ទីក្រុងវ៉ាស៊ីនតោន៖ កងការពារសម្ងាត់របស់អាមេរិកបានជម្លៀសលោកដូណាល់ត្រាំជាបន្ទាន់ចេញពីកម្មវិធីឈ្មោះ White House Correspondents’ Association (WHCA) ដែលរៀបចំនៅសណ្ឋាគារមួយកន្លែងកាលពីមុននេះបន្តិចបន្ទាប់ពីមានហេតុការណ៍បាញ់កាំភ្លើងជាច្រើនគ្រាប់នៅមិនឆ្ងាយប៉ុន្មានពីទីនោះ។ តាមរយៈវីឌីអូឃ្លីបដែលថតបានពីសណ្ឋាគារវ៉ាស៊ីនតោន ហ៊ីលតុន…
ទីក្រុងវ៉ាស៊ីនតោន៖ កងការពារសម្ងាត់របស់អាមេរិកបានជម្លៀសលោកដូណាល់ត្រាំជាបន្ទាន់ចេញពីកម្មវិធីឈ្មោះ White House Correspondents’ Association (WHCA) ដែលរៀបចំនៅសណ្ឋាគារមួយកន្លែងកាលពីមុននេះបន្តិចបន្ទាប់ពីមានហេតុការណ៍បាញ់កាំភ្លើងជាច្រើនគ្រាប់នៅមិនឆ្ងាយប៉ុន្មានពីទីនោះ។ តាមរយៈវីឌីអូឃ្លីបដែលថតបានពីសណ្ឋាគារវ៉ាស៊ីនតោន ហ៊ីលតុន (Washington Hilton hotel) (ជាទីកន្លែងរៀបចំពិធីជួបជុំរវាងលោកត្រាំ និងអ្នកសារព័ត៌មាន) គេឃើញភ្នាក់ងាររបស់កងការពារសម្ងាត់អាមេរិករត់យ៉ាងប្រសាចសំដៅទៅរកកន្លែងដែលលោកដូណាល់ត្រាំកំពុងអង្គុយ។
គេឃើញមនុស្សប្រហែល២៦០០នាក់ដែលចូលរួមនៅក្នុងកម្មវិធីនោះនាំគ្នាក្រាបក្រោមតុ។ អ្នករាយការណ៍ព័ត៌មានរបស់ស៊ីអឹនអឹន (CNN) ថ្លែងថាគាត់មើលឃើញជនប្រដាប់អាវុធម្នាក់បាញ់កាំភ្លើងយ៉ាងតិច៦គ្រាប់ចម្ងាយតែប៉ុន្មានហ្វ៊ីតប៉ុណ្ណោះ (feet)។ អ្នករាយការណ៍ព័ត៌មានរបស់ទស្សនាវដ្ដីថាម (Time) ដែលចូលរួមនៅក្នុងពិធីនោះដែរថ្លែងថាកងការពារសម្ងាត់បានរត់ស្រឆ្លងកាត់ហ្វូងមនុស្ស និងទំនងជាប្រញាប់នាំសមាជិកគណៈរដ្ឋមន្ត្រីរបស់រដ្ឋបាលលោកត្រាំទៅរកទីកន្លែងសុវត្ថិភាព។
ប៉ុន្មាននាទីក្រោយមក មនុស្សម្នាក់ឡើងទៅលើឆាក និងប្រកាសប្រាប់ក្រុមអ្នកចូលរួមថាកម្មវិធីនេះនឹងចាប់ផ្ដើមជាថ្មីនៅពេលបន្តិចទៀត។ លោកត្រាំបានបង្ហោះសារនៅលើបណ្ដាញសង្គមទ្រូសសូសល (Truth Social) មិនយូរប៉ុន្មានបន្ទាប់ពីមានហេតុការណ៍នោះ។ លោកថាអ្នកបាញ់កាំភ្លើងនោះត្រូវបានចាប់ខ្លួនបានហើយ ហើយលោកសូមថ្លែងការកោតសរសើរចំពោះមន្ត្រីអនុវត្តច្បាប់ដែលចាត់ការបញ្ហានេះបានរហ័សទាន់ចិត្ត។
លោកសរសេររៀបរាប់បន្តទៀតថានាក្បាលព្រលប់នេះនៅរដ្ឋធានីវ៉ាស៊ីនតោនឌីស៊ី កងការពារសម្ងាត់ និងមន្ត្រីអនុវត្តច្បាប់បានធ្វើកិច្ចការដ៏អស្ចារ្យរបស់ខ្លួន។ ពួកគេចាត់វិធានការឆាប់រហ័ស និងប្រកបដោយភាពក្លាហាន។ អ្នកបាញ់ប្រហារនោះត្រូវបានចាប់ខ្លួនបានហើយ ហើយលោកសូមផ្ដល់អនុសាសន៍ថាកម្មវិធីដែលបានរៀបចំត្រូវតែធ្វើឡើងជាបន្តទៀតរហូតដល់ចប់ចុងចប់ដើម។ ប៉ុន្តែកម្មវិធីនេះនឹងដឹកនាំ-ចាត់ចែងដោយមន្ត្រីអនុវត្តច្បាប់។ ពួកគេនឹងដាក់ចេញសេចក្ដីសម្រេចចិត្តនាពេលឆាប់ៗនេះ។
សូមជម្រាបថា White House Correspondents’ Association (WHCA) ជាកម្មវិធីជួបជុំពិសាអាហារពេលល្ងាចជាមហាគ្រួសារតែមួយនៅសណ្ឋាគារវ៉ាស៊ីនតោន ហ៊ីលតុន ហូថែល (Washington Hilton Hotel)។ នោះជាព្រឹត្តិការណ៍ដែលរៀបចំឡើងជារៀងរាល់ឆ្នាំសម្រាប់ជប់លៀងបុគ្គលិកសេតវិមាន និងអ្នកសារព័ត៌មាន។ នៅក្នុងកម្មវិធីនេះមានការសម្ដែងបែបកំប្លែង និងការថ្លែងសុន្ទរកថាបែបឧបមានវិធីប្រៀបធៀប ឬផ្លែផ្កាជាដើម៕ ប្រភព៖ ទស្សនាវដ្ដីថាម (Time) និងប្រភពដទៃទៀត
ចែករំលែកព័តមាននេះ