រាជធានីភ្នំពេញ ៖ ដើម្បីជួយពាណិជ្ជករកម្ពុជាជម្នះឱ្យបាននូវបញ្ហាប្រឈម នានា ដែលរារាំងពួកគេពីការទទួលបាននូវអត្ថប្រយោជន៍ពេញលេញពី កិច្ចព្រមព្រៀងអនុគ្រោះពាណិជ្ជកម្មរវាងសហភាពអឺរ៉ុប និងកម្ពុជា កាលពីថ្ងៃទី១ សីហា ឆ្នាំ២០១១ នៅសណ្ឋាគារកាំបូឌីយ៉ាណា ប្រតិភូសហភាពអឺរ៉ុប
រាជធានីភ្នំពេញ ៖ ដើម្បីជួយពាណិជ្ជករកម្ពុជាជម្នះឱ្យបាននូវបញ្ហាប្រឈមនានា ដែលរារាំងពួកគេពីការទទួលបាននូវអត្ថប្រយោជន៍ពេញលេញពីកិច្ចព្រមព្រៀងអនុគ្រោះពាណិជ្ជកម្មរវាងសហភាពអឺរ៉ុប និងកម្ពុជា កាលពីថ្ងៃទី១ សីហា ឆ្នាំ២០១១ នៅសណ្ឋាគារកាំបូឌីយ៉ាណា ប្រតិភូសហភាពអឺរ៉ុបប្រចាំកម្ពុជាបានរៀបចំសិក្ខាសាលារយៈពេលមួយថ្ងៃ ដោយមានការចូលរួមពីលោករ៉ាហ្វាអែល ដូឆាវ ម៉ូរេណូ ភារធារីនៃប្រតិភូសហភាពអឺរ៉ុបប្រចាំកម្ពុជា លោកម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម រួមទាំងផលិតករ និងអ្នកនាំចេញកម្ពុជាប្រហែល១០០នាក់មកពីវិស័យផ្សេងៗដូចជា វិស័យកាត់ដេរ ស្បែកជើង កសិ-ឧស្សាហកម្ម សិប្បកម្មជាដើម ។
លោករ៉ាហ្វាអែល ដូឆាវ ម៉ូរេណូ មានប្រសាសន៍ថា សហភាពអឺរ៉ុបគឺជាអ្នកជំរុញចម្បងមួយនៃការបើកចំហពាណិជ្ជកម្មដែលជាកត្តាយ៉ាងសំខាន់មួយសម្រាប់កំណើនសេដ្ឋកិច្ច និងការបង្កើតការងារជាពិសេសនៅក្នុងប្រទេសកំពុងអភិវឌ្ឍន៍ ។ ដូច្នេះ កម្ពុជាគឺជាប្រទេសដែលទទួលបានអត្ថប្រយោជន៍ពីការនាំចូលទីផ្សារដោយគ្មានពន្ធនាំចូល និងគ្មានកូតាទាំងស្រុងចាប់តាំងពីខែមីនា ឆ្នាំ២០១១ ។ ដើម្បីជំរុញការនាំចេញរបស់ប្រទេសដែលមានការអភិវឌ្ឍតិចបំផុតបន្ថែមទៀតមកកាន់សហភាពអឺរ៉ុប និងរួមចំណែកដល់កំណើនសេដ្ឋកិច្ចរបស់ប្រទេសទាំងនេះ នៅថ្ងៃទី១ មករា ឆ្នាំ២០១១ សហភាពអឺរ៉ុបបានដាក់ឱ្យអនុវត្តច្បាប់ប្រភពដើមដែលងាយស្រួល និងសាមញ្ញជាងមុនក្រោមគម្រោងអនុគ្រោះរបស់ខ្លួន ។ ជាលទ្ធផល គ្រាន់តែបន្ទាប់ពីរយៈពេល៦ខែ ចាប់តាំងពីការដាក់ឱ្យអនុវត្តច្បាប់ថ្មីនេះ យើងអាចឃើញរួចទៅហើយថា ការនាំចេញរបស់កម្ពុជាទៅកាន់សហភាពអឺរ៉ុបបានកើនឡើងទ្វេដង បើប្រៀបធៀបទៅនឹងរយៈពេល៦ខែដំបូងនៃឆ្នាំ២០១០ ។
