សង្គ្រាមអ៉ីរ៉ង ៖ បណ្ដាប្រភពផ្លូវការកាតារាយការណ៍ថា អ៉ីរ៉ង់បានវាយប្រហារ កាលពីថ្ងៃទី១៨ មីនាទីតាំងឧស្ម័នសំខាន់មួយនៅកាតា បណ្ដាលឲ្យមានការឆាបឆេះ និងការខូចខាតធ្ងន់ធ្ងរ ។ ការវាយប្រហារនោះកើតមានពេលដែលអ៉ីរ៉ង់ព្រមាននាពេលមុននេះ…
សង្គ្រាមអ៉ីរ៉ង ៖ បណ្ដាប្រភពផ្លូវការកាតារាយការណ៍ថា អ៉ីរ៉ង់បានវាយប្រហារ កាលពីថ្ងៃទី១៨ មីនាទីតាំងឧស្ម័នសំខាន់មួយនៅកាតា បណ្ដាលឲ្យមានការឆាបឆេះ និងការខូចខាតធ្ងន់ធ្ងរ ។ ការវាយប្រហារនោះកើតមានពេលដែលអ៉ីរ៉ង់ព្រមាននាពេលមុននេះ ក្នុងថ្ងៃទី១៨ មីនា ដែរថា នឹងជ្រើសរើសយកបណ្ដាទីតាំងប្រេង និងឧស្ម័នរបស់បណ្ដាប្រទេសក្នុងតំបន់ ជាគោលដៅវាយប្រហារសងសឹក ចំពោះការវាយប្រហាររបស់អាមេរិក និងអ៉ីស្រាអែលលើបណ្ដាទីតាំងថាមពលរបស់ខ្លួន ។
ក្នុងសេចក្ដីប្រកាសមួយក្រុមហ៊ុនថាមពលរដ្ឋកាតា គឺក្រុមហ៊ុន QATARENERGY រៀបរាប់ថា ទីតាំងឧស្ម័នRAS LAFFAN ជាគោលដៅនៃការវាយប្រហារដោយមីស៊ីលអ៉ីរ៉ង់ កាលពីយប់ថ្ងៃទី១៨
មីនា ។ បណ្ដាក្រុមអន្តរាគមន៍បន្ទាន់ត្រូវបានបញ្ជូនមកភ្លាមៗ ដើម្បីពន្លត់ភ្លើងដែលឆាបឆេះខ្លាំង បណ្ដាលឲ្យមានការខូចខាតធ្ងន់ធ្ងរ ។ ក្រុមហ៊ុននោះបញ្ជាក់ថា ពុំមានសេចក្ដីរាយការណ៍ពីជនរងគ្រោះឡើយ ។ ភ្លើងបានឆាបឆេះខ្លាំងនៅទីតាំងឧស្ម័ននោះ នាំឲ្យផ្ទៃមេឃមានពណ៌ក្រហមស្រាល់ ដែលគេអាចមើលឃើញក្នុងរង្វង់៣០គីឡូម៉ែត្រ ។
ក្រសួងការបរទេសកាតាបានថ្កោលទោសថា នោះជាការវាយប្រហារដ៏សាហាវរបស់អ៉ីរ៉ង់ប្រឆាំងតំបន់ឧស្សាហកម្ម RAS LAFFAN ដោយថា នោះជាការបង្កើនដោយគ្រោះថ្នាក់ ការរំលោភបំពានជាក់ស្ដែង លើអធិបតេយ្យភាពរបស់ខ្លួន និងជាការគំរាមកំហែងដោយផ្ទាល់ដល់សន្តិសុខជាតិ
កាតា ។ បន្ទាប់មក កាតាបានបញ្ជាបណ្ដេញអ្នកការទូតអ៉ីរ៉់ង់២នាក់ និងក្រុមរបស់ពួកគេឲ្យចាកចេញពីប្រទេស ។
ក្រសួងការពារប្រទេសកាតាបញ្ជាក់ថា ប្រព័ន្ធការពារអាកាស បានស្ទាក់កម្ទេចមីស៊ីលបាលីស្ទិក
អ៉ីរ៉ង់២គ្រាប់ ដែលបាញ់សំដៅតំបន់ឧស្សាហកម្មRAS LAFFAN ដោយមិនបណ្ដាលឲ្យមានជនរងគ្រោះឡើយ ហើយផ្នែកការពាស៊ីវិលរាយការណ៍ថា ភ្លើងដែលឆេះពេលនេះអាចគ្រប់គ្រងបានហើយ។
ការវាយប្រហារនេះ កើតមានប៉ុន្មានម៉ោងបន្ទាប់ពីការវាយប្រហារដែលអ៉ីរ៉ង់ ចាត់ទុកថា ជាស្នាដៃអ៉ីស្រាអែល លើបណ្ដាទីតាំងស្ថិតក្នុងចម្ការឧស្ម័នដ៏ធំ SOUTH PARS/NORTH DOME ដែលរកស៊ីចូលហ៊ុនគ្នារវាងអ៉ីរ៉ង់ និងកាតា។
ក្នុងសេចក្ដីប្រកាសមួយកងឆ្មាំបដិវត្តន៍អ៉ីរ៉ង់ បានគំរាមអាមេរិក និងអ៉ីស្រាអែលថា នឹងកម្ទេចរាល់ហេដ្ឋារចនាសម្ព័ន្ធថាមពលក្នុងតំបន់ឈូងសមុទ្រពែរ្ស៍ ហើយការតបតមួយនឹងពិតជាធ្ងន់ធ្ងរ
បំផុត ៕
ចែករំលែកព័តមាននេះ