រាជធានីភ្នំពេញ ៖ ក្នុងស្មារតីលើកកម្ពស់សុខុមាលភាពកុមារ ក្រុមហ៊ុន តូយ៉ូតា (ខេមបូឌា) បានធ្វើពិធីប្រគល់រថយន្ត Toyota Hiace ចំនួន…
រាជធានីភ្នំពេញ ៖ ក្នុងស្មារតីលើកកម្ពស់សុខុមាលភាពកុមារ ក្រុមហ៊ុន តូយ៉ូតា (ខេមបូឌា) បានធ្វើពិធីប្រគល់រថយន្ត Toyota Hiace ចំនួន ៣ គ្រឿង ជូនដល់មន្ទីរពេទ្យគន្ធបុប្ផា មន្ទីរពេទ្យកុមារអង្គរ និងមជ្ឈមណ្ឌលបេះដូងជប៉ុន ។ សកម្មភាពនេះ គឺជាផ្នែកមួយនៃជំនួយឧបត្ថម្ភជាប់លាប់ជិត ១០ ឆ្នាំមកហើយ ក្នុងគោលដៅជួយសម្រួលដល់ការព្យាបាលកុមារដោយឥតគិតថ្លៃនៅកម្ពុជា ។
ជាក់ស្តែងកាលពីព្រឹកថ្ងៃទី ២៩ ខែមេសា ឆ្នាំ ២០២៦ មកនេះ សកម្មភាពដ៏កក់ក្ដៅមួយបានកើតឡើងនៅទីស្នាក់ការកណ្ដាលក្រុមហ៊ុន តូយ៉ូតា (ខេមបូឌា) ។ រថយន្ត Toyota Hiace ១២ កៅអី ចំនួន ៣ គ្រឿង ត្រូវបានប្រគល់ជូនទៅកាន់មន្ទីរពេទ្យគន្ធបុប្ផា និងមន្ទីរពេទ្យកុមារអង្គរ ព្រមទាំងមជ្ឈមណ្ឌលបេះដូងជប៉ុន ។ នេះមិនមែនគ្រាន់តែជាការផ្ដល់មធ្យោបាយធ្វើដំណើរប៉ុណ្ណោះទេ ប៉ុន្តែគឺជា «ដង្ហើម» ដែលជួយសម្រួលដល់ការសង្គ្រោះបន្ទាន់សម្រាប់កុមារនៅតំបន់ដាច់ស្រយាល ។
គួរំលឹកផងដែរថា ការគាំទ្រវិស័យសុខាភិបាលកុមារអស់រយៈពេលជិតមួយទសវត្សរ៍មកនេះ គឺបានផ្តល់ថវិកាឧបត្ថម្ភជាប់លាប់ដល់មន្ទីរពេទ្យធំៗចំនួន ៣ ដែលព្យាបាលកុមារដោយឥតគិតថ្លៃ ដើម្បីជួយសម្រួលផ្នែកហិរញ្ញវត្ថុក្នុងការព្យាបាល ។ ក្នុងនោះការបរិច្ចាគយានយន្តជំនាញ បានជួយសម្រួលការដឹកជញ្ជូនសង្គ្រោះបន្ទាន់សម្រាប់កុមារនៅតំបន់ដាច់ស្រយាល និងគាំទ្រក្រុមគ្រូពេទ្យចុះអប់រំសុខភាពតាមសហគមន៍ ។ ការផ្តោតលើសុខភាពកុមារ គឺជាគ្រឹះដ៏សំខាន់ ដើម្បីឱ្យពួកគេមានឱកាសរៀនសូត្រ និងស្វែងយល់ពីពិភពលោក ។
សូមបញ្ជាក់ថា ការផ្លាស់ប្តូរពី «ក្រុមហ៊ុនរថយន្ត» ទៅជា «ក្រុមហ៊ុនចល័តភាព» គឺផ្អែកលើចក្ខុវិស័យសកល «ការចល័តសម្រាប់ទាំងអស់គ្នា» (Mobility for All) ដែលជឿជាក់ថា ការធ្វើចលនា គឺជាសិទ្ធិជាមូលដ្ឋានរបស់មនុស្សគ្រប់រូប ។ ប្រើប្រាស់យុទ្ធនាការ “Start Your Impossible” ដើម្បីជួយឱ្យបុគ្គលម្នាក់ៗអាចសម្រេចបាននូវសក្តានុពលពេញលេញរបស់ខ្លួន តាមរយៈដំណោះស្រាយធ្វើដំណើរលើសពីការលក់រថយន្ត ។
ចំពោះការបណ្តុះបណ្តាលទេពកោសល្យ និងឧត្តមភាពបច្ចេកទេស គឺមានកម្មវិធីប្រកួតគំនូរ «រថយន្តក្នុងក្តីស្រមៃ» (Toyota Dream Car Art Contest) ដែលប្រារព្ធឡើងក្នុងឆ្នាំទី ១៩ នៅកម្ពុជា ដើម្បីផ្តល់វេទិកាដល់យុវជនបង្ហាញការច្នៃប្រឌិតលើឆាកអន្តរជាតិ ។
ដោយឡែកការអភិវឌ្ឍធនធានមនុស្ស (TVET) ក្រុមហ៊ុន តូយ៉ូតា ស៊ូសូ ម៉ានូហ្វេកឆឺរីង (ខេមបូឌា) សហការជាមួយស្ថាប័នបណ្តុះបណ្តាលបច្ចេកទេស និងវិជ្ជាជីវៈ ហើយបានផ្តល់ការងារក្នុងស្រុក ដែលបច្ចុប្បន្ន ៧៧% នៃកម្លាំងពលកម្មក្នុងរោងចក្រ គឺជាសិស្សដែលមកពីសាលាបច្ចេកទេស (TVET) ទាំងនេះ ដែលធានាថា ឧស្សាហកម្មជាតិត្រូវបានជំរុញដោយបុគ្គលិកមានជំនាញខ្ពស់ក្នុងស្រុក ។
គោលដៅក្នុងនាមជា «ម៉ាកយីហោជាតិ» ក្រុមហ៊ុន តូយ៉ូតា (ខេមបូឌា) ប្តេជ្ញាកសាងខ្លួនឱ្យក្លាយជាម៉ាកយីហោដែលរីកចម្រើនទន្ទឹមគ្នាជាមួយប្រជាជនកម្ពុជា និងវិនិយោគលើអនាគតយុវជនជានិរន្តរ៍ ៕ អត្ថបទសហការ
ចែករំលែកព័តមាននេះ