រាជធានីភ្នំពេញ ៖ គណៈបញ្ជាការឯកភាពរាជធានីភ្នំពេញបានចុះត្រួតពិនិត្យទីតាំងតារាងបាល់ទះមួយកន្លែងនៅក្នុងសង្កាត់ទឹកល្អទី ៣ បន្ទាប់ពីមានការចុះផ្សាយរបស់បណ្ដាញសារព័ត៌មាននិងបណ្តាញសង្គម ថាទីតាំងនេះមានការបើកលេងល្បែងស៊ីសងខុសច្បាប់ ។
ទោះបីជាយ៉ាងណានៅក្នុងការត្រួតពិនិត្យនោះ គណៈកម្មការចម្រុះរកពុំឃើញមានការបើកល្បែងស៊ីសងនោះឡើយ ដែលគេសង្ស័យថាម្ចាស់បានបិទមុន ពេលដែលបែកធ្លាយវីដេអូនិងមានការផ្សព្វផ្សាយនៅក្នុងបណ្ដាញព័ត៌មាននិងបណ្ដាញសង្គម។
តាមអធិការដ្ឋាននគរបាលខណ្ឌទួលគោកបានឲ្យដឹងថា នៅថ្ងៃទី២៩ ខែមេសា ឆ្នាំ២០២៦ គណ:បញ្ជាការឯកភាពរាជធានីភ្នំពេញ ដឹកនាំដោយ ឯកឧត្តម ឯក ឃុនដឿន អភិបាលរង រាជធានីភ្នំពេញ បានដឹកនាំកម្លាំងចម្រុះចុះត្រួតពិនិត្យទីតាំងបើកតារាងបាល់ទះ ស្ថិតនៅដីឡូត៍លេខ០៥ ផ្លូវលេខ២៤៧ ក្រុមទី០១ ភូមិ១ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ តាមការចុះផ្សាររបស់បណ្ដាញសារព័ត៌មានថាទីតាំងនេះមានការបើកលេងល្បែងស៊ីសងខុសច្បាប់ ។
នៅក្នុងការចុះត្រួតពិនិត្យនោះកម្លាំងចម្រុះបានធ្វើការពិនិត្យទិដ្ឋភាពរួមក្នុងទីតាំងរួមមាន៖ តារាងបាល់ទះចំនួន០២ , បន្ទប់ដេកចំនួន០៣, បន្ទប់ធំ០១ , ឃ្លាំងសម្រាប់ដាក់សម្ភារ:ចំនួន០១ និងផ្ទះបាយចំនួន០១ យើងពិនិត្យជាក់ស្ដែង ពុំមានការលេងល្បែងស៊ីសងខុសច្បាប់នោះទេ ។
ក្រោយពីត្រួតពិនិត្យចប់សព្វគ្រប់កម្លាំងចម្រុះយើងបានធ្វើការណែនាំដល់លោកស្រី វ៉ាង ស្រីកា អាយុ២១ឆ្នាំ ជនជាតិខ្មែរ (ជាតំណាងម្ចាស់ទីតាំង) ដែលមានខ្លឹមសារដូចខាងក្រោម៖
១-ហាមយកទីតាំងនេះបើកកន្លែងលេងល្បែងស៊ីសងខុសច្បាប់គ្រប់ប្រភេទ ។
២-ហាមយកទីតាំងចែកចាយ,ជួញដូរ និងប្រើប្រាស់គ្រឿងញៀនខុសច្បាប់ ។
៣-បើមិនអនុវត្តតាមកិច្ចសន្យាខាងលើ រដ្ឋបាលរាជធានីភ្នំពេញ និងចុះផ្អាកអាជីកម្មជាបណ្ដោះអាសន្ន ។
គួរបញ្ជាក់ថាកាលពីម្សិលមិញថ្ងៃទី២៧ ខែមេសា ឆ្នាំ ២០២៦ មានការបែកធ្លាយពីវីដេអូលេងល្បែងស៊ីសងយ៉ាងគគ្រឹកគគ្រេង នៅក្នុងទីតាំងខាងលើ និងមានការផ្សាយជាបន្តបន្ទាប់នៅក្នុងបណ្ដាញសង្គម ។
បន្ទាប់ពីបែកធ្លាយពីសកម្មភាពល្បែងស៊ីសងគណៈបញ្ជាការ ឯកភាពរាជធានីភ្នំពេញក៏បានសហការជាមួយលោកជា ពិសីអភិបាលខណ្ឌទួលគោកបានចុះទៅត្រួតពិនិត្យនិងធ្វើកិច្ចសន្យាមិនឲ្យមានការបើកល្បែងស៊ីសងនោះឡើយ ៕
ចែករំលែកព័តមាននេះ