ទីក្រុងវ៉ាស៊ីនតោន៖ លោកដូណាល់ត្រាំកំពុងពិនិត្យមើលសំណើសន្តិភាពរបស់អ៊ីរ៉ង់ដើម្បីបិទបញ្ចប់សង្គ្រាមរយៈពេល២ខែកន្លងទៅនេះ។ ប៉ុន្តែលោកមិនសប្បាយចិត្តនឹងផែនការសន្តិភាពនេះប៉ុន្មានទេ។ នេះបើយោងតាមមន្ត្រីរដ្ឋាភិបាលអាមេរិកបង្ហើបប្រាប់អ្នកសារព័ត៌មាន។ សំណើនោះទាមទារឱ្យអាមេរិកបិទបញ្ចប់ការបិទខ្ទប់ដែនសមុទ្រអ៊ីរ៉ង់។ ចំពោះបញ្ហានុយក្លេអ៊ែរ និងការចម្រាញ់សារធាតុអ៊ុយរ៉ាញ៉ូមរបស់អ៊ីរ៉ង់នោះចាំនិយាយគ្នានៅពេលចប់សង្គ្រាម និងនៅពេលបញ្ហាពាក់ព័ន្ធនឹងសិទ្ធិគ្រប់គ្រងផ្លូវធ្វើដំណើររបស់នាវាដោះស្រាយឱ្យចេញសិន។
កាលពីយប់មិញ លោកត្រាំបានជួបប្រជុំគ្នាជាមួយក្រុមទីប្រឹក្សាសន្តិសុខជាតិ និងពិភាក្សាស៊ីជម្រៅអំពីផែនការសន្តិភាពនោះ។ ប៉ុន្តែបើតាមការចុះផ្សាយរបស់សារព័ត៌មានអាមេរិក ចំណុចដែលស្នើសុំលើកពេលចរចាគ្នាអំពីបញ្ហានុយក្លេអ៊ែរទៅពេលក្រោយនោះធ្វើឱ្យលោកត្រាំមិនសប្បាយចិត្តសោះ។ ទីភ្នាក់ងារព័ត៌មានរ៉យទ័រដកស្រង់ប្រភពពីមន្ត្រីរដ្ឋាភិបាលអាមេរិក២នាក់ដែលស្នើសុំមិនបញ្ចេញឈ្មោះមកចុះផ្សាយថាលោកត្រាំចង់ដោះស្រាយបញ្ហានុយក្លេអ៊ែរមុនគេ មិនមែនយកទៅដោះស្រាយក្រោយគេនោះទេ។
ប្រសិនបើលោកត្រាំយល់ព្រមតាមសំណើនេះ, បិទបញ្ចប់ការបិទខ្ទប់ និងបណ្ដោយទៅតាមចិត្តអ៊ីរ៉ង់ចុះថាបញ្ហានុយក្លេអ៊ែរទុកនិយាយគ្នានៅពេលក្រោយ ពេលនោះវានឹងធ្វើឱ្យចុះខ្សោយឥទ្ធិពល និងការប្រកាន់ជំហររបស់អាមេរិក។ មិនយូរប៉ុន្មានបន្ទាប់ពីគេទទួលដំណឹងថាលោកត្រាំមិនពេញចិត្តនឹងសំណើនោះ អ៊ីរ៉ង់បង្ហាញផែនការចង់ចែករំលែកសមត្ថភាពការពារជាតិរបស់ខ្លួនជាមួយបណ្ដាប្រទេសនៅទ្វីបអាស៊ី។
អនុរដ្ឋមន្ត្រីការពារជាតិអ៊ីរ៉ង់ថ្លែងថាប្រទេសរបស់លោកត្រៀមខ្លួនចែករំលែកសមត្ថភាពអាវុធការពារខ្លួនរបស់ខ្លួនជាមួយរដ្ឋឯករាជ្យទាំងឡាយ ជាពិសេសរដ្ឋជាសមាជិក «អង្គការសហប្រតិបត្តិការសៀងហៃ» (SOC) នេះបើយោងតាមការផ្សាយរបស់សារព័ត៌មានរដ្ឋអ៊ីរ៉ង់។ លោកថ្លែងថាយើងត្រៀមខ្លួនចែករំលែកបទពិសោធអំពីការបរាជ័យរបស់ពួកអាមេរិកាំងនៅក្នុងសង្គ្រាមនេះជាមួយបណ្ដារដ្ឋជាសមាជិកអង្គការនេះ។ លោកថ្លែងដូច្នេះនៅក្នុងកិច្ចប្រជុំរដ្ឋមន្ត្រីការពារជាតិនៃអង្គការសហប្រតិបត្តិការសៀងហៃដែលរៀបចំនៅប្រទេសកឺកហ្គីស្ថាន (Kyrgyzstan)។
តាមពិតករណីដែលគេមើលឃើញថាអាមេរិកធ្វើអ្វីអ៊ីរ៉ង់មិនបែកនៅក្នុងសង្គ្រាមនេះមិនមែនអ៊ីរ៉ង់ចេះតែនិយាយតែម្នាក់ឯងជាលក្ខណៈអង្គុយលើចង្អេរលើកខ្លួនឯងដាក់នោះទេ។ សូម្បីតែអធិការបតីអាល្លឺម៉ង់ លោកហ្វ្រីតរីចម៊ែក (Friedrich Merz) ក៏យល់ថាអាមេរិកជាអ្នកចាញ់ដែរ។ លោកម៊ែកថាអាមេរិកត្រូវបានអ៊ីរ៉ង់ធ្វើអាម៉ាស់មុខនៅក្នុងសង្គ្រាមដែលខ្លួនជាអ្នកចាប់ផ្ដើមឡើង ហើយខ្លួនត្រូវតែរកវិធីបញ្ចប់ទៅវិញ៕ ប្រភព៖ អាល់ចាស៊ីរ៉ា និងប្រភពដទៃទៀត
ចែករំលែកព័តមាននេះ