ខេត្តបាត់ដំបង ៖ រូបភាពដែលថតជាប់ដោយកាមេរ៉ាសុវត្ថិភាព ដែលពណ៌នាពីសកម្មភាពពួកជនទុច្ចរិតកំពុងដឹកជញ្ជូនកេស​ទំនិញ (បារី) ឆ្លងអូរព្រំដែនពីខ្មែរទៅថៃ ដោយខុសច្បាប់ទាំងកណ្ដាលថ្ងៃ តាមច្រករបៀងមួយកន្លែង ក្នុងទឹកដីស្រុកកំរៀង បានបែកធ្លាយ ហើយត្រូវបានគេយកទៅបង្ហោះព្រោងព្រាតពាសពេញលើបណ្ដាញសង្គម ចាប់តាំងពីព្រឹកថ្ងៃទី​០៧ មេសា រហូតមក បើទោះជារូបភាពនោះ ត្រូវអាជ្ញាធរស្រុកនេះ​អះអាងថា បានកើតឡើងតាំងពីម្ដុំចុងខែមីនា​កន្លងមកក្ដី តែវាជារឿងថ្មីសម្រាប់ពេលនេះ។

ឃ្លីបវីដេអូដែលមានរយៈពេលត្រឹម​០៩វិនាទី បានបង្ហាញពីសកម្មភាពបុរស​ខ្លួនទទេរម្នាក់ ស្លៀក​តែខោខ្លីត្រឹម​ជង្គង់ បានប្រឹងប្រែងសែងជញ្ជូនស្បោងធំៗពណ៌ខ្មៅ ដែលមានគេអះ​អាងថា ជាស្បោងច្រក«កេសបារី» ។ តាមរយៈសកម្មភាពនេះ គេអាចទាយ​ដឹងថា បុរស​ម្នាក់នោះ បានប្រឹងអោបស្បោងពណ៌ខ្មៅនោះពីដីខ្មែរ ឆ្លងអូរព្រំដែនទៅដាក់នៅខាងទឹក​ដីថៃ តាមច្រករបៀងមួយ​កន្លែង ដែលគេស្គាល់ថា ស្ថិតនៅមិនឆ្ងាយប៉ុន្មានពី «កាស៊ីណូ»​មួយ នៅក្បែរច្រកទ្វារអន្តរជាតិ«ដូង» ក្នុងស្រុកកំរៀង ។

បើយោងលើពេលវេលា ដែលថតជាប់ដោយកាមេរ៉ាសុវត្ថិភាពយ៉ាងច្បាស់ក្រឡែតនោះបានបង្ហាញថា សកម្មភាពដឹកជញ្ជូន​បារីរបស់ពួកជនទុច្ចរិត​បានធ្វើឡើង នៅល្ងាចថ្ងៃទី ២៤ មីនា កន្លងទៅថ្មីៗនេះ ។ ប៉ុន្តែមិនត្រូវបានគេទម្លាយឲ្យដឹង ឬ​គេយកទៅផ្សព្វផ្សាយឲ្យ​មហាជនបានដឹងទេ ក្រោយកើតហេតុភ្លាមៗ បើទោះជាថ្ងៃបន្ទាប់ គេឃើញមានអាជ្ញាធរ​គ្រប់ជាន់ថ្នាក់ និង​សមត្ថកិច្ចគ្រប់ជំនាញបានចុះព្រោងព្រាតទៅពិនិត្យដល់ច្រកងងឹត​នោះ​ក្ដី ។

ជុំវិញរូបភាព​ស្ដីពីការបែកធ្លាយ​នូវសកម្មភាពពួកជនទុច្ចរិតលីសែងបារីឆ្លងដែនខាងលើនេះ អភិបាលស្រុកកំរៀង លោក សុខ ដែន បានទទួ​លស្គាល់ថា «ពិតជាបានកើតមានរឿងនេះមែន នៅក្នុងស្រុកកំរៀង» ។ លោក សុខ ដែន បានបញ្ជាក់ប្រាប់កោះសន្តិភាពតាមទូរ​ស័ព្ទ​ស្ដីពីជនទុច្ចរិត លួចរត់ពន្ធបារីឆ្លងដែននេះ នៅរសៀលថ្ងៃទី​០៧ មេសា ។  

លោក​អភិបាលបានថ្លែងថា «តាមរូបភាពនេះ កើតឡើងយូរដែរហើយ គឺ​កាលពីថ្ងៃទី ២៤ មីនា​ ឆ្នាំ២០២៦ តែគេទើបឃើញគេយកមកបង្ហោះ» ។ ត្រង់ចំណុចនេះ លោកបាន​បញ្ជាក់ថា «មួយថ្ងៃក្រោយកើតហេតុ គឺ​នៅថ្ងៃទី​២៥ ​មីនា ខ្ញុំ​និង​អភិបាលខេត្ត រួមជាមន្ត្រី​ជំនាញផង បានចុះភ្លាមៗទៅដល់ទីតាំងនោះ ដើម្បីពិនិត្យសកម្មភាព​នៃច្រកចេញចូល ។

មិនតែប៉ុណ្ណោះ យើងបានប្រគល់មន្ត្រី​ជំនាញ​ប្រមូលភស្ដុតាង​ស្រាវជ្រាវវែកមុខជនប្រព្រឹត្ត ធ្វើកំណត់ហេតុជាក់លាក់ រហូតចងក្រងជាសំណុំរឿងបញ្ជូនទៅតុលាការរួចរាល់ហើយដែរ តែយើងមិនទាន់ឃើញតុលាការមានចំណាត់ការលើករណីនេះនៅឡើយទេ ។ អ៉ីចឹង សំណុំរឿងនេះ បានដល់ដៃតុលាការហើយ» ។

