រាជធានីភ្នំពេញ៖ កម្លាំងនគរបាលព្រហ្មទណ្ឌកម្រិតស្រាលនៃស្នងការនគរបាលរាជធានីភ្នំពេញ សហការជាមួយកម្លាំងអធិការដ្ឋានខណ្ឌពោធិ៍សែនជ័យ បានបើកប្រតិបត្តិការធ្វើការស្រាវជ្រាវករណីវាយប្លន់យកម៉ូតូពីនារីម្នាក់កាលពីពេលកន្លងមក ។
ក្រោយពីការស្រាវជ្រាវ នគរបាលកំណត់បានមុខសញ្ញាក្រុមចោរប្លន់ និងជួញដូរគ្រឿងញៀន ព្រមទាំងអ្នកទទួលផលចោរកម្ម១សម្បុក បន្ទាប់មកក៏បានចុះទៅធ្វើការឆ្មក់បង្ក្រាបនិងឃាត់ខ្លួនបានចំនួន៤នាក់ ព្រមទាំងដកហូតបានគ្រឿងញៀនចំនួនប្រមាណ២គីឡូក្រាមនិងវត្ថុតាងច្រើនទៀតផងដែរ ។
ហេតុការណ៍វាយប្លន់នោះបានកើតឡើងកាលពីវេលាម៉ោង០១និង៥៧នាទីយប់រំលងអាធ្រាត្រឈានចូលថ្ងៃទី១៧ ខែមីនា ឆ្នាំ២០២៦ នៅចណុចដីវាល ផ្លូវបេតុង ស្ថិតក្នុងភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យដែលត្រូវឃាត់ខ្លួននោះរួមមាន ១,ឈ្មោះ ភោគ សំណាង អាយុ២២ឆ្នាំ ជនជាតិខ្មែរ ស្នាក់នៅបន្ទប់ជួលគ្មានលេខ ផ្លូវលំ ភូមិកាកាប២ សង្កាត់កាកាបទី២ ខណ្ឌពោធិ៍សែនជ័យ ។ ២,ឈ្មោះ ណា ទិត្យ អាយុ២៥ឆ្នាំ ជនជាតិខ្មែរ ស្នាក់នៅបន្ទប់ជួលលេខ១១ ផ្លូវលំ ភូមិត្រពាំងជ្រៃ សង្កាត់កាកាប២ ខណ្ឌពោធិ៍សែនជ័យ ។ ៣,ឈ្មោះ ហៀប គន្ធា អាយុ៤៣ឆ្នាំ ជនជាតិខ្មែរ អ្នកទទួលផលចោរកម្ម ស្នាក់នៅផ្ទះលេខក៩ ផ្លូវបេតុង ភូមិអណ្តូង៦ សង្កាត់គោរកា ខណ្ឌព្រែកព្នៅ ។
៤,ឈ្មោះ ឆាយ រតនា អាយុ៣៣ឆ្នាំ ជនជាតិខ្មែរ ស្នាក់នៅផ្ទះលេខ៣៧ ផ្លូវលំ ភូមិអណ្តូងចាស់ សង្កាត់គោករកា ខណ្ឌព្រែកព្នៅ ។
នគរបាលបានប្រាប់ថា ក្រុមជនសង្ស័យបានធ្វើសកម្មភាពវាយប្លន់យកម៉ូតូ១គ្រឿងម៉ាក Honda Scoopy ផលិតឆ្នាំ២០២៥គ្មានស្លាកលេខ ពីស្ត្រីម្នាក់ឈ្មោះ ភិន ចាន់សេរី អាយុ៣៤ឆ្នាំ ជនជាតិខ្មែរ ។
ក្រោយពេលកើតហេតុលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាឱ្យកម្លាំងការិយាល័យនគរបាលព្រហ្មទណ្ឌកម្រិតស្រាល នៃស្នងការរាជធានីភ្នំពេញ ។ សហការជាមួយកម្លាំងអធិការដ្ឋាននគរបាលខណ្ឌពោធិ៍សែនជ័យ ធ្វើការស្រាវជ្រាវរហូតដល់វេលាម៉ោង១និង៨នាទី រសៀលថ្ងៃទី២០ ខែមីនា ឆ្នាំ ២០២៦ ក៏ឈានដល់ការឃាត់ខ្លួនជនសង្ស័យទាំង៤នាក់ខាងលើ នៅចំណុចបន្ទប់ជួលលេខ១០ ផ្លូវបេតុង ស្ថិតក្នុងភូមិកាកាប សង្កាត់កាកាបទី២ ខណ្ឌពោធិ៍សែនជ័យ ។
នគរបាលបានប្រាប់ទៀតថា នៅពេលឃាត់ខ្លួនជនសង្ស័យទាំង៤នាក់ខាងលើនោះ កម្លាំងនគរបាលរឹបអូសបានម្សៅក្រាមពណ៍សសង្ស័យគ្រឿងញៀនប្រមាណ២គីឡូក្រាម រួមទាំងម៉ូតូនិងម៉ូតូគ្រឿង ស្លាកលេខម៉ូតូច្រើនបន្ទះ កាំបិត ដាវ ញញួរ និងទូរស័ព្ទច្រើនគ្រឿងផងដែរ ។ បន្ទាប់មកបាននាំយកទៅសាកសួរនិងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់កាត់ការតាមនីតិវិធីច្បាប់៕
ចែករំលែកព័តមាននេះ