ខេត្តពោធិ៍សាត់ ៖ មនុស្សម្នារាប់ម៉ឺននាក់មកពីគ្រប់ទិសទី បានមកឆ្លងបុណ្យចូលឆ្នាំថ្មីប្រពៃណីជាតិខ្មែរ យ៉ាងភ្លូកទឹកភ្លូកដី នៅវត្តបាកានខេត្តពោធិ៍សាត់ ជាវត្តមួយ ដែលប្រជាពលរដ្ឋស្ទើរតែទូទាំងប្រទេស មានជំនឿជឿជាក់លើព្រះអង្គបែព្រះភ័ក្រទៅទិសខាងលិច និងដើមពោធិ៍មួយដើមរសាត់បញ្ច្រាសទឹក…
ខេត្តពោធិ៍សាត់ ៖ មនុស្សម្នារាប់ម៉ឺននាក់មកពីគ្រប់ទិសទី បានមកឆ្លងបុណ្យចូលឆ្នាំថ្មីប្រពៃណីជាតិខ្មែរ យ៉ាងភ្លូកទឹកភ្លូកដី នៅវត្តបាកានខេត្តពោធិ៍សាត់ ជាវត្តមួយ ដែលប្រជាពលរដ្ឋស្ទើរតែទូទាំងប្រទេស មានជំនឿជឿជាក់លើព្រះអង្គបែព្រះភ័ក្រទៅទិសខាងលិច និងដើមពោធិ៍មួយដើមរសាត់បញ្ច្រាសទឹក ដែលមានបារមីពូកែស័ក្កិសិទ្ធ ល្បីល្បាញដល់មហាជនគ្រប់ជំនាន់តាំងពីដើមមក។
នៅក្នុងពិធីឆ្លង បុណ្យចូលឆ្នាំថ្មីប្រពៃណីជាតិខ្មែរ ឆ្មាំមមី អដ្ឋស័ក ព.ស២៥៧០ ថ្ងៃសៅរ៍ ០២កើត ខែពិសាខ ត្រូវនឹងថ្ងៃទី១៨ខែមេសាឆ្នាំ២០២៦នៅវត្តបាកាននេះ គណៈកម្មការវត្តបានរៀបចំពិធីស្រង់ព្រះតាមប្រពៃណីព្រះពុទ្ធសាសនា និងពិធីប្រោះព្រំសុគន្ធវារី ដល់ព្រះតេជគុណសុតន្តោ ឡាយ កន ព្រះគ្រូចៅអធិការវត្ត ដើម្បីជាការរំឭកគុណគ្រូ និងដឹងគុណគ្រូ ដែលធ្លាប់បានចិញ្ចឹមបីបាច់ថែរក្សា បង្ហាត់បង្រៀនប្រៀនប្រដៅ ដល់ភិក្ខុសាមណេរាប់ជំនាន់ ជាបន្តបន្ទាប់កន្លងមក ដែលសព្វថ្ងៃនេះអ្នកខ្លះនៅបន្តបួសជាសង្ឃនៅឡើយ និងខ្លះទៀតបានលាចាកសិក្ខាបទ ទៅរកការងារធ្វើសម្រាប់ថ្ងៃអនាគតជាដើម។
មិនថាតែក្នុងជួរព្រះសង្ឃដែលជាអ្នកមានសិល្ប៍ប៉ុណ្ណោះទេ ការរំលឹកគុណគ្រូនិងការដឹងគុណគ្រូនេះ បានក្លាយជាចលនាជាតិដ៏ផុសផុលមួយ ដែលបានស្តែងឡើងតាមរយៈការជួបជុំសិស្សឬអតីតសិស្ស ជាមួយគ្រូបង្រៀនឬគ្រូបង្រៀនចូលនិវត្ត ដើម្បីប្រារព្ធពិធីនៅតាមសាលារៀន ក៏ដូចជាការបង្កើតឱកាសនានាតាមគ្រប់រូបភាព ក្នុងគោលបំណងជួបជុំគ្នា សំណេះសំណាលសួរសុខទុក្ខគ្នាទៅវិញទៅមក ដើម្បីរំលឹកអនុស្សាវរីយ៍ និងទទួលទានអាហារសាមគ្គី ក្នុងន័យស្រលាញ់រាប់អានគ្នាជារៀងរហូត។
