​និង​យោធា​យ៉ាងតិច​៣៥​នាក់​ក៏​ត្រូវ​ស្លាប់​ដែរ​។ ទីក្រុង​គី​ដាល់​ជាទី​ក្រុង​ធំ​នៅ​ភាគ​ខាងជើង​ប្រទេស​កំពុង​ស្ថិត​ក្នុង​ការ​កាន់កាប់​របស់​ពួក​ឧទ្ទាម​។

អ្នក​នាំពា​ក្យ​​ក្រុម​ឧទ្ទាម​និយាយ​ថា ពេល​នេះ​ យើង​វាយ​យក​បាន​ទីក្រុង​គី​ដាល់ ​ហើយ​ទិស​ដៅ​នា​ពេល​ខាង​មុខ​របស់​យើង​វាយ​យក​ទីក្រុង​ហ្គា​វ ក្រុង​តោម​ប៊ុ​ក​ទូ​និង​ក្រុង​មេ​ណា​កា​ទៀត​ ។ របប​យោធា​​នឹង​ដួល​រលំ​គ្នុ​ង​ពេល​ឆាប់​ឬ​យូរ ប្រឈម​មុខ​នឹង​ការ​វាយលុក​របស់​យើង​។ ចំណែក​ការ​វាយលុក​ដទៃ​ៗ​ទៀត​ធ្វើ​ឡើងដោយ​ពួក​ជី​ហា​ដ ដែល​វាយប្រហារ​លើ​រដ្ឋធានី​បា​ម៉ា​កូ​និង​ក្រុង​ដទៃ​ៗ​ទៀត​ ។ ពួក​ឧទ្ទាម​បំបែក​ខ្លួន​និយម​នោះ បាន​ប្រយុទ្ធ​ចាប់តាំងពី​ច្រើន​ឆ្នាំ​មក​ហើយ ដើម្បី​បង្កើត​រដ្ឋ​ឯករាជ្យ​មួយ​នៅ​ភាគ​ខាងជើង​ប្រទេស ចំណែក​ពួក​សកម្មប្រយុទ្ធ​នៃ​សាខា​អាល់​កៃ​ដា​និង​ក្រុម​រដ្ឋ​អ៊ិ​ស្លា​ម បាន​ប្រយុទ្ធ​ជាមួយ​កងកម្លាំង​រដ្ឋាភិបាល​ចាប់តាំងពី​ជាង​មួយ​ទស​វត្ស​មក​ហើយ​។

ពួក​យោធា​ម៉ា​លី​ទទួល​បានការ​ជួយ​ទ្រទ្រង់​របស់​កងកម្លាំង​រុ​ស្ស៊ី AFRICA CORPS ដែល​ពី​មុន​ជា​កងកម្លាំង​ទាហាន​ស៊ី​​ឈ្នួល​ក្រុម​WAGNER ​។ ឯកអគ្គរដ្ឋទូត​រុ​ស្ស៊ី​ប្រចាំ​ម៉ា​លី​លោក​អ៉ី​​ហ្គ័​រ​ហ្គ្រោ​មី​កូ​ថ្លែង​នា​ថ្ងៃ​ទី​២៩​ មេ​សា ​ថា រុ​ស្ស៊ី ​និង​កងកម្លាំង​AFRICA CORPS ​ស្ថិត​នៅ​ជាមួយ​កងទ័ព​ម៉ា​លី​ដើម្បី​ប្រយុទ្ធ​រួម​គ្នា​ប្រឆាំង​ការ​វាយលុក​របស់​ពួក​ភេរវ​ករ​អន្តរជាតិ​ ៕