រាជធានីភ្នំពេញ ៖ អ្នកបង្កករណីគ្រោះថ្នាក់ចរាចរណ៍ បណ្តាលឲ្យក្មេងប្រុសម្នាក់រងរបួសជាទម្ងន់ និងអ្នករួមដំណើរ បានលើកដៃប្រណម្យសំពះ និងក្រាបថ្វាយបង្គំក្បាលដល់ឥដ្ឋ សូមការអភ័យទោសពីប្រជាជនខ្មែរទាំងអស់ ដែលនេះគឺជាផ្នែកសីលធម៌ នៃការទទួលដឹងអំពីកំហុស…
រាជធានីភ្នំពេញ ៖ អ្នកបង្កករណីគ្រោះថ្នាក់ចរាចរណ៍ បណ្តាលឲ្យក្មេងប្រុសម្នាក់រងរបួសជាទម្ងន់ និងអ្នករួមដំណើរ បានលើកដៃប្រណម្យសំពះ និងក្រាបថ្វាយបង្គំក្បាលដល់ឥដ្ឋ សូមការអភ័យទោសពីប្រជាជនខ្មែរទាំងអស់ ដែលនេះគឺជាផ្នែកសីលធម៌ នៃការទទួលដឹងអំពីកំហុស របស់ពួកគេបានប្រព្រឹត្ត ។
ពាក្យពេជ និងខ្លឹមសារសុំទោសមាន ៖ “ខ្ញុំបាទឈ្មោះ សាមេន សុធារិទ្ធ ព្រឹត្តិការដែលកើតឡើងនៅប៉ុន្មានថ្ងៃមុននេះ ពិតជាមានការសោកស្តាយយ៉ាងខ្លាំង ដែលខ្ញុំបានហូបគ្រឿងស្រវឹងមិនចេះគិត បណ្តាលឲ្យគ្រប់គ្រងខ្លួនឯងមិនបាន បង្កប៉ះពាល់ពាក្យសម្ដីដល់បងប្អូនប្រជាពលរដ្ឋយ៉ាងខ្លាំង ខ្ញុំពិជាមានការសោកស្តាយយ៉ាងខ្លាំង ខ្ញុំបានប្រើពាក្យសម្ដីមិនសមរម្យ ទៅលើបងប្អូនប្រជាពលរដ្ឋ និងមហាជនទាំងអស់ ។ ជាចុងក្រោយ ខ្ញុំចង់សុំបងប្អូនទាំងអស់ លើកលែងទោសឲ្យខ្ញុំ ខ្ញុំសន្យាថា នឹងកែប្រែខ្លួនមិនឲ្យមានកំហុសឆ្គងជាលើកទី២ឡើយ ។ ហើយក៏ដូចជានាងខ្ញុំឈ្មោះ សុខ ច័ន្ទបូរមី ដែលបានបើកបរធ្វេសប្រហែសបង្កគ្រោះថ្នាក់ដល់ប្អូនប្រុស នាងខ្ញុំសូមអភ័យទោសដល់គ្រួសារជនរងគ្រោះ ព្រមទាំងបងប្អូនទាំងអស់គ្នា កុំយកគំរូតាមនាងខ្ញុំ ដែលបើកបរធ្វេសប្រហែស ដោយនាងខ្ញុំ ពិតជាគ្មានចេតនាក្នុងការធ្វើទេ ។ ពួកខ្ញុំមានតែម្រាមដៃដប់ លុតជង្គុងក្រោបបង្គំសុំពុកម៉ែទាំងអស់ សុំលើកលែងទោសឲ្យពួកខ្ញុំផង ។ ពួកខ្ញុំទាំងពីរ ពិតជាសុំទោសមែនទែន” ។
ប៉ុន្តែបើយោងតាមការបញ្ជាក់ពីលោកឧត្តមសេនីយ៍ទោ ហេង រតនា ស្នងការរង នៃស្នងការដ្ឋាននគរបាលរាជធានីភ្នំពេញ ទទួល បន្ទុក ផែនការងារនគរបាលចរាចរណ៍ លើបណ្តាញសង្គមរបស់លោកថា ៖ ទោះបីជាអ្នកទាំងពីរ លើកដៃសំទោសមហាជនទទួស ស្គាល់កំហុសយ៉ាងណាក្តី ក៏សមត្ថកិច្ចនៅតែបន្តកសាងសំណុំរឿងបញ្ជូនពួកគេទាំងពីរនាក់ ទៅសាលាដំបូងរាជធានីភ្នំពេញ តាមនីតិវិធី ។
