ទីក្រុងញូយ៉ក៖ ទាហានអាមេរិកម្នាក់ត្រូវតុលារការចោទប្រកាន់ពាក់ព័ន្ធនឹងការភ្នាល់ថាតើលោកម៉ាឌូរ៉ូត្រូវចាប់ខ្លួន ឬមិនចាប់ខ្លួន។ គាត់បានភ្នាល់ថាចាប់ខ្លួន និងឈ្នះលុយ៤០ម៉ឺនដុល្លារដោយសារគាត់ដឹងកិច្ចការសម្ងាត់របស់រដ្ឋាភិបាលអាមេរិក។ ប៉ុន្តែលាភបានប្រែក្លាយជាគ្រោះវិញហើយ។ គាត់នឹងត្រូវនាំខ្លួនឡើងតុលាការនៅក្នុងយប់នេះ។ តុលាការនឹងសួរនាំគាត់តើគាត់នឹងឆ្លើយសារភាពទទួលទោសកំហុសពីបទឆបោកដែរឬទេ។ ប្រភពដែលដឹងរឿងអាថ៌កំបាំងរបស់ទាហានអាមេរិករូបនោះប្រាប់ថាគាត់ហ៊ានភ្នាល់រហូតដល់ឈ្នះលុយរាប់សែនដុល្លារដោយសារគាត់ដឹងព័ត៌មានសម្ងាត់ផ្ទៃក្នុងអំពីផែនការរបស់រដ្ឋាភិបាលអាមេរិកត្រៀមបើកប្រតិបត្តិការសឹកចាប់ខ្លួនម៉ាឌូរ៉ូ។
ទាហានអាមេរិក លោកក្រេនណុន វ៉ាន់ដាយ (Gannon Van Dyke) អាយុ៣៨ឆ្នាំ នឹងត្រូវបង្ហាញខ្លួននៅចំពោះមុខចៅក្រមនៃតុលាការសាលាដំបូងប្រចាំសង្កាត់ម៉ាន់ហាថាន់ (Manhattan) ទីក្រុងញូយ៉ក។ កាលពីសប្ដាហ៍មុន វ៉ាន់ដាយត្រូវបានចាប់ខ្លួនពីបទភ្នាល់លុយ៣,៣ម៉ឺនដុល្លារតាមហាងឆេងទីផ្សារភ្នាល់ឈ្មោះប៉ូលីម៉ាឃីត (Polymarket) ចាប់ពីថ្ងៃទី២៧ ខែធ្នូ ឆ្នាំ២០២៥ ដល់ថ្ងៃទី២ ខែមករា ឆ្នាំ២០២៦។ ការភ្នាល់នោះពាក់ព័ន្ធនឹងករណីលោកម៉ាឌូរ៉ូនឹងត្រូវចាប់ខ្លួន ហើយយោធាអាមេរិកត្រៀមវាយលុកចូលវេណេហ្ស៊ូអេឡា។
កាលណោះ ទីផ្សារភ្នាល់ភាគច្រើនព្យាករថាករណីចាប់ខ្លួនម៉ាឌូរ៉ូមានភាគរយទាប។ ប៉ុន្តែវ៉ាន់ដាយភ្នាល់ថាម៉ាឌូរ៉ូនឹងត្រូវចាប់ខ្លួន។ ហេតុនេះធ្វើឱ្យគាត់ឈ្នះការភ្នាល់បានប្រាក់យ៉ាងច្រើនសន្ធឹកសន្ធាប់។ នេះបើយោងតាមថ្លែងរបស់រដ្ឋអាជ្ញា។ នេះជាករណីដំបូងដែលក្រសួងយុត្តិធម៌អាមេរិកដាក់ពាក្យប្ដឹងមន្ត្រីរដ្ឋាភិបាលខ្លួនឯងពាក់ព័ន្ធនឹងការភ្នាល់ដាក់លុយ។ គណៈកម្មការពាណិជ្ជកម្មអាមេរិកក៏បានដាក់ពាក្យប្ដឹងវ៉ាន់ដាយផងដែរ។
វ៉ាន់ដាយមានចំណែកនៅក្នុងប្រតិបត្តិការចាប់ខ្លួនម៉ាឌូរ៉ូកាលពីថ្ងៃទី៣ ខែមករា ឆ្នាំ២០២៦។ គាត់ជាប់ចោទ៥ករណីគឺ៖ ប្រើប្រាស់ព័ត៌មានលាក់ការណ៍សម្ងាត់ផ្ទៃក្នុងរបស់អង្គភាពដើម្បីកេងចំណេញផលប្រយោជន៍ផ្ទាល់ខ្លួន, លួចព័ត៌មានរបស់រដ្ឋាភិបាលដែលមិនត្រូវបញ្ចេញជាសាធារណៈ, ឆបោកនៅក្នុងអំពើភ្នាល់ពាណិជ្ជកម្ម, ឆបោកតាមប្រព័ន្ធអេឡិចត្រូនិច និងធ្វើប្រតិបត្តិការចរាចរសាច់ប្រាក់ខុសច្បាប់។ ប៉ូលីម៉ាឃីតថ្លែងថាខ្លួនបានដាក់ឈ្មោះវ៉ាន់ដាយនៅក្នុងបញ្ជីខ្មៅដើម្បីជូនដំណឹងទៅសមត្ថកិច្ច ហើយខ្លួនសហការយ៉ាងពេញទំហឹងនៅក្នុងដំណើរការស៊ើបអង្កេត៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