ប្រទេសម៉ាលី ៖ បន្ទាប់ពី២ថ្ងៃនៃការប្រយុទ្ធគ្នានៅម៉ាលី ប្រជាជនក្រុងបាម៉ាកូរដ្ឋធានីប្រទេសនេះច្រើននាក់និយាយថា សភាពស្ងប់ស្ងាត់បានវិលត្រឡប់មកវិញ ។ ការប្រយុទ្ធគ្នាចាប់ផ្ដើមពីព្រឹកព្រលឹមថ្ងៃទី២៥ មេសា មក។ ការវាយប្រហារដែលមានការសម្របសម្រួលគ្នាកើតមាននៅតាមកន្លែងជាច្រើនរបស់ប្រទេស…
ប្រទេសម៉ាលី ៖ បន្ទាប់ពី២ថ្ងៃនៃការប្រយុទ្ធគ្នានៅម៉ាលី ប្រជាជនក្រុងបាម៉ាកូរដ្ឋធានីប្រទេសនេះច្រើននាក់និយាយថា សភាពស្ងប់ស្ងាត់បានវិលត្រឡប់មកវិញ ។ ការប្រយុទ្ធគ្នាចាប់ផ្ដើមពីព្រឹកព្រលឹមថ្ងៃទី២៥ មេសា មក។ ការវាយប្រហារដែលមានការសម្របសម្រួលគ្នាកើតមាននៅតាមកន្លែងជាច្រើនរបស់ប្រទេស ដោយពួកជីហាដក្រុមអាល់កៃដា និងពួកឧទ្ទាមទូអារេសនៃរណសិរ្ស
រំដោះALZAWAD ដែលទាមទារឯករាជ្យភាពនៅភាគខាងជើងប្រទេស។
តំបន់យុទ្ធសាស្ត្រជាច្រើនរងការវាយប្រហារ ក្នុងនោះ មានទាំងនៅច្រកចូលរដ្ឋធានី និងព្រលានយន្តហោះផង។ ការប្រយុទ្ធគ្នាកើតមានរហូតដល់ទីក្រុងគីទីមូលដ្ឋានរបស់រដ្ឋអំណាចយោធា។ នៅទីនោះ បណ្ដារថយន្តត្រូវភ្លើងឆេះបំផ្លាញ និងមានស្នាមគ្រាប់កាំភ្លើងតាមកន្លែងនានា ហើយបណ្ដាសង្កាត់ត្រូវឡោមព័ទ្ធ ។ ការវាយប្រហារនៅទីក្រុងនោះ បណ្ដាលឲ្យស្លាប់រដ្ឋមន្ត្រីការពារប្រទេសម៉ាលី ក្នុងការវាយលុករបស់ពួកជីហាដរួមជាមួយពួកឧទ្ទាម ។
កងទ័ពម៉ាលីអះអាង នាថ្ងៃទី២៧ មេសា ថា ដណ្ដើមត្រួតត្រាសភាពការណ៍វិញបានហើយ ក្រោយប្រតិបត្តិការបោសសម្អាតនាពេលយប់ ។ ទោះបីយ៉ាងណា អាជ្ញាធរអំពាវនាវដល់ប្រជាជនឲ្យរាយការណ៍ពេលប្រទះឃើញវត្តមានបណ្ដាជនសង្ស័យ ។ រដ្ឋាភិបាលម៉ាលីរាយការណ៍ កាលពីថ្ងៃទី២៧ មេសាថា ការវាយប្រហារហាក់ដូចជាបញ្ចប់ តែបញ្ហាជាច្រើននៅតែចោទពិសេសបញ្ហាដែលថា តើនរណាដែលត្រួតត្រាទីក្រុងគន្លឹះមួយនៅភាគខាងជើងប្រទេស គឺទីក្រុងគីដាល់ ដែលពួកឧទ្ទាមអះអាងថា ទីក្រុងនោះកំពុងស្ថិតក្នុងការកាន់កាប់របស់ខ្លួន។
ពួកឧទ្ទាមបំបែកខ្លួននិយមនោះ បានប្រយុទ្ធចាប់តាំងពីច្រើនឆ្នាំមកហើយ ដើម្បីបង្កើតរដ្ឋឯករាជ្យមួយនៅភាគខាងជើងប្រទេស ចំណែកពួកសកម្មប្រយុទ្ធនៃសាខាអាល់កៃដា និងក្រុមរដ្ឋអ៊ិស្លាម បានប្រយុទ្ធជាមួយកងកម្លាំងរដ្ឋាភិបាលចាប់តាំងពីជាងមួយទសវត្សមកហើយ។ ពួកឧទ្ទាមក្រុមកងកម្លាំងរំដោះAZAWAD ដឹកនាំដោយពួកទូអារេស្តថ្លែងថា កងទាហានរុស្ស៊ីនៅអាហ្វ្រិកនិងកងទ័ពម៉ាលីបានដកថយពីទីក្រុងនោះ ក្រោយពីចុះហត្ថលេខាលើកិច្ចព្រមព្រៀងមួយពីការចាកចេញដោយសន្តិវីធីរបស់ពួកគេ។
វត្តមានរបស់រុស្ស៊ីនៅម៉ាលីតាមរយៈកងកម្លាំងមួយមានឈ្មោះថាAFRICA CORPS ជួយកែប្រែតុល្យភាពខាងសន្តិសុខនៅម៉ាលី តែក៏នៅមិនអាចថែរក្សាស្ថេរភាពបានស្ថិតស្ថេរ ។ ក្នុងរយៈពេលខ្លី ការជួយទ្រទ្រង់របស់រុស្ស៊ីអាចឲ្យកងទ័ពម៉ាលីវាយដណ្ដើមបានវិញ ទីតាំងគន្លឹះមួយចំនួនដូចជាក្រុងគីដាល់កាលពីឆ្នាំ២០២៣តែពេលនេះទីក្រុងនោះត្រូវបាត់បង់ជាថ្មី ៕
ចែករំលែកព័តមាននេះ