ជាក់ស្តែងសំណុំរឿងខាងនេះ ត្រូវបានសមត្ថកិច្ចនគរបាលចរាចរណ៍ផ្លូវគោគរាជធានីភ្នំពេញ បញ្ជូនទៅដល់ស្ថាប័នអយ្យការអមសាលាដំបូងរាជធានីភ្នំពេញ នៅថ្ងៃទី២៣ ខែមីនា ឆ្នាំ២០២៦ ហើយត្រូវបានតំណាងអយ្យការ បើកការស៉ើបសួរតាមនីតិវិធី ។
សូមបញ្ជាក់ថា កាលពីយប់ថ្ងៃទី១៨ ខែមីនា ឆ្នាំ២០១៦ ស្ដ្រីម្នាក់ រួមជាមួយបុរស ដែលគេស្គាល់ថា ជាកូនអភិបាលស្រុកកងមាស ខេត្តកំពង់ចាម បានបើករថយន្ដបុកអ្នកធ្វើដំណើរតាមដងផ្លូវបណ្ដាលឲ្យរងរបួសធ្ងន់ ។ ក្រោយមកបុរស ដែលគេស្គាល់ថា ជាកូនអភិបាលស្រុកកងមាស កំពុងស្ថិតក្នុងស្ថានភាពស្រវឹងជោគជាំនោះ បានបោះសម្ដីថា “បើងាប់សង២ម៉ឺនដុល្លារអាមេរិក”ពេលឮសម្ដីភាគីខាងជនបង្កពោលដូច្នោះ ធ្វើឲ្យប្រជាពលរដ្ឋដែលនៅក្បែរកន្លែងកើតហេតុ តាមបណ្ដោយផ្លូវ លេខ១៧១១ ក្នុង សង្កាត់ គីឡូម៉ែត្រ លេខ៦ ខណ្ឌឫស្សីកែវ រាជធានីភ្នំពេញ មានការខឹងសម្បាគ្រប់គ្នា ។
រថយន្ដបង្កម៉ាក FORTHING ពាក់ផ្លាកលេខ កម្ពុជា P.YEAN.7 បានបើកបុកម៉ូតូមួយគ្រឿងម៉ាក HONDA TODAY ពាក់ផ្លាក លេខភ្នំពេញ 1J-4604 បណ្ដាលឲ្យក្មេងប្រុសម្នាក់រងរបួសធ្ងន់ បញ្ជូនទៅកាន់មន្ទីរពេទ្យ ។ ភ្លាមៗ នោះប្រជាពលរដ្ឋបានចោមរោមហាមឃាត់ មិនឲ្យសមត្ថកិច្ចនាំខ្លួនអ្នកបើកបររថយន្តទៅនគរបាលប៉ុស្តិ៍ទេ ដោយទុកឲ្យរង់ចាំក្រុមគ្រួសារជនរងគ្រោះមកដល់សិន តែបន្ទាប់មកសមត្ថកិច្ច ក៏បាននាំជនបង្កយកទៅ អនុត្តតាមនីតិវិធី ។
បន្ទាប់មកនៅថ្ងៃទី២១ ខែមីនា ឆ្នាំ២០២៦ ផេកហ្វេសប៊ុកផ្លូវការរបស់ស្នងការដ្ឋាននគរបាលរាជធានីភ្នំពេញ បានបង្ហាញកាមេរ៉ាសុវត្ថិភាព ដែលបញ្ជាក់ថា កូនអភិបាលស្រុកកងមាស ខេត្តកំពង់ចាម មិនមែនជាអ្នកបើករថយន្ដបង្កគ្រោះថ្នាក់ចរាចរណ៍នោះទេ ពោលអ្នកបើកបរគឺជាស្ដ្រីម្នាក់។ បើមើលតាមស្ថានភាពជាក់ស្ដែង គឺបុរសខាងលើមិនអាចបើករថយន្ដបានឡើយ ដោយសារតែស្ថានភាពស្រវឹងជោគជាំ ។
លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ក៏បានបញ្ជាក់ដែរថា ពេលចេញពីកន្លែងផឹកស៊ី មួយនៅខណ្ឌសែនសុខ គឺកូនអភិបាលស្រុក ត្រូវគេគ្រាដាក់ឡាន ហើយស្ត្រីទៅជាមួយគ្នា ជាអ្នកចូលបើកឡាន រួចបានបង្កគ្រោះថ្នាក់បុកក្មេងប្រុសបណ្តាលឲ្យរបួសធ្ងន់ នៅខណ្ឌឫស្សីកែវ កាលពីយប់ថ្ងៃទី១៨ ខែមីនា ឆ្នាំ២០២៦ នោះ ៕
ចែករំលែកព័តមាននេះ