ពួកឧទ្ទាមលីប៊ីកាលពីថ្ងៃទី៣០ កក្កដា កន្លងមក បានឡោមព័ទ្ធទីតាំងចុងក្រោយរបស់លោកកាដាហ្វី នៅតំបន់ភ្នំភាគខាងលិចប្រទេស ហើយសង្ឃឹមថា ពួកគេនឹងដណ្តើមកាន់កាប់ទីតាំងនោះក្នុងពេលឆាប់ៗនេះ។ នេះបើតាមការឱ្យដឹងដោយមេបញ្ជាការឧទ្ទាមលីប៊ីមួយរូប ។ រថក្រោះរបស់ពួកឧទ្ទាមលីប៊ី បានបាញ់គ្រាប់ផ្លោងសំដៅតំបន់ Tiji ដែលនៅទីនោះមានកងទ័ពរដ្ឋាភិបាលប្រហែល៥០០នាក់ ។
មេបញ្ជាការឧទ្ទាមលីប៊ីរូបនេះលោក Nasir al Handi ជាអតីតសមាជិកកងកម្លាំងរបស់លោកកាដាហ្វី បានប្រាប់ទីភ្នាក់ងារព័ត៌មានរ៉យទ័រថា ឥឡូវនេះកងកម្លាំងឧទ្ទាមលីប៊ីបានឡោមព័ទ្ធតំបន់ Tiji ហើយសង្ឃឹមថា នឹងដំណ្តើមកាន់កាប់ទីនោះនៅត្រឹមថ្ងៃទី៣១ កក្កដា។
ទោះបីជាមានការបាញ់ដោយអាវុធផ្សេងៗពីសំណាក់កងកម្លាំងស្ម័គ្រស្លាប់របស់លោកកាដាហ្វី ក៏ដោយ ក៏ពួកឧទ្ទាមលីប៊ីនៅតែតស៊ូដណ្តើមកាន់កាប់តំបន់ និងក្រុងនានាដែលស្ថិតក្រោមការកាន់កាប់របស់កងកម្លាំងលោកកាដាហ្វី ។
ការដណ្តើមកាន់កាប់បានតំបន់ Tiji នឹងផ្តល់ឱ្យពួកឧទ្ទាមនូវការជំរុញជាយុទ្ធសាស្ត្រមួយដើម្បីឱ្យពួកគេរុលចូលទៅដណ្តើមកាន់កាប់រដ្ឋធានីទ្រីប៉ូលី។ មេដឹកនាំផ្តាច់ការលីប៊ី លោកកាដាហ្វី និយាយថា ពួកឧទ្ទាមដែលកំពុងតស៊ូដើម្បីបញ្ចប់ការកាន់អំណាចរយៈពេល៤ទសវត្សរបស់លោកត្រូវជម្រុញដោយបណ្តាញភេរវកម្មអាល់កៃដា ៕
ចែករំលែកព័តមាននេះ