ចំណេះដឹង៖ យោងតាមការចុះផ្សាយពីប្រភពបរទេស ខ្ទឹមសមិនត្រឹមតែជាគ្រឿងទេសបង្កើនរសជាតិអាហារប៉ុណ្ណោះទេ ប៉ុន្តែវាជា «កំពូលអាហារ» ដែលមានសារធាតុ Allicin ជួយពង្រឹងប្រព័ន្ធភាពស៊ាំ បញ្ចុះសម្ពាធឈាម និងកាត់បន្ថយកូឡេស្តេរ៉ូល។

ដើម្បីជៀសវាងការចំណាយពេលបកសំបក និងចិញ្ច្រាំរាល់ពេលធ្វើម្ហូប អ្នកអាចអនុវត្តតិចនិក «ខ្ទឹមសកក» ដែលអាចរក្សាគុណភាពបានយូរ និងស្រស់ជាងខ្ទឹមចិញ្ច្រាំស្រាប់តាមទីផ្សារ៖

បន្ទាប់ពីបកសំបករួច ចូរយកខ្ទឹមសទៅកិន ឬចិញ្ច្រាំឱ្យម៉ដ្ឋតាមតម្រូវការ រួចដាក់ចូលក្នុងថង់រូត។ ប្រើឈើកិនម្សៅ ឬវត្ថុរឹងសំប៉ែតមកសង្កត់ពង្រាបខ្ទឹមសក្នុងថង់ឱ្យស្មើល្អ បន្ទាប់មកប្រើខ្នងកាំបិតសង្កត់ពីលើថង់ឱ្យចេញជាឆ្នូតៗរាងការ៉េតូចៗ (ដូចគ្រាប់សូកូឡា)។ បន្ទាប់មក ដាក់ថង់នោះក្នុងកន្លែងបង្កកនៃទូទឹកកកឱ្យកកជិត។

នៅពេលចង់យកមកប្រើប្រាស់ អ្នកគ្រាន់តែបំបែកយកខ្ទឹមសតាមរាងការ៉េដែលបានធ្វើឆ្នូតទុកជាការស្រេច ដោយខ្ទឹមសមួយដុំតូចមានបរិមាណស្មើនឹងខ្ទឹមសប្រហែល ៣-៤ កំពឹស ឬ ១ ស្លាបព្រាបាយ។ វិធីសាស្ត្រនេះមិនត្រឹមតែជួយឱ្យការធ្វើម្ហូបរហ័សទាន់ចិត្តប៉ុណ្ណោះទេ ប៉ុន្តែថែមទាំងរក្សាក្លិន និងរសជាតិបានល្អឥតខ្ចោះដោយមិនបាច់ប្រើសារធាតុរក្សាទុកយូរឡើយ៕