រាជធានីភ្នំពេញ ៖ ធ្លាយឧស្ម័នអាម៉ូញ៉ាក់ចេញពីរោងចក្រផលិតទឹកកកមួយកន្លែង ផ្អើលប្រជាពលរដ្ឋរាយការណ៍ជូនសមត្ថកិច្ចជំនាញពន្លត់អគ្គីភ័យអន្តរាគមន៍ទប់ស្កាត់ កាលពីវេលាម៉ោង៨និង៣០នាទីយប់ ថ្ងៃទី២២ ខែមីនា ឆ្នាំ២០២៦ នៅចំនុចសិប្បកម្មផលិតទឹកកកខ្នាតតូចមួយកន្លែង ស្ថិតនៅផ្លូវលេខ៩០៧…
រាជធានីភ្នំពេញ ៖ ធ្លាយឧស្ម័នអាម៉ូញ៉ាក់ចេញពីរោងចក្រផលិតទឹកកកមួយកន្លែង ផ្អើលប្រជាពលរដ្ឋរាយការណ៍ជូនសមត្ថកិច្ចជំនាញពន្លត់អគ្គីភ័យអន្តរាគមន៍ទប់ស្កាត់ កាលពីវេលាម៉ោង៨និង៣០នាទីយប់ ថ្ងៃទី២២ ខែមីនា ឆ្នាំ២០២៦ នៅចំនុចសិប្បកម្មផលិតទឹកកកខ្នាតតូចមួយកន្លែង ស្ថិតនៅផ្លូវលេខ៩០៧ ក្រុមទី៥ ភូមិចុងខ្សាច់ សង្កាត់ទួលសង្កែទី១ ខណ្ឌឬស្សីកែវ រាជធានីភ្នំពេញ ។
អាជ្ញាធរអោយដឹងថា នៅយប់ថ្ងៃកើតហេតុ មានករណីធ្លាយឧស្ម័នអាម៉ូញ៉ាក់ចេញពីរោងចក្រផលិតទឹកកកខាងលើ ដែលធ្វើឲ្យប៉ះពាល់ដល់ពលរដ្ឋរស់នៅក្បែរនោះ ពិបាកបញ្ហាផ្លូវដង្ហើម ដូច្នេះហើយ ទើបពលរដ្ឋនៅក្បែរនោះបានរាយការណ៍ជូនកម្លាំងអាជ្ញាធរនិងសមត្ថកិច្ចមូលដ្ឋាន ដើម្បីអោយកម្លាំងជំនាញពាក់ព័ន្ធជួយអន្តរាគមន៍ទប់ស្កាត់ផងដែរ ។
បន្ទាប់ពីទទួលបានពត៌មានខាងលើភ្លាម អាជ្ញាធរបានបញ្ជាអោយក្រុមការងារប្រចាំបញ្ជារបស់រដ្ឋបាលខណ្ឌ និងមន្ដ្រីសង្កាត់ទួលសង្កែទី១ កម្លាំងភូមិ សហការជាមួយកម្លាំងជំនាញនៃការិយាល័យបង្ការពន្លត់អគ្គិភ័យ និងសង្គ្រោះស្នងការដ្ឋាននគរបាលរាជធានីភ្នំពេញ បានចុះអន្តរាគមន៍ទប់ស្កាត់ការសាយភាយឧស្ម័ននេះមិនអោយមានរីករាលដាលបន្តឡើយ។
កម្លាំងអន្តរាគមន៍បានប្រើប្រាស់រថយន្តបាញ់ទឹក រថយន្តប៉ូមខ្យល់ និងកំពុងបន្តប្រើប្រាស់គ្រប់ជំនាញដើម្បីអន្ដរាគមន៍ ទប់ស្កាត់មិនអោយរាល់ដាលបន្តឡើយ។
ជាមួយគ្នានេះដែរ កម្លាំងអាជ្ញាធរមូលដ្ឋានខណ្ឌ សង្កាត់ បានណែនាំដល់ម្ចាស់ទីតាំងសិប្បកម្មខាងលើអោយធ្វើការតាមដានលើប្រព័ន្ធស្តុក និងបំពង់បង្ហូរឧស្ម័នអាម៉ូញាក់ នៅក្នុងទីតាំងរោងចក្រផលិតទឹកកកជាប្រចាំ ដើម្បីចៀសវាងបង្កបញ្ហាលេចធ្លាយសារធាតុអាម៉ូញាក់ជាលើកទី២ទៀត ដែលអាចបង្កគ្រោះថ្នាក់ ឬប៉ះពាល់ដល់សុខុមាលភាពរបស់ បងប្អូនប្រជាពលរដ្ឋ ដែលរស់នៅជិតទីតាំងនេះផងដែរ ៕
ចែករំលែកព័តមាននេះ