រាជធានីភ្នំពេញ, ថ្ងៃទី ២០ ខែមេសា ឆ្នាំ ២០២៦ ៖ បន្ទាប់ពីទទួលបានជោគជ័យយ៉ាងត្រចះត្រចង់កាលពីឆ្នាំមុន ស្ថានទូតនៃសាធារណរដ្ឋឥណ្ឌូនេស៊ី នឹងរៀបចំកម្មវិធី…
រាជធានីភ្នំពេញ, ថ្ងៃទី ២០ ខែមេសា ឆ្នាំ ២០២៦ ៖ បន្ទាប់ពីទទួលបានជោគជ័យយ៉ាងត្រចះត្រចង់កាលពីឆ្នាំមុន ស្ថានទូតនៃសាធារណរដ្ឋឥណ្ឌូនេស៊ី នឹងរៀបចំកម្មវិធី «ផ្សាររាត្រីឥណ្ឌូនេស៊ី» (Phsaar Reatrei Indonesia / Pasar Malam Indonesia) សារជាថ្មីម្តងទៀត នៅវិថីដើរថ្មើរជើងចតុមុខ (Chaktomuk Walk Street) ក្នុងរាជធានីភ្នំពេញ នាថ្ងៃទី ២៥-២៦ ខែមេសា ឆ្នាំ ២០២៦ ខាងមុខនេះ ។
ផ្សាររាត្រីឥណ្ឌូនេស៊ី គឺជាកម្មវិធីដ៏សំខាន់មួយរបស់ស្ថានទូត ក្នុងគោលបំណងជំរុញសេដ្ឋកិច្ច និងវប្បធម៌ឱ្យមានភាពស៊ីសង្វាក់គ្នា ។ ការរៀបចំនៅវិថីដើរថ្មើរជើងចតុមុខ ដែលជាមជ្ឈមណ្ឌលវប្បធម៌ និងទេសចរណ៍ដ៏លេចធ្លោមួយក្នុងទីក្រុងភ្នំពេញ នឹងធ្វើឱ្យកម្មវិធីនេះក្លាយជាទីកន្លែងសម្រាប់មនុស្សមកពីគ្រប់មជ្ឈដ្ឋាន អាចមកជួបជុំគ្នាដើម្បីរីករាយជាមួយបរិយាកាសបុណ្យទាន និងវប្បធម៌ដ៏សម្បូរបែបនាចុងសប្តាហ៍ ។
ចំណែកភ្ញៀវដែលចូលទស្សនានឹងមានឱកាស ភ្លក្សរសជាតិម្ហូបអាហារឥណ្ឌូនេស៊ីដើមពិតៗ ។ ទស្សនា និងជ្រើសរើសសម្លៀកបំពាក់បាទីក (Batik) ។ ទិញទំនិញប្រើប្រាស់ផ្សេងៗរបស់ឥណ្ឌូនេស៊ី ។ ទស្សនាការសម្តែងតន្ត្រី និងរបាំប្រពៃណីដ៏រស់រវើកក្នុងរាត្រីវប្បធម៌។
ជាផ្នែកមួយនៃកម្មវិធីផ្សាររាត្រីឆ្នាំនេះ ភោជនីយដ្ឋានឥណ្ឌូនេស៊ីចំនួនពីរនៅក្នុងប្រទេសកម្ពុជា ក៏នឹងត្រូវទទួលបានវិញ្ញាបនបត្រ «Duta Rasa Nusantara» ផងដែរ។ នេះគឺជាការបង្ហាញពីការដឹងគុណចំពោះការខិតខំប្រឹងប្រែងរបស់ពួកគេ ក្នុងការផ្សព្វផ្សាយប្រវត្តិសាស្ត្រម្ហូបអាហារដ៏សម្បូរបែបរបស់ឥណ្ឌូនេស៊ី តាមរយៈការបម្រើអាហារដែលមានរសជាតិដើម ។
កម្មវិធីផ្សាររាត្រីឥណ្ឌូនេស៊ី ក៏នឹងមានការចូលរួមសម្តែងពីសំណាក់តារាចម្រៀង «Dangdut» ឥណ្ឌូនេស៊ី កញ្ញា Fire Amanda, DJ Osvaldo Nugroho, តារាចម្រៀងចាស (Jazz) ឥណ្ឌូនេស៊ីដែលរស់នៅកម្ពុជា អ្នកស្រី Intan Andriana និងវង់តន្ត្រីក្នុងស្រុក Crazy Mix Band ។
ស្ថានទូតឥណ្ឌូនេស៊ីប្រចាំទីក្រុងភ្នំពេញ សង្ឃឹមថាផ្សាររាត្រីឥណ្ឌូនេស៊ី នឹងក្លាយជានិមិត្តរូបនៃចំណងកិច្ចសហប្រតិបត្តិការដ៏រឹងមាំរវាងឥណ្ឌូនេស៊ី និងកម្ពុជា ។ បន្ថែមពីនេះ ការរៀបចំព្រឹត្តិការណ៍នេះ មានបំណងបង្ហាញពីភាពធន់ និងការរួមសហការគ្នារបស់ប្រជាជននៃប្រទេសទាំងពីរ ក្នុងការប្រឈមមុខនឹងបញ្ហាសកលនាពេលបច្ចុប្បន្ន ។
ក្នុងត្រីមាសទី ១ នៃឆ្នាំ ២០២៦ ឥណ្ឌូនេស៊ីបានកត់ត្រានូវការកើនឡើងនៃការនាំចេញមកកាន់កម្ពុជាចំនួន ៦.៦% ធៀបនឹងឆ្នាំមុន ដែលមានតម្លៃស្មើនឹង ២៧៤.៩ លានដុល្លារអាមេរិក ដែលធ្វើឱ្យឥណ្ឌូនេស៊ីក្លាយជាដៃគូពាណិជ្ជកម្មធំជាងគេលំដាប់ទី ៩ របស់កម្ពុជា ។ ផលិតផលដែលឥណ្ឌូនេស៊ីនាំចេញមកកម្ពុជាច្រើនជាងគេរួមមាន ៖ ធ្យូងថ្ម, បារី, មី/ប៉ាស្តា, ម៉ូតូ និងឱសថផ្សេងៗ ។
ចំពោះវិស័យទេសចរណ៍ ក្នុងឆ្នាំកន្លងទៅមានភ្ញៀវទេសចរឥណ្ឌូនេស៊ីជាង ៥០,០០០ នាក់ បានមកកម្សាន្តនៅកម្ពុជា ។ ផ្ទុយទៅវិញ មានភ្ញៀវទេសចរកម្ពុជាជិត ១១,០០០ នាក់ បានទៅទស្សនាប្រទេសឥណ្ឌូនេស៊ីក្នុងឆ្នាំដដែលនោះដែរ ៕
ចែករំលែកព័តមាននេះ