ប្រទេសវៀតណាម ៖ ក្រសួងសុខាភិបាលប្រទេសវៀតណាម មានគម្រោងអភិវឌ្ឍសេវាវេជ្ជសាស្ត្រដែលមានគុណភាពខ្ពស់ និងលើកកម្ពស់ទេសចរណ៍វេជ្ជសាស្ត្រ ដោយទាក់ទាញអ្នកជំងឺទាំងក្នុងស្រុក និងអន្តរជាតិ ខណៈទីផ្សារត្រូវបានព្យាករណ៍ថានឹងឈានដល់ ៤ ពាន់លានដុល្លារអាមេរិក…
ប្រទេសវៀតណាម ៖ ក្រសួងសុខាភិបាលប្រទេសវៀតណាម មានគម្រោងអភិវឌ្ឍសេវាវេជ្ជសាស្ត្រដែលមានគុណភាពខ្ពស់ និងលើកកម្ពស់ទេសចរណ៍វេជ្ជសាស្ត្រ ដោយទាក់ទាញអ្នកជំងឺទាំងក្នុងស្រុក និងអន្តរជាតិ ខណៈទីផ្សារត្រូវបានព្យាករណ៍ថានឹងឈានដល់ ៤ ពាន់លានដុល្លារអាមេរិក នៅឆ្នាំ ២០៣៣។ នេះបើតាមប្រភពពីទីភ្នាក់ងារសារព័ត៌មានវៀតណាម VNA និង VnExpress បានចេញផ្សាយ។
ស្ថិតក្រោមផែនការនេះនៅឆ្នាំ ២០៣០ ខេត្ត/ក្រុងចំនួន ៥ គឺទីក្រុងហាណូយ ហូជីមិញ ដាណាំង (Da Nang) ខេត្តក្វាងនិញ (Quang Ninh) និងខេត្តខាញ់ហ័រ (Khanh Hoa) នឹងសាកល្បងគំរូទេសចរណ៍វេជ្ជសាស្ត្ររួមបញ្ចូលគ្នានូវមន្ទីរពេទ្យ សណ្ឋាគារ រមណីយដ្ឋាន និងសេវាកម្មធ្វើដំណើរ។ បើយោងតាមក្រសួង ទីផ្សារទេសចរណ៍វេជ្ជសាស្ត្ររបស់ប្រទេសវៀតណាមមានតម្លៃប្រហែល ៧០០ លានដុល្លារនៅឆ្នាំ ២០២៤ ហើយត្រូវបានព្យាករណ៍ថានឹងពង្រីកដល់ជិត ៤ ពាន់លានដុល្លារនៅឆ្នាំ ២០៣៣ តំណាងឱ្យអត្រាកំណើនប្រចាំឆ្នាំជាមធ្យមប្រហែល ១៨%។
ប្រទេសវៀតណាមទទួលបានអត្ថប្រយោជន៍ពីគុណសម្បត្តិនៃការប្រកួតប្រជែងជាច្រើន រួមទាំងការចំណាយទាប កម្លាំងពលកម្មវេជ្ជសាស្ត្រមានជំនាញខ្ពស់ និងសមត្ថភាពក្នុងការអនុវត្តនីតិវិធីដ៏ស្មុគស្មាញនៅក្នុងប្រភេទជំងឺដូចជា បេះដូង ការប្តូរសរីរាង្គ ការបង្កកំណើតក្នុងវីត្រូ (IVF) ឬបច្ចេកទេសជំនួយបន្តពូជដ៏មានប្រសិទ្ធភាព និងទន្តសាស្ត្រ (សុខភាពមាត់ធ្មេញ)។ ចំណុចខ្លាំងទាំងនេះទើបធ្វើឱ្យវៀតណាមប្រកួតប្រជែងជាមួយមជ្ឈមណ្ឌលវេជ្ជសាស្ត្រក្នុងតំបន់ដែលត្រូវបានបង្កើតឡើង។
ផែនការខាងលើទៀតសោត ក៏គ្រោងនឹងបង្កើតមន្ទីរពេទ្យដែលមានការទទួលស្គាល់ជាអន្តរជាតិយ៉ាងហោចណាស់ចំនួន ១៥ នៅត្រឹមឆ្នាំ ២០៣០ រួមទាំងស្ថាប័នសាធារណៈចំនួន ៥ ផងដែរ។ ក្នុងពេលជាមួយគ្នានេះ កញ្ចប់សេវាកម្មនឹងត្រូវបានធ្វើពិពិធកម្មដើម្បីរួមបញ្ចូលការព្យាបាលវេជ្ជសាស្ត្រកម្រិតខ្ពស់ ឱសថបុរាណរួមផ្សំជាមួយនឹងការសម្រាកលំហែកាយ និងកញ្ចប់ថែទាំសុខភាពជាច្រើនផងដែរ៕
ចែករំលែកព័តមាននេះ