រាជធានីភ្នំពេញ ៖ ពលរដ្ឋភៀសសឹកសរុបជាង៦សែន៤ម៉ឺននាក់ មានជាង៦សែន១ម៉ឺននាក់ ឬជាង៩៤% បានវិលត្រឡប់ទៅលំនៅឋានវិញ ។ នេះបើយោងតាមក្រសួងមហាផ្ទៃ។ យោងតាមសេចក្តីប្រកាសព័ត៌មានស្តីពីស្ថានភាពពលរដ្ឋភៀសសឹក ផលប៉ះពាល់លើតំបន់ស៊ីវិលកម្ពុជា…
រាជធានីភ្នំពេញ ៖ ពលរដ្ឋភៀសសឹកសរុបជាង៦សែន៤ម៉ឺននាក់ មានជាង៦សែន១ម៉ឺននាក់ ឬជាង៩៤% បានវិលត្រឡប់ទៅលំនៅឋានវិញ ។ នេះបើយោងតាមក្រសួងមហាផ្ទៃ។
យោងតាមសេចក្តីប្រកាសព័ត៌មានស្តីពីស្ថានភាពពលរដ្ឋភៀសសឹក ផលប៉ះពាល់លើតំបន់ស៊ីវិលកម្ពុជា គិតពីថ្ងៃទី២០ ដល់ថ្ងៃទី២១ ខែមេសា ឆ្នាំ២០២៦ របស់ក្រសួងមហាផ្ទៃបានលើកឡើងថា ចាប់តាំងពីបទឈប់បាញ់រវាងកម្ពុជា និងថៃ ចូលជាធរមាន កាលពីថ្ងៃទី២៧ ខែធ្នូ ឆ្នាំ២០២៥ មក ភាគីថៃពុំទាន់អនុវត្តពេញលេញតាមសេចក្តីប្រកាសរួមនៃកិច្ចប្រជុំ ពិសេសលើកទី៣នៃគណៈកម្មាធិការព្រំដែនទូទៅ (GBC) នៅឡើយទេ ។
ក្រសួងមហាផ្ទៃបានបន្តកត់ត្រាទុក រាល់សកម្មភាពមិនស្មោះត្រង់របស់ភាគីថៃ ចំណាត់ការផ្លូវច្បាប់ និងការទូតរបស់រាជរដ្ឋាភិបាល ទន្ទឹមគ្នានឹងការបន្តយកចិត្តទុកដាក់ដោះស្រាយផលប៉ះពាល់លើប្រជាពលរដ្ឋ និងតំបន់ស៊ីវិល ដោយសារអំពើឈ្លានពាន ជាពិសេសពលរដ្ឋដែលនៅពុំទាន់អាចវិលត្រឡប់ទៅលំនៅឋានវិញបាន ។
ក្នុងស្ថានភាពនេះ ក្រសួងមហាផ្ទៃ សូមជូនបច្ចុប្បន្នភាពសភាពការណ៍គិតមកដល់ថ្ងៃទី២១ ខែមេសា ឆ្នាំ២០២៦ស្ថានភាពពលរដ្ឋភៀសសឹក មានពលរដ្ឋភៀសសឹក៩២នាក់បន្ថែមទៀត បានបន្តវិលត្រឡប់ទៅលំនៅឋានវិញ។ ដូច្នេះ ក្នុងចំណោមពលរដ្ឋភៀសសឹកសរុបជាង៦សែន៤ម៉ឺននាក់ មានជាង៦សែន១ម៉ឺននាក់ ឬជាង៩៤% បានវិលត្រឡប់ទៅលំនៅឋានវិញ។ នៅមានពលរដ្ឋចំនួន៣៤.៣៤៧នាក់ទៀត (ស្ត្រី១៧.៨១៨នាក់ និងកុមារ ១១.៤១៨នាក់) ពុំទាន់អាចវិលទៅលំនៅឋានវិញ ។
ក្រសួងមហាផ្ទៃបានឲ្យដឹងថា ការបន្តផ្អាកសេវាសាធារណៈជាមូលដ្ឋាន៖ ខេត្តឧត្តរមានជ័យ មានសាលារៀន៨ និងមន្ទីរពេទ្យ/មណ្ឌលសុខភាព៥ នៅបន្តផ្អាក។ ខេត្តបន្ទាយមានជ័យ មានសាលារៀន៥ និងមន្ទីរពេទ្យ/មណ្ឌលសុខភាព១បន្តផ្អាក។ ខេត្តព្រះវិហារ មានសាលារៀន៧ និងមន្ទីរពេទ្យ/មណ្ឌល សុខភាព២ នៅបន្តផ្អាក ។
ក្រសួងថា ការខូចខាតហេដ្ឋារចនាសម្ព័ន្ធរូបវន្តស៊ីវិល គិតចាប់ពីថ្ងៃទី៧ ខែធ្នូ ឆ្នាំ២០២៥មក ការខូចខាតទ្រព្យ សម្បត្តិសាធារណៈ និងឯកជនពុំទាន់មានរបាយការណ៍ថ្មីបន្ថែមលើករណីដែលក្រសួងបានកត់ត្រាទុកនៅឡើយទេ ។
