ខេត្តកំពង់ស្ពឺ ៖ ព្រោះតែប្រយោជន៍ផ្ទាល់ខ្លួនអ្នកវិនិយោគផ្សារកំពង់ស្ពឺថ្មីទើបដេញថ្លៃបានថ្មីៗ ហើយមកវិនិយោគនៅពេលថ្មីៗនេះ បានបញ្ជាឲ្យបុគ្គលិកនិងកូនចៅរបស់ខ្លួនយកផ្លូវសាធារណៈជុំវិញផ្សារកំពង់ស្ពឺធ្វើជាកន្លែងផ្ញើម៉ូតូបង្កឲ្យមានការកកស្ទះដល់ប្រជាពលរដ្ឋអ្នកធ្វើដំណើរជុំវិញផ្សារនេះ ។
ការយកផ្លូវសាធារណៈដាក់ផ្ញើម៉ូតូកង់ជុំវិញផ្សារកំពង់ស្ពឺពីសំណាក់អ្នកវិនិយោគផ្សារដែលទើបនិងដេញថ្លៃបាននេះត្រូវបានប្រជាពលរដ្ឋរិះគន់ថាព្រោះតែប្រយោជន៍របស់ខ្លួនបែជាយកផ្លូវសាធារណៈរបស់រដ្ឋដាក់ជាកន្លែងផ្ញើម៉ូតូសម្រាប់យកលុយដាក់ហោប៉ាវខ្លួនឯងទៅវិញ។ ដែលទង្វើរបស់អ្នកវិនិយោគផ្សារកំពង់ស្ពឺថ្មីដែលទើបដេញថ្លៃបាននេះហាក់បីដូចជាមិនគោរពទៅតាមគោលការណ៍នៃការដេញថ្លៃរបស់ជំនាញពាក់ព័ន្ធ។
ដោយសារតែកន្លងទៅអ្នកវិនិយោគផ្សារកំពង់ស្ពឺចាស់ដែលគេស្គាល់ថាក្រុមហ៊ុនរបស់លោកហោយាន ជាក្រុមហ៊ុនវិនិយោគតាមបណ្ដាផ្សារនានាមិនដែលមានការកកស្ទះក្នុងការធ្វើដំណើរជុំវិញផ្សារកំពង់ស្ពឺនេះទេ។ ប៉ុន្តែអ្នកវិនិយោគផ្សារកំពង់ស្ពឺថ្មីនេះហាក់បីដូចជា លោភលន់ មានអំណាចខ្លាំងណាស់ ព្រោះតែប្រយោជន៍ផ្ទាល់ខ្លួន មិនគិតពីផលប្រយោជន៍សាធារណៈរបស់រដ្ឋនោះទេបែរជាយកផ្លូវសាធារណៈរបស់រដ្ឋនៅជុំវិញផ្សារកំពង់ស្ពឺធ្វើជាកន្លែងផ្ញើម៉ូតូយកលុយដាក់ហោប៉ាវយ៉ាងរំភើយទៅវិញ។
ប្រជាពលរដ្ឋក៏ដូចជាអ្នកមកផ្សារទិញម្ហូបធ្វើការសំណូមពរដល់អាជ្ញាធរនិងជំនាញពាក់ព័ន្ធ ជាពិសេសសណ្ដាប់ធ្នាប់ក្រុងច្បារមននិងខេត្តកំពង់ស្ពឺមេត្តាជួយពិនិត្យអន្តរាគមន៍រឿងអ្នកវិនិយោគផ្សារកំពង់ស្ពឺថ្មីនេះ។ដែលយកផ្លូវសាធារណៈរបស់រដ្ឋធ្វើជាកន្លែងផ្ញើម៉ូតូធ្វើឱ្យស្ទះចរាចរណ៍ស្ទើរតែជារៀងរាល់ថ្ងៃ។
ជាពិសេសគឺថ្ងៃសៅរ៍និងថ្ងៃអាទិត្យចុងសប្តាហ៍មានប្រជាពលរដ្ឋជាច្រើនមកទិញអីវ៉ាន់នៅផ្សារកំពង់ស្ពឺហើយធ្វើដំណើរមានការកកស្ទះមិនគោរពច្បាប់ចរាចរណ៍នោះទេក៏ព្រោះតែផ្លូវសាធារណៈរបស់រដ្ឋត្រូវបានក្រុមវិនិយោគផ្សារកំពង់ស្ពឺបានយកធ្វើជាកន្លែងផ្ញើម៉ូតូបាត់ទៅហើយ។
ពាក់ព័ន្ធនិងការលើកឡើងរបស់ប្រជាពលរដ្ឋខាងលើនេះអ្នកយកព័ត៌មានយើងមិនអាចសុំការពន្យល់ពីអ្នកវិនិយោគផ្សារកំពង់ស្ពឺថ្មីដែលទើបនឹងដេញថ្លៃបាននោះទេដោយសារតែមិនមានលេខទូរស័ព្ទធ្វើការសួរនាំនោះទេ។
មិនទាន់ដឹងថាតើប្រធានមន្ទីរហិរញ្ញវត្ថុខេត្តជួយបិទភ្នែកយ៉ាងណានៅឡើយទេ ។
ប្រសិនបើមានប្រតិកម្មបែបណាមួយនោះ យើងនឹងផ្សាយជូននៅពេលក្រោយទៀត។
ព័ត៌មានបន្តនឹងមានផ្សាយនៅលើកាសែតកោះសន្តិភាព ៕
ចែករំលែកព័តមាននេះ