រាជធានីភ្នំពេញ ៖ តារាចម្រៀងអ្នកនាង សុភ័ក្ត្រ កុសុម៉ា និងស្វាមី បានសម្តែងក្តីរំភើបយ៉ាងខ្លាំង បន្ទាប់ពីអ្នកទាំងពីរបានទទួលដំណឹងថា នាងបាននឹងកំពុងពពោះជាថ្មីម្តងទៀត បន្ទាប់ពីរូបនាងជួបរឿងអកុសលដោយសារកូនដំបូងរបស់នាងមិនអាចរក្សាបាននៅគង់វង្សរហូតដល់សម្រាលតាមការកំណត់…
រាជធានីភ្នំពេញ ៖ តារាចម្រៀងអ្នកនាង សុភ័ក្ត្រ កុសុម៉ា និងស្វាមី បានសម្តែងក្តីរំភើបយ៉ាងខ្លាំង បន្ទាប់ពីអ្នកទាំងពីរបានទទួលដំណឹងថា នាងបាននឹងកំពុងពពោះជាថ្មីម្តងទៀត បន្ទាប់ពីរូបនាងជួបរឿងអកុសលដោយសារកូនដំបូងរបស់នាងមិនអាចរក្សាបាននៅគង់វង្សរហូតដល់សម្រាលតាមការកំណត់ ។
យ៉ាងណា ក្រោយទទួលដំណឹងពីការពពោះជាថ្មីម្តងទៀតនាពេលនេះ ក្រៅពីក្តីរីករាយសុភ័ក្ត្រ កុសុម៉ា ជឿថា កូនក្នុងផ្ទៃរបស់នាងនាពេលនេះ គឺជាកូនដំបូងដែលបានមកចាប់កំណើតជាមួយរូបនាងម្តងទៀត ក្រោយពីបាត់បង់ដោយភាពសោកស្តាយ ។ សុភ័ក្រ កុសុម៉ា បានបង្ហាញវីដេអូជាមួយស្វាមីបង្ហោះលើបណ្តាញសង្គម ដោយបានបង្ហាញនូវឧបករណ៍ពិនិត្យមើលផ្ទៃពោះ ដោយនៅក្នុងនោះអ្នកទាំងពីរបានសម្តែងក្តីរំភើប និងរីករាយយ៉ាងខ្លាំង ក្រោយការពិនិត្យបង្ហាញថា នាងកំពុងមានផ្ទៃពោះជាថ្មី ។
ជាមួយនឹងរូបភាពវីដេអូមួយនេះ កុសុម៉ា ក៏បានភ្ជាប់ជាមួយសំណេរថា គេមកហើយ បងប្អូនអើយកូនខ្ញុំគេមករកខ្ញុំវិញហើយ ។ តាមរយៈសំណេរខាងលើនេះ គេឃើញមហាជន អ្នកគាំទ្រ ជាពិសេស មិត្តភក្តិក្នុងសិល្បៈដូចគ្នាជាច្រើន បានចូលរួមសម្តែងការអបអរសាទរ និងជូនពររូបនាង និងកូនក្នុងផ្ទៃមានសុខភាពល្អ រហូតដល់ថ្ងៃសម្រាល ។
ចំណងដៃកូនដំបូងរបស់ សុភ័ក្ត្រ កុសុម៉ា នាពេលនេះ គឺជាក្តីប្រថ្នាចង់បានបំផុតសម្រាប់រូបនាង និងស្វាមី បន្ទាប់ពីអ្នកទាំងពីរបានរៀបមង្គលការ ហើយគេក៏រំពឹងថា ចំណងដៃកូនដំបូងនេះ ក៏កាន់តែធ្វើឲ្យចំណងអាពាហ៍ពិពាហ៍ជាប្តីប្រពន្ធរបស់ពួកគេកាន់តែមានភាពផ្អែមល្ហែម និងរឹងមាំបន្ថែមទៀតផងដែរ ។
គួរបញ្ជាក់ថា តារាចម្រៀងនាង សុភ័ក្ត្រ កុសុម៉ា បានសម្រក់ទឹកភ្នែកសម្តែងក្តីក្តុកក្តួល និងសោកស្តាយជាពន់ពេក បន្ទាប់ពីកូនដំបូងរបស់នាងបានបាត់បង់ទៅវិញ ដោយសារបញ្ហាសុខភាពនៅក្នុងផ្ទៃ ។
ចំពោះរឿងនេះ កុសុម៉ា ធ្លាប់បានបញ្ជាក់ថា កូនក្នុងផ្ទៃរបស់នាងបានលូតលាល់មិនគ្រប់លក្ខណៈ ពោលគឺមិនមានបេះដូងនោះឡើយ ក្នុងពេលដែលបញ្ហានេះ បានធ្វើនាងបាក់ទឹកចិត្តយ៉ាងខ្លាំង ព្រោះនេះជាកូនដំបូងរបស់នាងដែលបានចាប់កំណើត ក្រោយនាងរៀបការបានជាង១ឆ្នាំ ។
យ៉ាងណា ក្រោយទទួលដំណឹងនេះ គេឃើញមានមហាជន និងមិត្តភក្តិ សុភ័ក្ត្រ កុសុម៉ា ជាច្រើនបានចូលរួមសម្តែងការសោកស្តាយ និងបានលើកទឹកចិត្តរូបនាងឲ្យមានភាពរឹងមាំ ព្រោះនាង និងស្វាមី នៅមានឱកាសច្រើនទៀតសម្រាប់មានកូន ៕
ចែករំលែកព័តមាននេះ