ចន សុទីម៉ា និងអ៊ិន លក្ខិណា សន្យានឹងចូលរួមផ្សព្វផ្សាយសិល្បៈវប្បធម៌ខ្មែរឱ្យកាន់តែល្បីនៅលើឆាកអន្តរជាតិ
- ភ្នំពេញ
រាជធានីភ្នំពេញ ៖ តារាសម្តែង និងបេក្ខភាពបវរកញ្ញាពីររូប គឺនាងចន សុទីម៉ា និង អ៊ិន លក្ខិណា បានសន្យាដូចគ្នាថា…
រាជធានីភ្នំពេញ ៖ តារាសម្តែង និងបេក្ខភាពបវរកញ្ញាពីររូប គឺនាងចន សុទីម៉ា និង អ៊ិន លក្ខិណា បានសន្យាដូចគ្នាថា នាងនឹងចូលរួមថែរក្សា និងផ្សព្វផ្សាយសិល្បៈវប្បធម៌ខ្មែរអោយកាន់តែល្បីបន្ថែមទៀតនៅលើឆាកអន្តរជាតិ ខណៈពេលដែលអ្នកទាំងពីរបានចូលរួមសកម្មភាពនេះជាបន្តបន្ទាប់ ។
ការសន្យារបស់តារាស្រីទាំងពីរខាងលើនេះ ធ្វើឡើងបន្ទាប់ពីរូបនាង និងអ្នកសិល្បៈមួយចំនួនទៀត ត្រូវបានអញ្ជើញចូលរួមក្នុងវេទិកាយុវជនក្នុងកិច្ចការវប្បធម៌ ក្រោមប្រធានបទរួមគ្នាដើម្បីការពារ និងលើកស្ទួយសិល្បៈវប្បធម៌ ដែលរៀបចំធ្វើដោយក្រសួងវប្បធម៌ និងវិចិត្រសិល្បៈ នាថ្ងៃទី៣០ ខែមីនា ឆ្នាំ២០២៦ ។
ទន្ទឹមនឹងការអញ្ជើញចូលរួមនៅក្នុងកម្មវិធីដ៏មានអត្ថន័យនេះ អ្នកសិល្បៈដែលបានចូលរួម ជាពិសេស តារាសម្តែងនាង ចន សុទីម៉ា និង អ៊ិន លក្ខិណា បានសម្តែងក្តីសោមនស្សរីករាយ និងសន្យានឹងខិតខំចូលរួមផ្សព្វផ្សាយសិល្បៈ វប្បធម៌ខ្មែរបន្ថែមទៀត ។
ចន សុទីម៉ា បានលើកឡើងថា នាងខ្ញុំ ចន សុទីម៉ា សូមថ្លែងអំណរគុណដល់ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងឯកឧត្តមទិត ថាវរិទ្ធិ ដែលបានផ្តល់កិត្តិយស អោយនាងខ្ញុំបានចូលរួមការងាររបស់ក្រសួងជាច្រើនកន្លងមក ហើយខ្ញុំពិតជារំភើបរីករាយបំផុតដែលខ្ញុំមានកត្តិយស ចូលរួមក្នុង វេទិកា«យុវជនក្នុងកិច្ចការពារវប្បធម៌» ក្រោមប្រធានបទ រួមគ្នាការពារនិងលើកស្ទួយសិល្បៈវប្បធម៌ជាតិ ។
ខ្ញុំសន្យាថា ខ្ញុំនឹងការពារ ហើយចូលរួមបន្តផ្សព្វផ្សាយ វប្បធម៌ អរិយធម៌ ដ៏ល្អផូរផង់របស់ប្រទេសកម្ពុជា អោយកាន់តែល្បីល្បាញដល់អន្តរជាតិទូទាំងពិភពលោកជាតិ ។
ចំណែក អ៊ិន លក្ខិណា ក៏បានលើកឡើងស្រដៀងគ្នាថា នាងខ្ញុំ អ៊ិន លក្ខិណា មានសេចក្តីរំភើបយ៉ាងក្រៃលែង និងសូមគោរពអរគុណខ្លាំងបំផុតដល់លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងឯកឧត្តម ទិត ថាវរិទ្ធិ ដែលបានផ្តល់កិត្តិយសអនុញ្ញាតឲ្យរូបនាងខ្ញុំចូលរួមក្នុងវេទិកា«យុវជនក្នុងកិច្ចការពារវប្បធម៌» ក្រោមប្រធានបទ រួមគ្នាការពារនិងលើកស្ទួយសិល្បៈវប្បធម៌ជាតិ ។
នាងបញ្ជាក់ថា ក្នុងនាមជាសិល្បការិនីកម្ពុជាមួយរូប និងជាកូនចៅខ្មែរជំនាន់ក្រោយដែលបានកំពុងបំពេញបេសកកម្មផ្សព្វផ្សាយអំពីសិល្បៈវប្បធម៌ខ្មែរ នាងខ្ញុំប្តេជ្ញានឹងបន្តសកម្មភាពលើកស្ទួយមរតកវប្បធម៌ជាតិឲ្យល្បាញល្បីទៅកាន់សកលលោក តាមរយៈការបង្កើតមាតិកាផ្សេងៗលើបណ្តាញសង្គម ដោយក្រមសីលធម៌ ភាពត្រឹមត្រូវ និងសេចក្តីថ្លៃថ្នូរ ក្នុងគម្រោងផ្សព្វផ្សាយនាពេលបច្ចុប្បន្ន និងទៅអនាគត ស្របទៅតាមទិសស្លោក «កិច្ចការពារបេតិកភណ្ឌវប្បធម៌ ជាភារកិច្ចរបស់កូនចៅខ្មែរគ្រប់រូប» ។
ជាការកត់សម្គាល់តារាសម្តែងនិងចន សុទីម៉ា បានធ្វើជាវីដេអូផ្សព្វផ្សាយពីសិល្បៈវប្បធម៌ខ្មែរលើបណ្តាញសង្គមជាបន្តបន្ទាប់ ជាពិសេស កាលពីពេលថ្មៗនេះនាងក៏ចូលរួមជាមួយតារា៤នាក់ផ្សេងទៀតគ្រងសម្លៀកបំពាក់ប្រពៃណីបុរាណ អមជាមួយសកម្មភាពលេងល្បែងប្រជាប្រិយខ្មែរ ដើម្បីអបអរពិធីបុណ្យចូលឆ្នាំខ្មែរដែលនឹងចូលមកដល់ក្នុងពេលឆាប់ៗខាងមុខនេះ ។
មិនខុសគ្នាសម្រាប់តារាសម្តែង និងបង្ហាញម៉ូតនាង អ៊ិន លក្ខិណា ក៏បានចូលរួមសកម្មភាពដូចគ្នានេះជាបន្តបន្ទាប់ដែរ ជាក់ស្តែងកាលពីពេលថ្មីៗនេះនាង និងបងស្រីក៏បានគ្រងជាតួអង្គអប្សរាមាស និងប្រាក់ នៅក្នុងថ្ងៃសមរាត្រី នៅលើទឹកដីអង្គរ ហើយសកម្មភាពរបស់អ្មកទាំងពីរបានទទួលការទាក់ទាញ និងចាប់អារម្មណ៍យ៉ាងខ្លាំងពីភ្ញៀវជាតិ និងអន្តរជាតិ ។
ចែករំលែកព័តមាននេះ