បន្ទាប់ពីបានលេចមុខមាត់នៅក្នុងបទបង្ហាញដ៏គួរឲ្យចាប់អារម្មណ៍របស់ខ្លួននៅឯសម័យប្រជុំរបស់គណៈកម្មាធិការអូឡាំពិកពិភពលោកដើម្បីនិយាយបញ្ចុះបញ្ចូលឲ្យទីក្រុងពីយ៉ុងឆាងទទួលបានជោគជ័យក្នុងពិធីដេញថ្លៃធ្វើម្ចាស់ផ្ទះអូឡាំពិករដូវរងាឆ្នាំ២០១៨រួចមក តារាស្គីកូរ៉េខាងត្បូងនាងគីម យូណាបានក្លាយទៅជាប្រធានបទនៃការជជែកគ្នាពីមនុស្សជាច្រើនក្នុងក្រុង។ ក្នុងពេលនេះភាពល្បីរបស់នាងគឺទៅលើម៉ូដសំលៀកបំពាក់ដែលនាងជ្រើសរើសមកស្លៀកអំឡុងការធ្វើដំណើរ។
បណ្តាអ្នកអត្ថាធិប្បាយនានាតែងតែលើកយកមកពិភាគ្សាចំពោះការស្លៀកពាក់ដ៏ទាក់ភ្នែករបស់នាងនៅព្រលានយន្តហោះ Gimpo នៅក្នុងកិច្ចប្រជុំគណៈកម្មាធិការអូឡាំពិកអាហ្វ្រិកខាងត្បូងនៅទីក្រុងឡូមេប្រទេសតូហ្គោ និងនៅទីក្រុងDurbanអាហ្វ្រិកខាងត្បូង។
ម៉ូដសំលៀកបំពាក់ដែលនាងគីម យូណាស្លៀកអំឡុងយុទ្ធនាការដេញថ្លៃអូឡាំពិកក្រុងពីយ៉ុងឆាងបានក្លាយជាវត្ថុបំណងនៃការស្វែងរកយ៉ាងមានប្រជាប្រិយភាពបំផុតតាមប្រព័ន្ធអ៊ីនធើរណែតពីជនជាតិកូរ៉េជាច្រើន។ បណ្តាអ្នកប្រើប្រាស់ប្រព័ន្ធអ៊ីនធើណែតទាំងឡាយបានផ្ញើសារសរសើរពីការស្លៀកពាក់ដ៏សែនសមរបស់នាងគីម យូណា។
ចំណែកអ្នកមួយចំនួនទៀតបានប្រញាប់ប្រញាល់សួររកប្រភពនិងម៉ាកសំលៀកបំពាក់ ព្រមទាំងក្រុមហ៊ុនផលិត។ ប្រការទាំងនេះនាំឲ្យការលក់ចេញរបស់ក្រុមហ៊ុនមានការកើនឡើង។
កាលពីពេលកន្លងទៅនាងគីម យូណានិយមចូលចិត្តស្លៀកពាក់ធម្មតាៗ ប៉ុន្តែឥឡូវនេះនាងងាកមកសាកល្បងស្លៀកសំលៀកបំពាក់ពណ៌ខ្មៅនិងសវិញ។ តាមពិតទៅស្ទីលថ្មីរបស់នាងគីម យូណាគឺប្រមូលផ្តុំទៅលើលក្ខណៈស្នេហាជាតិដោយផ្ចិតផ្ចង់បំផុត។
អ្នករចនាម៉ូដឲ្យនាងគីម យូណាឈ្មោះRegina Suhបាននិយាយថា៖ «នាងយូណាចង់ស្លៀកសំលៀកបំពាក់ដែលជារបស់កូរ៉េក្នុងខណៈនាងកំពុងតំណាងឲ្យប្រទេស»។
អាវធំគ្មានស្មាពណ៌ខ្មៅនិងរ៉ូបអត់ដៃដែលនាងស្លៀកពាក់អំឡុងថ្ងៃបង្ហាញមុខចុងក្រោយនៅក្រុងDurbanត្រូវបានរចនាម៉ូដដោយលោកយុង គូហូនាយកផ្នែកឆ្នៃម៉ូដក្រុមហ៊ុនCheil Industries។ ក្រុមហ៊ុននេះបាននិយាយថា អាវធំនេះដើមឡើយមិនមែនរចនាដើម្បីដាក់លក់តាមហាងទេ ប៉ុន្តែបន្ទាប់ពីមានការសួររកច្រើនពេក ក្រុមហ៊ុនក៏សម្រេចផលិតចេញជាច្រើន ៕
ចែករំលែកព័តមាននេះ