ទីក្រុងញូវដែល៖ រដ្ឋាភិបាលឥណ្ឌាបានប្រកាសស្វាគមន៍យ៉ាងខ្លាំងក្លា នៅថ្ងៃពុធនេះ ចំពោះកិច្ចព្រមព្រៀងឈប់បាញ់គ្នាដែលសម្រេចបានរវាងសហរដ្ឋអាម៉េរិក និងអ៊ីរ៉ង់ បន្ទាប់ពីពិភពលោកបានឆ្លងកាត់ភាពតានតឹងដល់ចំណុចកំពូលនៃហានិភ័យសង្រ្គាមកម្រិតធ្ងន់។ នេះបើយោងតាមសារព័ត៌មាន Xinhua និងប្រភពផ្សេងទៀតចុះផ្សាយនៅថ្ងៃទី៨ ខែមេសានេះ។

ទីក្រុងញូវដែលីបានសម្តែងក្តីសង្ឃឹមយ៉ាងមុតមាំថា ជំហាននេះនឹងនាំទៅរកសន្តិភាពយូរអង្វែងនៅក្នុងតំបន់មជ្ឈិមបូព៌ា ជាពិសេសគឺការធានានូវសេរីភាពនៃការធ្វើនាវាចរណ៍ និងលំហូរពាណិជ្ជកម្មសកលតាមរយៈច្រកសមុទ្រ Hormuz ដែលជាសរសៃឈាមសេដ្ឋកិច្ចដ៏សំខាន់។

ក្រសួងការបរទេសឥណ្ឌាបានបញ្ជាក់ក្នុងសេចក្តីថ្លែងការណ៍ថា៖ «ដូចដែលយើងបានតស៊ូមតិជាបន្តបន្ទាប់កន្លងមក ការកាត់បន្ថយភាពតានតឹង ការសន្ទនា និងការទូត គឺជាកត្តាចាំបាច់បំផុតដើម្បីបញ្ចប់ជម្លោះដែលកំពុងកើតមានឱ្យបានឆាប់រហ័ស»។ ឥណ្ឌាបានសង្កត់ធ្ងន់ថា ជម្លោះនាពេលកន្លងមកនេះ បានបង្កទុក្ខវេទនាយ៉ាងធំធេងដល់ប្រជាជន និងបានរំខានយ៉ាងធ្ងន់ធ្ងរដល់បណ្តាញផ្គត់ផ្គង់ថាមពល និងពាណិជ្ជកម្មពិភពលោកទាំងមូល។

ការឈានដល់កិច្ចព្រមព្រៀងឈប់បាញ់នាពេលនេះ ត្រូវបានគេចាត់ទុកថាជាការដកដង្ហើមធំមួយសម្រាប់សហគមន៍អន្តរជាតិ បន្ទាប់ពីការគំរាមកំហែងវាយប្រហារហេដ្ឋារចនាសម្ព័ន្ធទ្រង់ទ្រាយធំកាលពីប៉ុន្មានថ្ងៃមុន។ រដ្ឋាភិបាលឥណ្ឌារំពឹងថា ច្រកសមុទ្រ Hormuz នឹងបើកដំណើរការឡើងវិញជាធម្មតា ដែលនឹងជួយឱ្យតម្លៃថាមពលពិភពលោកមានស្ថិរភាព និងបញ្ចៀសបាននូវវិបត្តិសេដ្ឋកិច្ចធ្ងន់ធ្ងរដែលកំពុងយាយីតាមបណ្ដាប្រទេសជាច្រើន៕