ក្រសួងមហាផ្ទៃនៃរាជរដ្ឋាភិបាលកម្ពុជា គាំទ្រការតវ៉ាជំទាស់របស់រាជរដ្ឋាភិបាលជាថ្មីប្រឆាំងនឹងសកម្មភាពរបស់កងកម្លាំងប្រដាប់អាវុធថៃ ដែលកាលពីថ្ងៃទី១៨ ខែមេសា ឆ្នាំ២០២៦ បានពង្រឹងការកាន់កាប់ដោយខុសច្បាប់បន្ថែមទៀត រំលោភលើអធិបតេយ្យ និងបូរណភាពទឹកដីរបស់កម្ពុជា នៅទីតាំងជាច្រើន។
សកម្មភាពទាំងនោះ រួមមាន សាងសង់ប៉ុស្តិ៍យាមសង្កេតការណ៍នៅក្នុងតំបន់ប្រាសាទព្រះវិហារ សាងសង់ផ្លូវនៅជិតបង្គោលព្រំដែនលេខ២ នៅស្រុកអន្លង់វែងនិងតំបន់ដើមតាត្រាវ នៅស្រុកត្រពាំងប្រាសាទ ជីកលេណដ្ឋាននៅតំបន់ច្រកទ្វារអន្តរជាតិជប់គគីរ នៅស្រុកបន្ទាយអំពិល សាង សង់ប៉ុស្តិ៍យាមអង្កេតការណ៍និងឈូសឆាយដី នៅសង្កាត់កូនក្រៀល ក្រុងសំរោង សាងសង់ផ្លូវថ្មើរជើង ផ្លូវ និងជីកលេណដ្ឋាន នៅតំបន់ថ្មដូន ខេត្តឧត្តរមានជ័យ ព្រមទាំង ប្រើប្រាស់គ្រឿងចក្រធុនធ្ងន់ ឈូសឆាយដីបន្ថែមទៀត នៅតំបន់អូរភ្លុកដំរី ឃុំថ្មដា ខេត្តពោធិ៍សាត់។
ក្រសួងបានលើកឡើងថា សកម្មភាពជាឯកតោភាគីនេះ បានរំលោភ ទាំង ស្រុងលើអនុស្សរណៈស្តីពីការវាស់វែង និងបោះបង្គោលព្រំដែន ឆ្នាំ២០០០ សេចក្តីប្រកាសរួម នៃកិច្ចព្រមព្រៀង របស់គណៈកម្មាធិការព្រំដែនទូទៅ (GBC) កាលពីខែធ្នូ ឆ្នាំ២០២៥ សន្ធិសញ្ញាបារាំង-សៀម ឆ្នាំ១៩០៧ សន្ធិសញ្ញា មិត្តភាពនិងសហប្រតិបត្តិការនៅអាស៊ីអាគ្នេយ៍(TAC) ធម្មនុញ្ញអង្គការសហប្រជាជាតិ និងគោលការណ៍មូលដ្ឋាននៃ ច្បាប់អន្តរជាតិផ្សេងៗទៀត។
ជាថ្មីម្តងទៀត ក្រសួងមហាផ្ទៃ នៃរាជរដ្ឋាភិបាលកម្ពុជា អំពាវនាវឱ្យប្រទេសថៃបញ្ឈប់សកម្មភាពខុសច្បាប់ នានាជាឯកតោភាគីបន្តទៀត ព្រមទាំងពន្លឿនការចាត់តាំងក្រុមការងារ JBC ដើម្បីចាប់ផ្តើមបន្តការវាស់វែង និង កំណត់ខណ្ឌសីមា ឱ្យបានលឿនស្របតាមសេចក្តីប្រកាសរួម នៃកិច្ចប្រជុំពិសេស GBC ដោយផ្អែកលើ អនុសញ្ញានិង សន្ធិសញ្ញាបារាំង-សៀម ផែនទីនិងកំណត់ហេតុបោះបង្គោលព្រំដែនរបស់គណៈកម្មការបោះបង្គោលព្រំដែន ឥណ្ឌូចិន-សៀម ព្រមទាំងកិច្ចព្រមព្រៀង និងឯកសារដែលភាគីទាំងពីរបានឯកភាពគ្នា។ គឺមានតែយន្តការនេះទេ ដែលនាំឱ្យភាគីទាំងសងខាងអាចបញ្ចៀសវិនាសកម្មនៃការប្រឈមមុខដោយអាវុធដាក់គ្នា និងដើម្បីនាំត្រឡប់មកវិញ នូវជីវភាពជាប្រក្រតី និងភាពសុខក្សេមក្សាន្ត នៃប្រជាជនតាមខ្សែបន្ទាត់ព្រំដែននៃប្រទេសទាំងពីរ ក៏ដូចជាស្ថិរភាព និងវិបុលភាពក្នុងតំបន់ និងពិភពលោក។
ចែករំលែកព័តមាននេះ