ខេត្តកំពង់ចាម ៖ នៅទីបំផុត មន្ទីរវប្បធម៌ខេត្តកំពង់ចាមបានហៅក្រុមតន្ត្រីបុរាណមួយដែលសម្តែងខុសសីលធម៌ និងប្រពៃណីបុរាណខ្មែរនៅក្នុងពិធីកាត់សក់នៃមង្គលការមួយដែលរងការរិះគន់នោះយកមកអប់រំ កែប្រែ និងឲ្យបញ្ឈប់នូវរាល់ការសម្តែងដែលមានភាពខុសឆ្គងបែបនេះបន្តទៀត ។ បើតាមការបញ្ជាក់ពីផេកហ្វេសប៊ុករបស់មន្ទីរវប្បធម៌ខេត្តកំពង់ចាមបានឲ្យដឹងថា ថ្ងៃទី១៨…
ខេត្តកំពង់ចាម ៖ នៅទីបំផុត មន្ទីរវប្បធម៌ខេត្តកំពង់ចាមបានហៅក្រុមតន្ត្រីបុរាណមួយដែលសម្តែងខុសសីលធម៌ និងប្រពៃណីបុរាណខ្មែរនៅក្នុងពិធីកាត់សក់នៃមង្គលការមួយដែលរងការរិះគន់នោះយកមកអប់រំ កែប្រែ និងឲ្យបញ្ឈប់នូវរាល់ការសម្តែងដែលមានភាពខុសឆ្គងបែបនេះ
បន្តទៀត ។
បើតាមការបញ្ជាក់ពីផេកហ្វេសប៊ុករបស់មន្ទីរវប្បធម៌ខេត្តកំពង់ចាមបានឲ្យដឹងថា ថ្ងៃទី១៨ ខែមីនា ឆ្នាំ២០២៦ លោក សឹង ភារុំ ប្រធានមន្ទីរបានដឹកនាំក្រុមការងារមន្ទីរវប្បធម៌ និងវិចិត្រសិល្បៈខេត្តកំពង់ចាម ចុះណែនាំបញ្ឈប់រាល់ការសម្តែង ដែលប៉ះពាល់ដល់ប្រពៃណីទំនៀមទម្លាប់ខ្មែរ ដល់ក្រុមតន្ត្រីបុរាណ ដែលសម្តែងខុសក្រមសីលធម៌ ប្រពៃណី នៅស្រុកស្ទឹងត្រង់ ខេត្តកំពង់ចាម ។
ក្នុងកិច្ចប្រជុំអប់រំណែនាំនោះ មន្ទីរវប្បធម៌ខេត្តក៏បានឲ្យប្រធានក្រុមដែលបានសម្តែងខុសក្រមសីលធម៌នោះ ធ្វើលិខិតសុំទោស និងទទួលកំហុសជាសាធារណៈផងដែរ ដោយនៅក្នុងនោះសាម៉ីខ្លួនក៏បានសន្យានឹងមិនឲ្យមានកាយវិកាសម្តែងបែបនេះជាលើកទី២នោះឡើយ ។
នៅក្នុងលិខិតខាងលើនេះបានបញ្ជាក់ថា ខ្ញុំបាទឈ្មោះ អន សារឿន ជាប្រធានក្រុមភ្លេងប្រពៃណីខ្មែរ នាយស្វិត ដែលស្ថិតនៅភូមិគីឡូលេខ៣ ឃុំព្រែកកក់ ស្រុកស្ទឹងត្រង់ ខេត្តកំពង់ចាម សូមគោរព និងសុំទោសទៅកាន់បងប្អូនខ្មែរជាសាធារណៈ ។
ដោយខ្ញុំបាទ បានប្រព្រឹត្តកំហុសនៅក្នុងការសម្តែងពិធីកាត់សក់ នៃកម្មវិធីអាពាហ៍ពិពាហ៍នៅភូមិអារក្សត្នោត ឃុំអារក្សត្នោត ស្រុកស្ទឹងត្រង់ ខេត្តកំពង់ចាម នាថ្ងៃទី១៣ ខែមីនា ឆ្នាំ២០២៦ បានធ្វើឲ្យប៉ះពាល់ទៅដល់វប្បធម៌ ប្រពៃណីខ្មែរ ។ ខ្ញុំសូមទទួលកំហុស ដោយកាយវិការ និងសម្លៀកបំពាក់មិនសមរម្យក្នុងការសម្តែងកម្មវិធីខាងលើ ដល់មន្ទីរវប្បធម៌និងវិចិត្រសិល្បៈខេត្តកំពង់ចាម។
ខ្ញុំបាទ សូមគោរពសុំការអភ័យទោស និងសុំសន្យាថា មិនឲ្យមានកាយវិការនេះជាលើកទី២នេះទៀតឡើយ សូមបងប្អូនមេត្តាយោគយល់ និងអនុគ្រោះ និងអភ័យទោសដល់រូបខ្ញុំបាទបង ។
គួរបញ្ជាក់ថា រូបភាពបង្ហាញពីសកម្មភាពវង់ភ្លេងខ្មែរ មួយដែលមានតួអង្គ សម្តែងមិនសមរម្យ និងតាមក្បួនខ្នាតនៃក្នុងពិធីកាត់សក់បង្កក់សិរីនៅក្នុងពិធីមង្គការមួយបានរងការរិះគន់យ៉ាងខ្លាំងពីសំណាក់មហាជន ជាពិសេស បណ្តាអ្នកលេងបណ្តាញសង្គម ។
តាមរយៈរូបភាពដែលបានបង្ហោះលើបណ្តាញសង្គមបង្ហាញពីសកម្មភាពតួអង្គបុរសម្នាក់បានសម្តែងរហូតស្រាតខោរបស់ខ្លួន ដើម្បីឲ្យឃើញខោទឹកនោមដែលខ្លួនកំពុងស្លៀកនៅខាងក្នុង ក្នុងន័យចង់អោយអ្នកទស្សនាសើចសប្បាយ ប៉ុន្តែរងការស្តីបន្ទោសយ៉ាងខ្លាំងពីមហាជន ។ ជាមួយនឹងការរិះគន់ខាងលើនេះ មហាជនក៏បានធ្វើការស្នើសុំទៅកាន់ភាគីពាក់ព័ន្ធអោយចាត់វិធានការ និងហៅវង់ភ្លេងខ្មែរ និងតួអង្គសម្តែងនេះយកមកអប់រំកែប្រែនូវកំហុសដែលធ្វើនាពេលនេះផង
ដែរ ៕
ចែករំលែកព័តមាននេះ