រដ្ឋបាលខេត្ដសៀមរាប បើកកម្មវិធីលំហាត់សមយុទ្ធជាក់ស្ដែង ស្ដីពីការឆ្លើយតបគ្រោះទឹកជំនន់
- សៀមរាប
ខេត្តសៀមរាប ៖ នៅថ្ងៃទី ២៧ ខែមីនា ឆ្នាំ ២០២៦ រដ្ឋបាលខេត្ដសៀមរាប សហការជាមួយ សង្កាត់គោកចក…
ខេត្តសៀមរាប ៖ នៅថ្ងៃទី ២៧ ខែមីនា ឆ្នាំ ២០២៦ រដ្ឋបាលខេត្ដសៀមរាប សហការជាមួយ សង្កាត់គោកចក បានរៀបចំបើកលំហាត់សមយុទ្ធជាក់ស្ដែងស្ដីពីការឆ្លើយតបគ្រោះទឹកជំនន់ ក្នុងក្រុងសៀមរាប ដើម្បីបណ្ដុះបណ្ដាលអំពីការជម្លៀសពេលមានទឹកជំនន់ ព្រមទាំងបង្កើនកម្រិតយល់ដឹងទៅនឹងគោលការណ៍ស្ដីពីការជម្លៀសប្រជាជនពីទឹកជំនន់ និងការមើលប្រសិទ្ធភាពការគ្រប់ គ្រងគ្រោះមហន្ដរាយរបស់អាជ្ញាធរពាក់ព័ន្ធ ដែលធ្វើឡើងក្រោមអធិបតីភាព លោក លន់ ទ្រព្យ ប្រធាននាយកដ្ឋានប្រតិបត្ដិការឆ្លើយតប សង្គ្រោះបន្ទាន់ និងស្ដារឡើងវិញនៃគណៈកម្មាធិការជាតិគ្រប់គ្រងគ្រោះមហន្ដរាយ ដឹកនាំដោយ លោក អ៊ឹង គឹមលាង អភិបាល រងខេត្ដ និងមានការចូលរួមពីអ្នកពាក់ព័ន្ធជាច្រើនរូប។
លោក អ៊ឹង គឹមលាង អភិបាលរងខេត្តសៀមរាប មានប្រសាសន៍ថា គ្រោះមហន្ដរាយ យើងមិនអាចដឹងមុនបាននោះទេ ដូច្នេះយើងទាំងអស់ត្រូវរៀបចំឱ្យបានរួចរាល់ និងត្រៀមបង្ការ និងបម្រុងទុកជាមុន ដើម្បីអាចដោះស្រាយបញ្ហាបានទាន់ពេលវេលាផងដែរ។
ជាក់ស្ដែងនៅក្នុងថ្ងៃនេះ រដ្ឋបាលខេត្ដសៀមរាប សហការជាមួយ សង្កាត់គោកចក បានរៀបចំបើកលំហាត់ និងបើកលំហាត់សមយុទ្ធជាក់ស្ដែងស្ដីពីការឆ្លើយតបគ្រោះទឹកជំនន់ ក្នុងក្រុងសៀមរាប ក្នុងគោលបំណងពង្រឹងសមត្ថភាពសង្គ្រោះលើភាពជាអ្នកដឹកនាំគ្រប់គ្រង ការឆ្លើយតបគ្រោះអាសន្ន ផ្ដល់ជាគម្រោងផែនការ និង វិធីសាស្ដ្រក្នុងការអនុវត្ដសាកល្បង និង សមយុទ្ធជាក់ស្ដែង ។
សាកល្បងសមត្ថភាពរបស់មន្ដ្រីថ្នាក់ខេត្ដដល់ថ្នាក់មូលដ្ឋានក្នុងការពង្រឹងសមត្ថភាព ដើម្បីលើកស្ទួយជំនាញ ចំណេះដឹង និងអាកប្បកិរិយាដែលសមស្របទៅនឹងស្ថានភាពពេលមានគ្រោះអាសន្ន រួមទាំងកាត់បន្ថយហានិ ភ័យ និងខូចខាតពីគ្រោះមហន្ដរាយ។ លោកអភិបាលរងខេត្ដ ក៏បានថ្លែងអំណរគុណយ៉ាងជ្រាលជ្រៅចំពោះលោកប្រធាននាយកដ្ឋានប្រតិបត្ដិការឆ្លើយតប សង្គ្រោះបន្ទាន់ និងស្ដារឡើងវិញនៃគណកម្មាធិការជាតិគ្រប់គ្រងគ្រោះមហន្ដរាយ និង ក្រុមការងារទាំងអស់ដែលតែងតែយកចិត្ដទុកដាក់ ក្នុងការគាំទ្រ និងជំរុញការអនុវត្ដការងារកន្លងមក ជាពិសេសតាមរយៈកម្មវិធីសមយុទ្ធជាក់ស្ដែងនាពេលនេះ។
ក្នុងនោះដែរ លោក លន់ ទ្រព្យ ប្រធាននាយកដ្ឋានប្រតិបត្ដិការឆ្លើយតប សង្គ្រោះបន្ទាន់ និងស្ដារឡើងវិញនៃគណកម្មាធិការជាតិគ្រប់គ្រងគ្រោះមហន្ដរាយ បានឱ្យដឹងថាការគ្រប់គ្រងគ្រោះមហន្តរាយបានទាន់ពេលវេលា គឺជាវិធានការសង្គ្រោះបន្ទាន់ដោយផ្ទាល់របស់អាជ្ញាធរ និងកម្លាំងជំនាញ ដើម្បីកាត់ បន្ថយអាយុជីវិត ទ្រព្យសម្បត្តិ និងផលដំណាំរបស់ប្រជាពលរដ្ឋ។ វាផ្តោតលើការរៀបចំផែនការត្រៀមបម្រុងទុក ការប្រមូល និងផ្សព្វផ្សាយព័ត៌មានពីហានិភ័យមុនពេលកើតហេតុដើម្បីឆ្លើយតបឱ្យមានប្រសិទ្ធភាព។
លោកបន្ដថា ចំណុចគន្លឹះនៃការគ្រប់គ្រងគ្រោះ មហន្តរាយទាន់ពេលវេលា ទី១/ ការត្រៀមបង្ការជាមុន រៀបចំកម្លាំងជំនាញ សម្ភារៈ និងផែនការសកម្មភាពទុកជាមុន ទី២/ ប្រព័ន្ធប្រកាសឱ្យដឹងមុន ប្រមូល និងផ្សព្វផ្សាយព័ត៌មានអំពីហានិភ័យទៅដល់ប្រជាសហ គមន៍ ដើម្បីត្រៀមខ្លួន។ ទី៣/ ការឆ្លើយតបសង្គ្រោះបន្ទាន់ ចុះអន្តរាគមន៍ភ្លាមៗនៅពេលមានព្រឹត្តិការណ៍ ដើម្បីកាត់បន្ថយការខូច ខាត៕
ចែករំលែកព័តមាននេះ