ទីក្រុងតេអេរ៉ង់៖ អ៊ីរ៉ង់ទើបតែប្រហារជីវិតបុគ្គលិកបម្រើការផ្នែកថាមពលនុយក្លេអ៊ែរម្នាក់ឈ្មោះមេឌី ហ្វារីដ (Mehdi Farid) ពីបទធ្វើការឱ្យភ្នាក់ងារសម្ងាត់ម៉ូសាត (Mossad) របស់អ៊ីស្រាអែល។ ក្រុមសិទ្ធិមនុស្សមិនពេញចិត្តនឹងការប្រហារជីវិតនេះទេព្រោះពួកគេយល់ថាដំណើរការកាត់ក្ដីមានភាពឆកល្វែង, ចម្លើយសារភាពធ្វើឡើងដោយការបង្ខិតបង្ខំ…
ទីក្រុងតេអេរ៉ង់៖ អ៊ីរ៉ង់ទើបតែប្រហារជីវិតបុគ្គលិកបម្រើការផ្នែកថាមពលនុយក្លេអ៊ែរម្នាក់ឈ្មោះមេឌី ហ្វារីដ (Mehdi Farid) ពីបទធ្វើការឱ្យភ្នាក់ងារសម្ងាត់ម៉ូសាត (Mossad) របស់អ៊ីស្រាអែល។ ក្រុមសិទ្ធិមនុស្សមិនពេញចិត្តនឹងការប្រហារជីវិតនេះទេព្រោះពួកគេយល់ថាដំណើរការកាត់ក្ដីមានភាពឆកល្វែង, ចម្លើយសារភាពធ្វើឡើងដោយការបង្ខិតបង្ខំ ហើយសារព័ត៌មានក៏មិនមានសិទ្ធិចុះផ្សាយអំពីដំណើរការកាត់ក្ដីឱ្យបានទូលំទូលាយនោះទេ។
នេះជាផ្នែកមួយនៃការប្រហារជីវិតមនុស្សជាច្រើនករណីចាប់តាំងពីសង្គ្រាមអ៊ីរ៉ង់ផ្ទុះឡើងជាលើកដំបូងកាលពីចុងខែកុម្ភៈ។ ការប្រហារជីវិតទាំងនេះពាក់ព័ន្ធនឹងការចោទប្រកាន់ថាជនជាប់ចោទជារនុកក្នុងដែលលួចផ្ដល់ការណ៍សម្ងាត់របស់អ៊ីរ៉ង់ទៅឱ្យអ៊ីស្រាអែល។ ទីភ្នាក់ងារព័ត៌មានអ៊ីរ៉ង់ផ្សាយថាលោកមេឌី ហ្វារីដព្យាយាមបញ្ចូលមេរោគកុំព្យូទ័រទៅក្នុងប្រព័ន្ធណិតវើករបស់ស្ថាប័នដែលពាក់ព័ន្ធនឹងវិស័យការពារជាតិអ៊ីរ៉ង់។ គាត់ធ្វើដូច្នេះតាមបញ្ជារបស់ក្រុមម៉ូសាត។
យោងតាមទីភ្នាក់ងារព័ត៌មានដដែលនេះ លោកមេឌី ហ្វារីដបានជួយឱ្យអ្នកដទៃទៀតដែលមិនមែនជាបុគ្គលិករបស់ស្ថាប័នការពារជាតិអ៊ីរ៉ង់អាចចូលទៅក្នុងប្រព័ន្ធណិតវើកនោះបានតាមរយៈការភ្ជាប់នឹងយូអែសប៊ី (USB)។ លោកហ្វារីដជាអតីតបុគ្គលិកស្ថាប័នថាមពលនុយក្លេអ៊ែរ។ លោកត្រូវបានចោទប្រកាន់ថាបានផ្ដល់ឱ្យអ៊ីស្រាអែលនូវព័ត៌មានពាក់ព័ន្ធនឹងរចនាសម្ព័ន្ធគ្រប់គ្រងស្ថាប័ន, ទីតាំងអគារ, នីតិវិធីក្នុងការការពារខ្លួន និងទិន្នន័យរបស់បុគ្គលិក។ អ៊ីរ៉ង់មិនបានប្រកាសថាតើស្ថាប័ននោះឈ្មោះអ្វី ហើយឯកសារអ្វីខ្លះដែលអ៊ីស្រាអែលទទួលបាននោះទេ។
ទីភ្នាក់ងារព័ត៌មានអ៊ីរ៉ង់អះអាងថានៅក្នុងពេលកាត់ក្ដីនោះ លោកហ្វារីដបានឆ្លើយសារភាពដោយស្មោះត្រង់ថាខ្លួនបានសហការជាមួយក្រុមម៉ូសាតពិតប្រាកដមែន។ យោងតាមរបាយការណ៍របស់ក្រុមសិទ្ធិមនុស្ស លោកហ្វារីដត្រូវបានចាប់ខ្លួន និងបញ្ជូនទៅដាក់ឃុំនៅពន្ធនាគារអឺវីន (Evin) កាលពីរដូវរងាឆ្នាំ២០២២។ ពីដំបូងដៃ សំណុំរឿងរបស់គាត់ត្រូវបានកាត់ក្ដីដោយតុលាការបដិវត្ត និងផ្ដន្ទាទោសឱ្យជាប់ពន្ធនាគារដប់ឆ្នាំ។ ប៉ុន្តែរដ្ឋអាជ្ញាបានជំទាស់ ហើយប្ដឹងសាទុក្ខ។ ដូច្នេះ តុលាការក៏សម្រេចផ្ដន្ទាទោសប្រហារជីវិតតែម្ដង៕ ប្រភព៖ យួរ៉ូ ញូស៍ (Euro News) និងប្រភពដទៃទៀត
ចែករំលែកព័តមាននេះ