ទីក្រុងកៀវ៖ អ៊ុយក្រែនបានស្នើសុំឱ្យប្រទេសតួកគីធ្វើជាម្ចាស់ផ្ទះរៀបចំការជួបគ្នាកម្រិតកំពូលរវាងលោកហ្សេឡិនស្គី និងលោកពូទីន។ នេះបើយោងតាមការបង្ហើបឱ្យដឹងពីប្រមុខការទូតអ៊ុយក្រែន។ ការស្នើសុំនេះធ្វើឡើងចំពេលដែលរដ្ឋាភិបាលទីក្រុងកៀវកំពុងស្វះស្វែងរកការប្រោះឱ្យរស់ឡើងវិញនូវការចរចាសន្តិភាពដែលហាក់ដូចជាគាំងស្តូកនៅមួយកន្លែងដោយសារសភាពការណ៍សាកលលោកប្រែប្រួល, សហគមន៍អន្តរជាតិផ្ដោតសំខាន់ទៅលើបញ្ហានៅមជ្ឈិមបូព៌ាច្រើនជាង។
រដ្ឋមន្ត្រីការបរទេសអ៊ុយក្រែន លោកអានឌ្រី ស៊ីប៊ីហា (Andrii Sybiha) ថ្លែងថាយើងបានស្នើសុំឱ្យតួកគីជួយនៅក្នុងរឿងនេះ។ អ៊ុយក្រែនក៏បានត្រៀមខ្លួនជ្រើសរើសទីកន្លែងដទៃទៀតក្រៅពីបេឡារូស និងរុស្ស៊ីសម្រាប់ការជួបគ្នាជាមួយលោកពូទីន។ លោកហ្សេឡិនស្គីចង់ពន្លឿនការស្វែងរកដំណោះស្រាយដើម្បីបិទបញ្ចប់សង្គ្រាមដែលអូសបន្លាយពេលជាងបួនឆ្នាំហើយ។
បេឡារូសជាសម្ព័ន្ធមិត្តដ៏ជិតស្និទ្ធរបស់ទីក្រុងម៉ូស្គូ ហើយបានអនុញ្ញាតឱ្យរុស្ស៊ីដាក់ពង្រាយជើងទម្របាញ់នុយក្លេអ៊ែរផងដែរ។ មិនតែប៉ុណ្ណោះ បេឡារូសនេះហើយដែលជាអ្នកអនុញ្ញាតឱ្យកងទ័ពរុស្ស៊ីប្រើប្រាស់ទឹកដីរបស់ខ្លួនដើម្បីវាយលុកចូលអ៊ុយក្រែននៅថ្ងៃដែលសង្គ្រាមផ្ទុះឡើងដំបូង។ លោកស៊ីប៊ីហាមិនបានបញ្ជាក់ថាតើតួកគីឆ្លើយតបយ៉ាងណាចំពោះសំណូមពររបស់អ៊ុយក្រែននោះទេ។
លោកថ្លែងថាយើងបានជម្រាបជូនភាគីតួកគីដោយជាក់ច្បាស់តែម្ដង។ ប៉ុន្តែប្រសិនបើការជួបគ្នានោះរៀបចំនៅទីក្រុងផ្សេងក្រៅពីប្រទេសរុស្ស៊ី និងបេឡារូស យើងនឹងទៅចូលរួម។ វិមានក្រឹមឡាំងកាលពីមុននេះថ្លែងថាខ្លួនត្រៀមធ្វើជាម្ចាស់ផ្ទះទទួលជួបលោកហ្សេឡិនស្គី។ ប៉ុន្តែមេដឹកនាំអ៊ុយក្រែនប្រកាសបដិសេធ។ នៅក្នុងព្រឹត្តិការណ៍ដាច់ដោយឡែកមួយទៀត លោកស៊ីប៊ីហាថ្លែងថាលោកបានផ្ញើលិខិតឱ្យគ្នាទៅវិញទៅមកជាមួយអ្នកស្រីអនិតា អ័របាន (Anita Orban) ដែលនឹងក្លាយជារដ្ឋមន្ត្រីការបរទេសហុងគ្រីនៅអាណត្តិថ្មី៕ ប្រភព៖ អារ៉ាប់ ញូស៍ (Arab News) និងប្រភពដទៃទៀត
ចែករំលែកព័តមាននេះ