ទីក្រុងវ៉ាស៊ីនតោន៖ លោកដូណាល់ត្រាំបានបញ្ជូនកូនប្រសា និងបេសកជនពិសេស លោកស្ទីវវីតខូស ទៅប្រទេសប៉ាគីស្ថានដើម្បីបើកការចរចាសាជាថ្មីនិយាយអំពីសង្គ្រាមអ៊ីរ៉ង់ និងដំណោះស្រាយ។ អ្នកនាំពាក្យសេតវិមានបញ្ជាក់ថាលោកទាំង២ពិតជាបានធ្វើដំណើរទៅប៉ាគីស្ថានមែនតាំងពីល្ងាចថ្ងៃសុក្រ។ លោកទាំង២នឹងជួបរដ្ឋមន្ត្រីការបរទេសអ៊ីរ៉ង់នៅទីក្រុងឥស្លាមម៉ាបាត។
សេតវិមានថ្លែងថារដ្ឋាភិបាលទីក្រុងវ៉ាស៊ីនតោនសង្ឃឹមថាការសន្ទនាគ្នាលើកនេះនឹងទទួលបានលទ្ធផល ហើយនឹងបន្តដំណើរឆ្ពោះទៅរកកិច្ចព្រមព្រៀងអ្វីមួយ។ រដ្ឋមន្ត្រីការបរទេសអ៊ីរ៉ង់ លោកអារ៉ាក់ឈី បានប្រកាសកាលពីមុននេះថាលោកនឹងទៅប្រទេសប៉ាគីស្ថាន, រុស្ស៊ី និងអូម៉ង់ដើម្បីពិនិត្យមើលលទ្ធភាពនៃការបើកការចរចាគ្នាឡើងវិញដែលអាចបញ្ចប់ការវាយប្រហាររបស់អាមេរិក និងអ៊ីស្រាអែលមកលើអ៊ីរ៉ង់។ នេះជាចំណុចសំខាន់ដែលអ៊ីរ៉ង់កំពុងទាមទារ។
អនុប្រធានាធិបតីអាមេរិក លោកជេឌីវេន ដែលធ្លាប់ដឹកនាំគណៈប្រតិភូលើកទីមួយទៅទីក្រុងឥស្លាមម៉ាបាតនោះលើកនេះលោកមិនបានចូលរួមទេ។ ប៉ុន្តែលោកក៏ត្រៀមលក្ខណៈសម្បត្តិដើម្បីចេញដំណើរដែរប្រសិនមានសភាពការណ៍ប្រែប្រួល។ អ្នកនាំពាក្យសេតវិមានថ្លែងថាទាំងលោកត្រាំ លោកវេន និងលោករូប៊ីអូ (រដ្ឋមន្ត្រីការបរទេស) បន្តតាមដានស្ថានការណ៍នេះដើម្បីចង់ដឹងអំពីសភាពការណ៍វិវត្តថ្មីៗ។ លោកវេននឹងចាកចេញដំណើរទៅប៉ាគីស្ថានភ្លាមនៅក្នុងករណីចាំបាច់។
លោកមហាម៉ាត់ បាហ្គើ ហ្កាលីបាហ្វ ដែលធ្លាប់ដឹកនាំគណៈប្រតិភូទៅរួមការចរចាលើកទីមួយនោះក៏មិនបានចូលរួមការចរចាលើកនេះទេ។ លោកអារ៉ាក់ឈីទំនងជាពិភាក្សាអំពីគម្រោងគ្រប់គ្រងច្រកសមុទ្រហ័រម៉ូសជាមួយអូម៉ង់។ អ៊ីរ៉ង់ធ្លាប់ប្រកាសថាខ្លួននឹងមិនចរចាជាមួយអាមេរិកទេលុះត្រាតែអាមេរិកលុបចោលការបិទខ្ទប់ដែនសមុទ្ររបស់ខ្លួនជាមុនសិន។ ចំណែកអាមេរិកទាមទារឱ្យអ៊ីរ៉ង់កាត់រំសាយកម្មវិធីនុយក្លេអ៊ែរ និងលែងបិទខ្ទប់ច្រកហ័រម៉ូសទើបខ្លួនយល់ព្រមតាមសំណើរបស់អ៊ីរ៉ង់៕ ប្រភព៖ The Guardian និងប្រភពដទៃទៀត
ចែករំលែកព័តមាននេះ