សាស្ត្រាចារ្យ គ្រូបង្រៀន គ្រូបាធ្យាយ គឺជាធនធានដ៍សំខាន់ សម្រាប់មនុស្សជាតិយើងទាំងអស់គ្នា ដូច្នេះ សូមភិក្ខុសាមណេរ យុវជន សិស្សានុសិស្ស បន្តប្រពៃណីជួបជុំជាមួយគ្រូ តាមដែលអាចធ្វើទៅបាន ដើម្បីជាការដឹងគុណដល់អ្នកដែលបានបង្ហាត់បង្រៀនយើង និងជាគំរូល្អដល់កូនចៅជំនាន់ក្រោយទៀត។
ពិធីឆ្លងបុណ្យចូលឆ្នាំថ្មីប្រពៃណីជាតិខ្មែរនៅវត្តបាកាន បានដំណើរការទៅយ៉ាងគគ្រឹគគ្រេង ដែលមានមនុស្សម្នា ស្រីប្រុសចាស់ក្មេង យ៉ាងណែនណាន់តាន់តាប់ មកទស្សនាការសម្ដែងសិល្បះ លេងល្បែងប្រជាប្រិយ ការប្រកួតកីឡា និងការរាំលេងកំសាន្ត ប្រកបដោយក្ដីសប្បាយរីករាយជាទីបំផុត។
ឆ្នាំនេះ រាជរដ្ឋាភិបាលមិនអនុញ្ញាតឲ្យលេងគប់ទឹកនិងប៉ាតម្ស៉ៅនោះទេ ចំណែកនៅវត្តបាកានដោយសារអាកាសធាតុក្ដៅខ្លាំងពេក គណៈកម្មការបានបាញ់ទឹកប្រាយឡើងលើ ធ្វើជាភ្លៀង ដើម្បីឲ្យត្រជាក់ត្រជុំដល់ព្រះសង្ឃ ពុទ្ធបរិស័ទ និងភ្ញៀវមកលេងកំសាន្ត។ ចំណែកការលេងប៉ាតម្ស៉ៅ មានតែនៅក្នុងបរិវេណវត្តប៉ុណ្ណោះ គឺមិនមានការលេងគប់ទឹកឬប៉ាតម្ស៉ៅនៅខាងក្រៅ ខណៈពេលកំពុងជិះម៉ូតូនៅលើផ្លូវ ដែលនាំឲ្យបង្កគ្រោះថ្នាក់នោះទេ។
គួរំលឹកថា នៅវត្តបាកានតែងតែធ្វើពិធីស្រង់ព្រះ និងពិធីដង្ហែព្រះតេជគុណសុតន្តោ ឡាយ កន ព្រះគ្រូចៅអធិការវត្ត ប្រោះព្រំសុគន្ធវារីជារៀងរាល់ឆ្នាំ ដើម្បីរំលឹកគុណគ្រូបាធ្យាយ ដែលបានបណ្ដុះបណ្ដាល បង្ហាត់បង្រៀន ដល់ភិក្ខុសាមណេរ ផ្នែកខាងធម៌អារនិងវិន័យសង្ឃ ជាបន្តបន្ទាប់កន្លងមកនេះ។
ពិធីនេះដែរ បានបង្ហាញឲ្យឃើញពីការគោរពប្រតិបត្តិ ប្រពៃណីទំនៀមទំលាប់ជាតិ និងបង្ហាញពីភាពសុខសាន្តរបស់ប្រជាពលរដ្ឋ ក្រោមម្លប់នៃសុខសន្តិភាព ដែលដឹកនាំដោយសម្ដេចតេជោ ហ៊ុន សែន បន្តមកសម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលរក្សាបាននូវខឿនសេដ្ឋកិច្ច វឌ្ឍនភាពសង្គមដ៍ល្អប្រសើរ និងការអភិវឌ្ឍន៍លើគ្រប់វិស័យ នៃប្រទេសជាតិទាំងមូល។ ជាមួយគ្នានេះ ក៍សូមឧទ្ទិសកុសលផលបុណ្យ ជូនដល់វិញ្ញាណក្ខន្ធវីរៈកងទ័ពនិងវីរៈនគរបាលជួរមុខ ដែលបានពលីជីវិត បូជាសាច់ស្រស់ឈាម ដើម្បីបុព្វហេតុជាតិមាតុភូមិនិងប្រជាជនយើងផងដែរ៕
ចែករំលែកព័តមាននេះ