បរទេស ៖ សមាជិកនាវិកនៃបេសកកម្ម Artemis II របស់អង្គការ NASA ត្រូវបានគេប្រទះឃើញកំពុងប្រើប្រាស់ឧបករណ៍បច្ចេកវិទ្យាដ៏ល្បីល្បាញមួយដែលកំពុងហោះអណ្តែតក្នុងកាប៊ីនយានអវកាស នោះគឺ iPhone 17 Pro Max ពណ៌ប្រាក់ ។ បេសកកម្មនេះជាដំណើរដំបូងបង្អស់ដែលមានមនុស្សជិះឆ្ពោះទៅកាន់ភពព្រះច័ន្ទក្នុងរយៈពេលជាងកន្លះសតវត្សរ៍ បានដាក់បញ្ចូលទូរស័ព្ទកំពូលចុងក្រោយបង្អស់របស់ Apple ជាឧបករណ៍បន្ថែមសម្រាប់ឱ្យអវកាសយានិកថតរូបភាព និងវីដេអូដែលមានកម្រិតច្បាស់ខ្ពស់នៃដំណើរប្រវត្តិសាស្ត្ររបស់ពួកគេ ។

ប្រហែលជាបួនម៉ោងក្រោយការចាប់ផ្តើមបេសកកម្ម កាមេរ៉ាដែលតាមដានសកម្មភាពក្នុងកាប៊ីននៃយានអវកាស Orion បានថតជាប់រូបភាព iPhone ពណ៌ប្រាក់មួយកំពុងអណ្តែតក្នុងលំហអអាកាស ។ វាបានហោះចេញពីដៃរបស់លោក Jeremy Hansen កាត់ពីលើក្បាលលោក Reid Wiseman និងលោក Victor Glover ហើយត្រូវបានចាប់យកដោយអ្នកស្រី Christina Koch ។ ទោះបីជាអវកាសយានិកមានកាមេរ៉ាអាជីពកម្រិតខ្ពស់ Nikon D5 និង GoPro ក៏ដោយ ក៏ពួកគេប្រើប្រាស់ iPhone 17 Pro Max ផងដែរ ដោយសារប្រព័ន្ធឡេនដ៏ទំនើប និងភាពងាយស្រួលក្នុងការកាន់តាមខ្លួន ។

អវកាសយានិកកំពុងចាប់ផ្តើមប្រើប្រាស់សមត្ថភាពរបស់ទូរស័ព្ទនេះ ជាពិសេសគឺការប្រើ Optical Zoom 8x ដើម្បីថតរូបផ្នែកខាងលើនៃគ្រាប់រ៉ុក្កែតដែលបានរុញច្រានពួកគេទៅកាន់លំហអាកាស ។ ពួកគេក៏បានប្រើឧបករណ៍នេះដើម្បីថតសកម្មភាពរបស់យាន Orion កំឡុងពេលធ្វើការបង្ហាញការភ្ជាប់យាន (Docking demonstrations) ដោយថតក្នុងកម្រិត 4K Dolby Vision ។ ទោះបីជាវាជាទូរស័ព្ទដូចគ្នាដែលអ្នកអាចទិញបាននៅតាមហាងលក់រាយក៏ដោយ ក៏វាត្រូវបានកំណត់មុខងារសំខាន់ៗមួយចំនួននៅពេលស្ថិតក្នុងគន្លងអវកាស ។ NASA បានបញ្ជាក់ថា ឧបករណ៍ទាំងនេះមិនអាចភ្ជាប់អ៉ីនធឺណិត ឬប្រើ Bluetooth បានទេ ដើម្បីការពារការរំខានដល់ប្រព័ន្ធទំនាក់ទំនងដ៏រសើបរបស់យានអវកាស ។

ការនាំយកឧបករណ៍ដែលសម្បូរដោយជាតិកញ្ចក់ដូចជា iPhone ឆ្លងកាត់ការត្រួតពិនិត្យសុវត្ថិភាព គឺជាកិច្ចការដ៏ស្មុគស្មាញ ។ នៅក្នុងកាប៊ីនដែលគ្មានទម្ងន់ និងត្រូវបានបិទជិតឈឹង ហានិភ័យនៃកញ្ចក់បែកគឺជាការព្រួយបារម្ភដ៏ខ្លាំង ព្រោះបំណែកតូចៗទាំងនោះនឹងមិនធ្លាក់ចុះដល់បាតឡើយ ។ បច្ចេកវិទ្យាការពារអេក្រង់ Ceramic Shield 2 ប្រហែលជាបានជួយក្នុងដំណើរការវាយតម្លៃគុណភាពនេះ ដោយសារភាពធន់របស់វាត្រូវបានពង្រឹង ។

ព្រឹត្តិការណ៍ដ៏សំខាន់របស់ NASA នេះ ក៏ស្របពេលជាមួយនឹងខួបលើកទី ៥០ របស់ក្រុមហ៊ុន Apple ផងដែរ ហើយវាក៏ជាលើកដំបូងដែល iPhone ត្រូវបានវាយតម្លៃគុណភាពពេញលេញសម្រាប់ការប្រើប្រាស់រយៈពេលយូររបស់ NASA ក្នុងលំហអាកាស ។ ខណៈពេលដែល iPhone ធ្លាប់បានហោះហើរក្នុងបេសកកម្មឯកជនពីមុនមក ការដាក់បញ្ចូលក្នុងបេសកកម្ម Artemis II គឺជាសញ្ញាបង្ហាញថា NASA ចាប់ផ្តើមមានទំនុកចិត្តកាន់តែខ្លាំងក្នុងការប្រើប្រាស់បច្ចេកវិទ្យាសម្រាប់អ្នកប្រើប្រាស់ទូទៅក្នុងការស្រាវជ្រាវដែលមានសារៈសំខាន់ខ្ពស់ ។ Apple បាននិយាយថា ខ្លួនមិនបានចូលរួមដោយផ្ទាល់ក្នុងដំណើរការសាកល្បងនោះទេ ប៉ុន្តែពេលនេះឧបករណ៍នេះបានក្លាយជាផ្នែកមួយនៃឧបករណ៍ប្រើប្រាស់ផ្លូវការសម្រាប់អ្នករុករកភពព្រះច័ន្ទជំនាន់ក្រោយ ៕ ប្រភព ៖ iclarified

សូមទស្សនាវីដេអូខ្លីខាងក្រោមនេះ ៖