រាជធានីភ្នំពេញ ៖ ដេប៉ូបញ្ជូល និងលក់ហ្គាស មួយកន្លែង រួមទាំងផ្ទះប្រជាពលរដ្ឋចំនួន៥ល្វែង និងរថយន្ត០៣គ្រឿង ម៉ូតូសណ្តោង ០១គ្រឿង និងបង្គោលភ្លើង…
រាជធានីភ្នំពេញ ៖ ដេប៉ូបញ្ជូល និងលក់ហ្គាស មួយកន្លែង រួមទាំងផ្ទះប្រជាពលរដ្ឋចំនួន៥ល្វែង និងរថយន្ត០៣គ្រឿង ម៉ូតូសណ្តោង ០១គ្រឿង និងបង្គោលភ្លើង ៤ដើម ត្រូវអណ្តាតភ្លើងលេបត្របាក់ អស់ស្ទើរទាំងស្រុង ។
ហេតុការណ៍ខាងលើនេះបង្កការភ្ញាក់ផ្អើលកាលពីវេលាម៉ោង ០៥ និង១៥នាទីព្រឹកព្រលឹម ថ្ងៃទី ០៧ ខែមេសា ឆ្នាំ២០២៦ នៅចំណុចដេប៉ូបញ្ចូល និងលក់ហ្គាស មួយកន្លែង តាមបណ្តោយផ្លូវលេខ ២០៥ កែងផ្លូវលេខ ២៩៦ សង្កាត់ទួលស្វាយព្រៃទី២ ខណ្ឌបឹងកេងកង រាជធានីភ្នំពេញ ។
តាមការបញ្ជាក់ពីប្រជាពលរដ្ឋបានអោយដឹងថា មុនកើតហេតុ គេបានឮសម្លេង ចេញពីក្នុងដេប៉ូបញ្ជូល និងលក់ហ្គាស លុះមួយសន្ទុះក្រោយមក ក៏ស្រាប់តែផ្ទុះកំប៉ុងហ្គាស ជាបន្តបន្ទាប់ រហូតបង្កអោយកើតមានអណ្តាតភ្លើងយ៉ាងសន្ធោសន្ធៅ បង្កភ្ញាក់ផ្អើលដល់ពលរដ្ឋ នៅក្បែរនោះឆោឡោ ប្រញាប់ប្រញាល់រាយការណ៍ទៅកាន់សមត្ថកិច្ចមូលដ្ឋាន ដើម្បីបន្តទាក់ទងមន្ត្រីជំនាញពន្លត់អគ្គិភ័យ ជួយអន្តរាគមន៍ អោយទាន់ពេលវេលា ។
អគ្គិភ័យនេះបង្កការខូចខាតយ៉ាងធ្ងន់ធ្ងរដល់ដេប៉ូបញ្ចូល និងលក់ហ្គាស ចំនួន ០១កន្លែង រួចរាលដាលដល់ផ្ទះប្រជាពលរដ្ឋចំនួន៥ល្វែង , រថយន្ត ០៣គ្រឿង , ម៉ូតូសណ្តោងរម៉ក់ ០១គ្រឿង និងបង្គោលភ្លើងចំនួន ០៤ដើម តែសំណាងគ្មានមនុស្សរងរបួស ។
ក្នុងហេតុការណ៍ខាងលើនោះ បានប្រើប្រាស់រថយន្តពន្លត់អគ្គិភ័យ របស់ការិយាល័យបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ និងរថយន្តជំនួយ របស់ក្រសួងមហាផ្ទៃ មកអន្តរាគមន៍បាញ់ពន្លត់អោយរលត់ជាស្ថាពរ ។ ចំពោះមូលហេតុ សមត្ថកិច្ច កំពុងបើកការស្រាវជ្រាវនៅទីតាំងកើតហេតុ ៕
ចែករំលែកព័តមាននេះ