ម្ចាស់ជើងឯករត់ប្រណាំងទ្វីបអឺរ៉ុបពីរជំនាន់ ម៉ូ ហ្វារ៉ា កាលពីថ្ងៃអាទិត្យបានយកឈ្នះជើងឯករត់ចម្ងាយ៥០០០ម៉ែត្រក្នុងកម្មវិធី Aviva UK Trials and Championshipsនៅពហុកីឡដ្ឋានBirmingham Alexander Stadiumស្ថិតក្នុងទីក្រុងBirminghamប្រទេសអង់គ្លេសថ្ងៃទី៣១ កក្កដា កន្លងមកនេះ។ ម៉ូ ហ្វារ៉ាបានចូលដល់ទីព្រ័ត្រមុនគេក្នុងថិរវេលា១៤នាទីនិង០.៧២វិនាទី យកឈ្នះអត្តពលិកអ៊ែនឌី វើណុនដែលប្រើអស់ថិរវេលា១៤នាទីនិង០១.៧២វិនាទី។
សម្រាប់ម៉ូ ហ្វារ៉ា នេះគឺជាពានជើងឯកលើកទី៩បន្តបន្ទាប់គ្នាក្នុងរដូវកាលឆ្នាំនេះ។ ហ្វារ៉ាដែលបច្ចុប្បន្នទៅរស់នៅអាមេរិកដើម្បីបន្តការហ្វឹកហាត់នោះបាននិយាយដោយក្តីរីករាយថា៖«ខ្ញុំបានធ្វើឱ្យមានការផ្លាស់ប្តូរច្រើនក្នុងជីវិត។ ក្នុងនាមជាអត្តពលិកម្នាក់ យើងត្រូវតែហ៊ានបូជាគ្រប់យ៉ាង។ អ្វីៗទាំងអស់សម្រាប់ខ្ញុំក្នុងពេលនេះកំពុងតែដំណើរការទៅបានយ៉ាងល្អ។ មានមនុស្សជាច្រើនដែលបានផ្តល់ការគាំទ្រដល់រូបខ្ញុំ។ នេះជារឿងល្អប្រសើរបំផុត»។
ការប្រកួតផ្តាច់ព្រ័ត្រដែលនឹងមកដល់នៅថ្ងៃខាងមុខ សម្រាប់ម៉ូ ហ្វារ៉ា គឺនៅក្នុងកម្មវិធី World Championshipsក្រុងឌែហ្គូ ប្រទេសកូរ៉េខាងត្បូង។ នៅទីនោះហ្វារ៉ានឹងរត់ក្នុងចម្ងាយ៣.០០០ម៉ែត្រ។ អត្តពលិកដែលមានដើមកំណើតនៅប្រទេសសូម៉ាលីរូបនេះបានសម្រេចចិត្តថា ខ្លួនចង់រត់ឱ្យបាន១០.០០០ម៉ែត្រនៅក្រុងឌែហ្គូ។ ចំណែកនាងចេសស៊ីកា អឹននីសដែលជាម្ចាស់ជើងឯកកីឡា៧វិញ្ញាសាពិភពលោក បង្កើតបានឯតទគ្គកម្មដ៏ល្អមួយប្រចាំរដូវកាលលើវិញ្ញាណលោតចម្ងាយ។ នាងលោតបានប្រវែង៦,៤៤ម៉ែត្រ បន្ទាប់មកលើវិញ្ញាសាចោលលំពែងនាងចោលបាន៤២,៩៣ម៉ែត្រ។
នាងបានថ្លែងថា៖«លទ្ធផលនេះមិនជាល្អប៉ុន្មានទេ ប៉ុន្តែវាក៏មិនអាក្រក់ណាស់ណាដែរ។ ខ្ញុំសប្បាយចិត្តដែលលោតបានឆ្ងាយ ប៉ុន្តែលើការចោលលំពែងវាធ្វើឲ្យខ្ញុំអស់សង្ឃឹមបន្តិចដែរ។ តែយ៉ាងណាសរុបមក លទ្ធផលប្រកួតចុងសប្តាហ៍នេះគឺល្អច្រើនជាងអាក្រក់ »។ អត្តពលិកLarry Achikeដែលជាម្ចាស់មេដាយមាសកីឡាCommonwealth Gamesឆ្នាំ១៩៩៨ បានយកឈ្នះជើងឯកផ្នែកលោតចម្ងាយ៣តង់បន្ទាប់ពីអវត្តមានអត្តពលិកអ៊ីដូវូ។ Achikeលោតបានចម្ងាយ១៦,៨៣ម៉ែត្រគឺជាលទ្ធផលដ៏ល្អជាងគេក្នុងរដូវកាលនេះ៕
ចែករំលែកព័តមាននេះ