សង្គ្រាមអ៉ីរ៉ង់ ៖ ប៉ុន្មានម៉ោងមុនផុតកំណត់បទឈប់បាញ់គ្នាជាមួយអ៉ីរ៉ង់ ប្រធានាធិបតីអាមេរិកលោកដូណាល់ត្រាំ នាថ្ងៃទី២១ មេសា បានសម្រេចពន្យារពេលបទឈប់បាញ់ជាមួយអ៉ីរ៉ង់ រហូតដល់មានបទបញ្ជាជាថ្មី ដើម្បីទុកពេលកាន់តែច្រើនថែមទៀតដល់អ៉ីរ៉ង់ ដើម្បីចរចា…
សង្គ្រាមអ៉ីរ៉ង់ ៖ ប៉ុន្មានម៉ោងមុនផុតកំណត់បទឈប់បាញ់គ្នាជាមួយអ៉ីរ៉ង់ ប្រធានាធិបតីអាមេរិកលោកដូណាល់ត្រាំ នាថ្ងៃទី២១ មេសា បានសម្រេចពន្យារពេលបទឈប់បាញ់ជាមួយអ៉ីរ៉ង់ រហូតដល់មានបទបញ្ជាជាថ្មី ដើម្បីទុកពេលកាន់តែច្រើនថែមទៀតដល់អ៉ីរ៉ង់ ដើម្បីចរចា តែដោយនៅរក្សាទុកការបិទខ្ទប់បណ្ដាកំពង់ផែអ៉ីរ៉ង់។
ក្រោយបទឈប់បាញ់គ្នា២សប្ដាហ៍ ដែលមានជាធរមានពីថ្ងៃទី៨ មេសា មក អ៉ីរ៉ងប្រកាសថា បទឈប់បាញ់គ្នាត្រូវបញ្ចប់នាពាក់កណ្ដាលយប់ថ្ងៃទី២១ មក២២ មេសា ម៉ោងសកល ចំណែកលោកត្រាំប្រកាសថា បទឈប់បាញ់គ្នាផុតកំណត់នាពាក់កណ្ដាលយប់ម៉ោងនៅក្រុងវ៉ាស៊ីនតោនថ្ងៃទី២២ មេសា ។ ប៉ុន្តែច្រើនម៉ោងមុនពាក់កណ្ដាលយប់ម៉ោងសកល ពុំមានឃើញឧប្បត្តិហេតុធំដុំណាមួយកើតមានក្នុងតំបន់ឡើយ ។
ដោយលើកឡើងពីការមិនចុះសម្រុងគ្នា ក្នុងក្បាលម៉ាស៊ីនរដ្ឋអំណាចអ៉ីរ៉ង់ លោកត្រាំប្រកាសនាពេលមុននេះ តាមបណ្ដាញសង្គមTRUTH SOCIALរបស់លោកថា លោកនឹងពន្យារពេលបទឈប់បាញ់គ្នា តាមសំណើរបស់អាជ្ញាកណ្ដាលប៉ាគីស្ថានរហូតដល់អ៉ីរ៉ង់ដាក់សំណើមួយសំដៅបញ្ចប់ជម្លោះ ។ បែបនេះជាការខុសស្រឡះពីការវាយតម្លៃរបស់លោកដែលថា មានលទ្ធភាពតិចតូចបំផុតក្នុងការពន្យារពេលបទឈប់បាញ់គ្នា ។ ដោយរង់ចាំសំណើរបស់អ៉ីរ៉ង់កំពង់ផែប្រទេសនេះនឹងនៅបន្តការបិទខ្ទប់ ។
នាយករដ្ឋមន្ត្រីប៉ាគីស្ថានលោកស៊ីហ៍បាស់សារីហ្វដែលប្រទេសលោកជាអាជ្ញាកណ្ដាល បានសម្ដែងការសាទរចំពោះការពន្យារពេលបទឈប់បាញ់គ្នានេះ ។ តាមបណ្ដាញសង្គមX លោកសរសេរថា ខ្ញុំសង្ឃឹមដោយច្បាស់ថា ភាគីទាំង២នឹងបន្តគោរពបទឈប់បាញ់គ្នា ហើយនឹងឈានទៅសម្រេចបានការចុះហត្ថលេខាលើកិច្ចព្រមព្រៀងសន្តិភាពមួយ ក្នុងឱកាសនៃការចរចាលើកទី២ ដែលគ្រោងធ្វើនៅក្រុងអ៉ីស្លាម៉ាបាដ ដើម្បីបញ្ចប់ជម្លោះជាស្ថាពរ។ អគ្គលេខាធិការអ.ស.ប លោកអានតូនីញ៉ូហ្គូទ័ររេស តាមសេចក្ដីប្រកាសមួយរបស់អ្នកនាំពាក្យលោក បានសម្ដែងការអបអរសាទរពីការប្រកាសនោះ ហើយលើកឡើងពីការបោះជំហានទៅមុខដ៏សំខាន់ឆ្ពោះទៅរកការបញ្ចប់ជម្លោះ។
ការចរចាវគ្គថ្មីដែលពីដំបូងប្រកាសថាត្រូវធ្វើនាដើមសប្ដាហ៍នេះនៅក្រុងអ៉ីស្លាម៉ាបាដ ត្រូវលើកពេលមិនមានកាលកំណត់មួយ។ មុនការប្រកាសរបស់លោកត្រាំពន្យារពេលបទឈប់បាញ់គ្នា ក្រុងតេហេរ៉ង់បានគំរាមវាយប្រហារឡើងវិញបណ្ដាប្រទេសក្នុងតំបន់ឈូងសមុទ្រពែរ្ស៍ ដែលនឹងធ្វើឲ្យប៉ះពាល់ដល់ការផ្គត់ផ្គង់ប្រេងពិភពលោក។ កងឆ្មាំបដិវត្តន៍អ៉ីរ៉ង់បានគំរាមថា បណ្ដាប្រទេសជិតខាងរបស់យើងត្រូវដឹងថា ប្រសិនបើដែនដីនិងបណ្ដាទីតាំងពួកគេ ផ្ដល់ឲ្យពួកសត្រូវប្រើវាយប្រហារប្រជាជាតិអ៉ីរ៉ង់ នោះពួកគេនឹងមិនអាចធ្វើផលិតកម្មប្រេងបានទៀតឡើយនៅមជ្ឈឹមបូព៌ា។
មុនការប្រកាសពីការពន្យារពេលបទឈប់បាញ់គ្នាលោកត្រាំបានស្នើដល់អ៉ីរ៉ង់ឲ្យដោះលែងនារីច្រើននាក់ដែលរងការកំរាមប្រហារជីវិត។ លោកយល់ថាបែបនេះជានឹងជាឆន្ទៈដ៏ល្អបំផុតសម្រាប់ចាប់ផ្ដើមការចរចា។ នៅក្រុងតេហេរ៉ង់ព្រលានយន្តហោះសំខាន់ៗបានបើកទ្វារឡើងវិញកាលពីថ្ងៃទី២០មេសា ហើយជីវភាពរស់នៅក៏ដំណើរការវិញដែរនៅក្រុងតេហេរ៉ង់ ៕
ចែករំលែកព័តមាននេះ