ទីក្រុងញូយ៉ក៖ ប្រេងឆៅថ្ងៃនេះធ្លាក់ថ្លៃជាង១០%ត្រឹមតែរយៈពេល២ម៉ោងប៉ុណ្ណោះបន្ទាប់ពីរដ្ឋមន្ត្រីការបរទេសអ៊ីរ៉ង់ប្រកាសថាច្រកសមុទ្រហ័រម៉ូសបើកដំណើរការពេញលេញឡើងវិញនៅអំឡុងពេលអនុវត្តបទឈប់បាញ់ជាមួយអាមេរិក។ លោកបានបង្ហោះសារនៅលើបណ្ដាញអ៊ិចថាច្រកសមុទ្រនេះបើកដំណើរការយ៉ាងពេញបន្ទុកស្របទៅតាមបទឈប់បាញ់នៅប្រទេសលីបង់។ គ្រាន់តែឮដំណឹងនេះភ្លាម ទីផ្សារជួញដូរទ្រព្យសកម្ម និងទីផ្សារថាមពលចាប់ផ្ដើមបញ្ចេញប្រតិកម្មភ្លាមៗតែម្ដង។
ប្រេងឆៅតាមហាងឆេងអាមេរិក (West Texas) ធ្លាក់ថ្លៃជាង១២% មានន័យថាលក់ចេញតម្លៃ៨២ដុល្លារក្នុងមួយបារ៉ែល (១៥៩លីត្រ)។ ចំណែកហាងឆេងនៅអឺរ៉ុប (Brend) ធ្លាក់ថ្លៃ១០% មានន័យថាលក់ចេញ៨៨ដុល្លារក្នុងមួយបារ៉ែល។ លោកដូណាល់ត្រាំក៏ប្រកាសគាំទ្រការបើកច្រកសមុទ្រហ័រម៉ូសឡើងវិញផងដែរ។ ប៉ុន្តែលោកបញ្ជាក់ជាថ្មីថាអាមេរិកនៅតែបន្តបិទខ្ទប់កំពង់ផែរបស់អ៊ីរ៉ង់ដដែលរហូតដល់ភាគីទាំង២ចរចាគ្នាសម្រេចបានកិច្ចព្រមព្រៀង។
លោកត្រាំថ្លែងបន្តទៀតថាលក្ខខណ្ឌភាគច្រើនត្រូវបានលើកយកមកចរចាគ្នារួចហើយជាមួយអ៊ីរ៉ង់ដើម្បីសម្រេចឱ្យបាននូវអ្វីដែលលោកហៅថាជាកិច្ចព្រមព្រៀងស្ថាពររយៈពេលយូរ។ លោកថាដំណើរការចរចាគ្នានេះសង្ឃឹមថានឹងទទួលបានលទ្ធផលឆាប់ៗបំផុត។ ទោះជាមានការអះអាងបែបនេះក្ដី មិនទាន់មានសេចក្ដីប្រកាសលម្អិតអំពីលទ្ធផលនៃកិច្ចចរចា ឬក៏លទ្ធភាពនៃកិច្ចព្រមព្រៀងនៅឡើយទេ។
គេកំពុងរង់ចាំអ៊ុតសភាពកាណ៍ជាបន្តទៀតដើម្បីចង់ដឹងថាតើល្បឿននៃការដឹកជញ្ជូន និងបរិមាណប្រេងដែលដឹកកាត់តាមច្រកហ័រម៉ូសនោះមានកម្រិតណា។ ទីផ្សារលក់ប្រេងឆៅរំពឹងថាត្រឹមចុងខែមេសានេះ ភាគីទាំង២នឹងរកឃើញដំណោះស្រាយដើម្បីបិទបញ្ចប់ជម្លោះ។ ដោយសារពេលនេះជាថ្ងៃចុងសប្ដាហ៍ ដូចនេះក្រុមអ្នកជួញដូរប្រេងឆៅត្រូវបន្តតាមដានព័ត៌មាន និងការវិវត្តនៃតម្លៃប្រេង៕ ប្រភព៖ យួរ៉ូ ញូស៍ (Euro News) និងប្រភពដទៃទៀត
ចែករំលែកព័តមាននេះ