ខេត្តព្រៃវែង ៖ ផ្ទះសម្បែងប្រជាពលរដ្ឋចំនួន ៥៩ខ្នង រួមទាំងបង្គោលភ្លើងអគ្គិសនីជាច្រើនដើម ត្រូវបានបំផ្លាញដោយសារតែកម្លាំងខ្យល់កន្ត្រាក់ ដែលបោកបក់មកលាយឡំជាមួយនឹងភ្លៀងមួយមេដ៏ធំ កាលពីវេលាម៉ោង៦និង៣០នាទីល្ងាច ថ្ងៃទី១៩ ខែមេសា…
ខេត្តព្រៃវែង ៖ ផ្ទះសម្បែងប្រជាពលរដ្ឋចំនួន ៥៩ខ្នង រួមទាំងបង្គោលភ្លើងអគ្គិសនីជាច្រើនដើម ត្រូវបានបំផ្លាញដោយសារតែកម្លាំងខ្យល់កន្ត្រាក់ ដែលបោកបក់មកលាយឡំជាមួយនឹងភ្លៀងមួយមេដ៏ធំ កាលពីវេលាម៉ោង៦និង៣០នាទីល្ងាច ថ្ងៃទី១៩ ខែមេសា នៅក្នុងស្រុកចំនួន៤ នៃខេត្តព្រៃវែង ។
យោងតាមរបាយការណ៍របស់កាកបាទក្រហមកម្ពុជាខេត្តព្រៃវែង បានដឹងដឹងថា នៅល្ងាចថ្ងៃទី១៩ មេសា ខ្យល់កន្ត្រាក់ ដែលបោកបក់មកជាមួយនឹងភ្លៀងមួយមេដ៏ធំ បានគ្របដណ្ដប់ទៅលើស្រុកចំនួន៤ ក្នុងខេត្តព្រៃវែង គឺស្រុកពារាំង បាភ្នំ ពាមរក៍ និងស្រុកស៊ីធរកណ្ដាល ។
ខ្យល់កន្ត្រាក់នេះ បានបង្ករផលប៉ះពាល់ដល់ផ្ទះប្រជាពលរដ្ឋសរុបចំនួន ៥៩ខ្នង ក្នុងនោះរងការខូចខាតទាំងស្រុងចំនួន ១២ខ្នង ខូចខាតមធ្យមចំនួន ១៧ខ្នង និងខូចខាតស្រាលចំនួន ៣០ខ្នង។ ជាមួយគ្នានោះបង្គោលភ្លើងអគ្គិសនី និងបង្គោលភ្លើងសូឡា ដែលដាំនៅតាមបណ្ដោយផ្លូវជាតិ ក៏បានដួលរលំបាក់អស់ជាច្រើនដើមផងដែរ ។
ទោះជាយ៉ាងណាក៏ដោយ គ្រោះមហន្តរាយធម្មជាតិមួយនេះ មិនបានបណ្ដាលឲ្យមានមនុស្ស ឬសត្វ ស្លាប់ឬរបួសឡើយ។ ដោយគ្រាន់តែបំផ្លាញទ្រព្យសម្បត្តិរបស់ប្រជាពលរដ្ឋប៉ុណ្ណោះ ។
មន្ត្រីកាកបាទក្រហមខេត្តព្រៃវែង បានឲ្យដឹងថា ក្រោយពីទទួលបានព័ត៌មានពាក់ព័ន្ធលើការបំផ្លាញដោយសារខ្យល់កន្ត្រាក់នេះ នៅព្រឹកថ្ងៃទី២០ មេសា មន្ត្រីកាកបាទក្រហមតាមបណ្ដាស្រុក ដែលរងផលប៉ះពាល់ បានចុះទៅស្រង់ស្ថិតិដល់គោលដៅ និងកំពុងរៀបចំជំនួយសង្គ្រោះបន្ទាន់ ដើម្បីយកទៅចែកជូនដល់ប្រជាពលរដ្ឋ ដែលជាគ្រួសាររងគ្រោះដោយសារខ្យល់កន្ត្រាក់នេះផងដែរ ៕
ចែករំលែកព័តមាននេះ