ពាក់ព័ន្ធនឹងមុខសញ្ញារត់ពន្ធ «បារី» ឆ្លងដែនពីប្រទេសកម្ពុជា​ទៅកាន់ប្រទេសថៃ​នេះ បើតាមការកត់សម្គាល់កន្លងមក បានកើតមានឡើងតាំងពីមុនពេលប្រទេសក្បែរខាងគ្នាទាំង០២ មើលមុខគ្នាមិនចំមកម្ល៉េះ (មុនពេលច្បាំងគ្នាបិទព្រំដែន) ។ កាលណោះ ពួកឈ្មួញបានធ្វើសកម្មភាពដ៏មមារញឹក និង​ខ្លាំងក្លាបំផុត នៅតាមច្រករបៀងនានា ក្នុងទឹកដីស្រុកសំពៅលូន ។

ហើយ​ថែមទាំងគេដឹងថា ច្រករបៀង​រត់ពន្ធបារីឆ្លងដែនដ៏មមារញឹកទាំងនោះ ស្ថិតនៅមិនឆ្ងាយ​ប៉ុន្មាន​ពីច្រកទ្វារអន្តរជាតិ«ភ្នំដី»ឡើយ ។ ហើយមេឈ្មួញជួញដូរ​បារី ឬ​ស្រា សុទ្ធជាមន្ត្រី​មានអំណាច ដែលរស់នៅក្នុងស្រុកជាប់ព្រំដែននេះតែម្ដង ។ ក្រោយមក នៅពេលតាមបន្ទាត់ព្រំដែនប៉ះទង្គិចគ្នាដោយអាវុធរវាងកងទ័ពកម្ពុជា និង​ថៃ ហើយត្រូវបានភាគីទាំង​០២បិទជិតឈឹង តែពួកមេខ្លោងរត់ពន្ធបារីនេះ ក៏នៅតែឆ្លៀតរត់ពន្ធបារីឆ្លងដែនបានជាបន្តបន្ទាប់ ។

ពេលខ្លះ ក៏របូតបាត់ ពេលខ្លះក៏ត្រូវបានពួកសត្រូវសៀមចាប់បាន ហើយពេលខ្លះ ពួកឈ្មួញដឹកជញ្ជូនឆ្លងដែនមិនទាន់ ក៏ត្រូវកម្លាំងការពារព្រំដែនកម្ពុជា បង្ក្រាប​បាន​ជាបន្តបន្ទាប់ដែរ ។ ប៉ុន្តែគេមិនដែលរកមុខមេខ្លោងណាម្នាក់ឃើញទេ ក្របួចបានតែពួកកម្មករស៊ីឈ្នូលលីសែងទំនិញខុសច្បាប់ឆ្លងអូរព្រំដែនតែប៉ុណ្ណោះ ។

យើងងាកមកតាមដានពីសកម្មភាព​ជនទុច្ចរិត រត់ពន្ធបារីឆ្លងដែននៅស្រុកកំរៀងវិញ តើពេលណាទើបមន្ត្រី​ជំនាញ​ចាត់ការលើសំណុំរឿងនេះ​? ខណៈពួកជនទុច្ចរិត​នៅតែបន្តធ្វើសកម្មភាពមិនឈប់ឈរ ។ រីឯខ្សែបន្ទាត់ព្រំដែន​នៃប្រទេសទាំង០២ នៅបិទជិតឈឹងមិនទាន់បង្ហើបសោះ ។

បើតាមប្រភពពីមន្ត្រី​ជំនាញ​បានបង្ហើបថា តាមស៊ើបអង្កេតកន្លងមក​នេះ ច្រករបៀង នៅខាងក្រោយកាស៊ីណូ​ក្នុងស្រុកកំរៀង ដែលកាមេរ៉ាសុវត្ថិភាព​ថតជាប់សកម្មភាពឈ្មួញជួញដូរបារីឆ្លងដែនខាងលើនេះ គឺជាច្រកសកម្មបំផុត សម្រាប់ពួកឈ្មួញនាំបារីឆ្លងដែន ។ ការស៊ើបអង្កេតបានរកឃើញថា ស្ទើរទាំងយប់​​ទាំងថ្ងៃដែលពួកឈ្មួញបានដឹកជញ្ជូនបារីឆ្លងដែន​«ច្រករបៀង»មួយនេះ ហាក់ដូចជាមានការបើកដៃពីមន្ត្រី​ខិលខូចប្រចាំតំ​បន់នោះ។

ប៉ុន្តែក្រោយពីបែកធ្លាយ កាលពីថ្ងៃទី​២៤ មីនា រហូតមកទល់ពេលនេះ ពួកឈ្មួញទុច្ចរិត ហាក់ស្ងប់ស្ងាត់ មិនធ្វើសកម្មភាពទៀតទេ ។ យ៉ាងណាក្ដី លោក សុខ ដែន អភិបាលស្រុកកំរៀង បានអះអាងថា សំណុំរឿង​ឈ្មួញ​រត់ពន្ធ​បារី​ឆ្លង​ដែន​ខាងលើ​នេះ មន្ត្រី​ជំនាញ បាន​បញ្ជូន​សំណុំរឿង​ទៅ​តុលាការ​ហើយ   គ្រាន់តែ​តុលាការ​មិន​ទាន់​ចាត់ការ​លើ​ក្រុម​ជនល្មើស​ ។  ដោយឡែក ​ច្រករបៀង​ខាងលើ ឬ​តាម​បណ្ដា​ច្រក​ដទៃ​ទៀត ក៏​ត្រូវ​បាន​រឹត​បន្ដឹង​យ៉ាង​តឹងតែង​ដែរ ក្រោម​ការ​ត្រូវ​ពិនិត្យ​របស់​មន្ត្រី​ការពារ​ព្រំដែន ​៕