លោករ៉ាហ្វាអែល ដូឆាវ ម៉ូរេណូ បានបន្ថែមថា តាមរយៈសិក្ខាសាលានៅថ្ងៃនេះ យើងសង្ឃឹមថា វានឹងបានរួមចំណែកបន្ថែមទៀតដល់ទំនោរដ៏គួរឱ្យកត់សម្គាល់នេះ តាមរយៈការជួួយដល់ពាណិជ្ជករកម្ពុជាទាញយកគុណប្រយោជន៍ឱ្យបានច្រើនបំផុតពីវិធានថ្មីទាំងនេះ ។ លោកបញ្ជាក់ថា លោកចង់ឃើញផលិតផលនាំចេញរបស់កម្ពុជាទៅកាន់សហភាពអឺរ៉ុបមានពិពិធកម្ម ក៏ដូចជាកិច្ចខិតខំបន្ថែមទៀតរបស់រាជរដ្ឋាភិបាលកម្ពុជាឆ្ពោះទៅរកកិច្ចសម្រួលពាណិជ្ជកម្ម ។
លោកម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម មានប្រសាសន៍ថា ចាប់ពីឆ្នាំ២០០១ មក EBA ដែលផ្តល់ដោយសហភាពអឺរ៉ុប (អ្វីៗទាំងអស់លើកលែងតែអាវុធ) គឺបានរួមចំណែកដល់ការអភិវឌ្ឍសេដ្ឋកិច្ចកម្ពុជាបានច្រើនគួរឱ្យកត់សម្គាល់ ហើយកាត់បន្ថយភាពក្រីក្រនៅ កម្ពុជា ។ លោកបញ្ជាក់ថា ពេលដែលចាប់ផ្តើម EBA ដំបូងយើងមានរោងចក្រតែចំនួន១៨០ប៉ុណ្ណោះ តែមកដល់បច្ចុប្បន្ននេះ គឺរោងចក្របានកើនរហូតដល់២៦០ដោយសារតែកម្លាំងជំរុញរបស់ EBA ដែលផ្តល់ដោយសហភាពអឺរ៉ុប ។ ដូច្នេះលោកសូមថ្លែងនូវអំណរគុណដល់សហភាពអឺរ៉ុប ដែលយកចិត្តទុកដាក់អនុគ្រោះដល់ការនាំចូលផលិតផលពីកម្ពុជាទៅសហភាពអឺរ៉ុបតាមរយៈគម្រោងនៃ EBA ដែលផ្តល់នូវការងារដ៏ច្រើនសម្រាប់ពលករកម្ពុជារួមចំណែកដល់ការអនុវត្តគោលនយោបាយកាត់បន្ថយភាពក្រីក្រនៅកម្ពុជា ។
គួរបញ្ជាក់ថា សហភាពអឺរ៉ុបគឺជាគោលដៅពាណិជ្ជកម្មទី២របស់កម្ពុជា ដោយទិញ២៧% នៃផលិតផលនាំចូលសរុប ហើយនៅេពលបច្ចុប្បន្ននេះ គឺផលិតផលសម្លៀកបំពាក់ និង ស្បែកជើង ។ ជិត៧៥% នៃទំនិញនាំចេញទាំងនេះចូលទីផ្សារអឺរ៉ុបដោយមិនបង់ពន្ធនោះទេ ដោយសារតែផលិតផលកម្ពុជាអាចចូលទីផ្សារអឺរ៉ុបបានដោយគ្មានការបង់ពន្ធនាំចូលក្រោមគម្រោងចូលទីផ្សារអនុគ្រោះ EBA លើកលែងតែអាវុធ ៕
ចែករំលែកព័តមាននេះ