ខេត្តកំពង់ចាម ៖ អធិការរងស្រុកស្ទឹងត្រង់មួយរូប រងរបួសធ្ងន់ធ្ងរដេកដួលក្នុងថ្លុកឈាម ដោយសារតែក្រុមក្មេងទំនើង ចាក់នឹងដែកមុតស្រួច ចំផ្ទៃមុខ ចំនួន០២កន្លែង ខណៈពេលលោកអធិការរង ចុះបង្ក្រាបក្រុមក្មេងទំនើងវាយតប់គ្នា…
ខេត្តកំពង់ចាម ៖ អធិការរងស្រុកស្ទឹងត្រង់មួយរូប រងរបួសធ្ងន់ធ្ងរដេកដួលក្នុងថ្លុកឈាម ដោយសារតែក្រុមក្មេងទំនើង ចាក់នឹងដែកមុតស្រួច ចំផ្ទៃមុខ ចំនួន០២កន្លែង ខណៈពេលលោកអធិការរង ចុះបង្ក្រាបក្រុមក្មេងទំនើងវាយតប់គ្នា នៅកម្មវិធីប្រដាល់គុនខ្មែរ នៅក្នុងមូលដ្ឋាន នាយប់ថ្ងៃទី២៤ ខែមេសា ឆ្នាំ២០២៦ ។
មន្ត្រីនគរបាលដែលរងរបួស ពេលបំពេញប្រតិបត្តិការនេះមានឈ្មោះ ម៉ាប់ សុផាត អត្តលេខ ៥៨៥៣៥ មានឋានន្ដរស័ក្ដិថ្នាក់ វរសេនីយ៍ទោ ជាអធិការរង ទទួលផែនប្រឆាំងគ្រឿងញៀន នៃអធិការដ្ឋាននគរបាលស្រុកស្ទឹងត្រង់ ។
យោងតាមរបាយការណ៍របស់អធិការដ្ឋាននគរបាលស្រុកស្ទឹងត្រង់ បានឱ្យដឹងថា លោកវរសេនីយ៍ទោ ម៉ាប់ សុផាត រងរបួសធ្ងន់ធ្ងរ ក្នុងកិច្ចប្រតិបត្តិការ បង្ក្រាបករណីហិង្សាដោយចេតនា មានស្ថានទម្ងន់ទោស ។
របាយការណ៍ដដែលបន្តថា នៅយប់ថ្ងៃទី២៤ ខែមេសា ឆ្នាំ២០២៦ លោកវរសេនីយ៍ទោ ម៉ាប់ សុផាត បានដឹកនាំកម្លាំងអន្តរាគមន៍ ចុះល្បាតចល័តក្នុងភូមិសាស្ត្រឃុំព្រែកកក់។ លុះរហូតដល់វេលាម៉ោង ២៣:០៥នាទី ថ្ងៃខែឆ្នាំដដែល បានទទួលព័ត៌មានរាយការណ៍ថា មានករណីហិង្សាដោយចេតនា (ក្រុមក្មេងស្ទាវ វាយប្រតាយប្រតប់គ្នា) នៅកន្លែងកម្មវិធីប្រដាល់គុនខ្មែររបស់ទូរទស្សន៍ Town នៅចំណុចភូមិបឹងដែង១ ឃុំព្រែកកក់ ស្រុកស្ទឹងត្រង់ ខេត្តកំពង់ចាម ។
ក្រោយពីទទួលបានព័ត៌មានភ្លាម លោកវរសេនីយ៍ទោ ម៉ាប់ សុផាត បានដឹកនាំកម្លាំងអន្តរាគមន៍ចុះទៅដល់កន្លែងកើតហេតុ និងបានចាប់ឃាត់ខ្លួនក្រុមក្មេងស្ទាវភ្លាមៗ ពេលកំពុងប្រតិបត្តិការ ស្រាប់តែមានជនសង្ស័យម្នាក់ បានធ្វើសកម្មភាពយកឧបករណ៍មុតស្រួច ចាក់ត្រូវចំខ្ទង់ច្រមុះ ក្បែរភ្នែកខាងស្តាំចំនួន០២កន្លែង រងរបួសធ្ងន់ធ្ងរ បណ្តាលឱ្យដួលសន្លប់ភ្លាមៗនៅកន្លែងកើតហេតុ រីឯជនសង្ស័យខាងលើ ត្រូវបានសមត្ថកិច្ចបង្ក្រាបចាប់ឃាត់ខ្លួននៅកន្លែងកើតហេតុភ្លាមៗ និងនាំខ្លួនជនសង្ស័យមកសាកសួរនៅអធិការដ្ឋាននគរបាលស្រុកស្ទឹងត្រង់ ដើម្បីចងក្រងសំណុំរឿងតាមនីតិវិធី ។
ចំណែកឯលោកវរសេនីយ៍ទោ ម៉ាប់ សុផាត ត្រូវបានកម្លាំងនគរបាល នាំយកមក ព្យាបាលរបួសនៅមន្ទីរពេទ្យបង្អែកស្រុកស្ទឹងត្រង់ និងបញ្ចូនបន្តទៅព្យាបាលរបួសនៅមន្ទីរពេទ្យបង្អែកខេត្តកំពង់ចាម។ ប៉ុន្តែដោយស្ថានភាពរបួសធ្ងន់ធ្ងរពេក ក្រុមគ្រូពេទ្យខេត្តសម្រេចចិត្ត បញ្ជូនបន្តទៅព្យាបាលមន្ទីរពេទ្យកាល់ម៉ែត ។
បើតាមការបញ្ជាក់ពីក្រុមគ្រូពេទ្យនៅមន្ទីរពេទ្យកាល់ម៉ែត លោកវរសេនីយ៍ទោ ម៉ាប់ សុផាត (មានឈាមកកក្នុងខួរក្បាល) សន្លប់មិនទាន់ដឹងខ្លួននៅឡើយ និងកំពុងបន្តបញ្ជូនទៅព្យាបាល នៅប្រទេសវៀតណាម ៕
ចែករំលែកព័តមាននេះ