សង្គ្រាមអ៊ុយក្រែន ៖ ប្រធានាធិបតីអ៊ុយក្រែន លោកវូឡូឌីមៀរហ្សេឡេនស្គីអះអាងតាមបណ្ដាញសង្គមX កាលពីថ្ងៃទី១៧ មីនា ថា រុស្ស៊ីបានប្រមូលកងទាហានរវាងពី៤០.០០០ទៅ៤៥.០០០នាក់ក្នុង១ខែៗ ក្នុងក្របខណ្ឌនៃការលុកលុយអ៊ុយក្រែន ។…
សង្គ្រាមអ៊ុយក្រែន ៖ ប្រធានាធិបតីអ៊ុយក្រែន លោកវូឡូឌីមៀរហ្សេឡេនស្គីអះអាងតាមបណ្ដាញសង្គមX កាលពីថ្ងៃទី១៧ មីនា ថា រុស្ស៊ីបានប្រមូលកងទាហានរវាងពី៤០.០០០ទៅ៤៥.០០០នាក់ក្នុង១ខែៗ ក្នុងក្របខណ្ឌនៃការលុកលុយអ៊ុយក្រែន ។ លោកថា យើងត្រូវសម្លាប់ទាហានរុស្ស៊ី ក្នុងចំនួនប្រហាក់ប្រហែលគ្នានោះដែរ ដើម្បីកុំឲ្យកងទ័ពរុស្ស៊ីពង្រីកខ្លួនបាន ។
លោកបន្តថា យើងត្រូវកម្ចាត់ទាហានទាំងនេះ ដើម្បីកុំឲ្យរុស្ស៊ីអាចពង្រីកខ្លួនបាន ។ លោកហ្សេឡេនស្គីគូសបញ្ជាក់ទៀតថា កងទ័ពលោកបានសម្លាបទាហានរុស្ស៊ីរយៈពេល៣ខែចុងក្រោយនេះ ក្នុងខែទីមួយ៣០.០០០នាក់ ខែទី២ចំនួន៣៥.០០០នាក់ និងខែទី៣ចំនួន២៨.០០០នាក់។ បែបនេះ មានន័យថា ក្នុង៣ខែនោះ ទាហានរុស្ស៊ីសរុបជិត១០០.០០០នាក់ ត្រូវសម្លាប់។ តាំងពីចាប់ផ្ដើមសង្គ្រាមនៅអ៊ុយក្រែន ពីខែកុម្ភៈ ឆ្នាំ២០២២ មក ទាហានច្រើនរយពាន់នាក់ ត្រូវស្លាប់ទាំងសងខាង និងនាំឲ្យមានជនភៀសខ្លួនអ៊ុយក្រែនច្រើនលាននាក់ ។
កាលពីថ្ងៃទី១៦ មីនា មនុស្សច្រើនសិបនាក់បានត្រូវស្លាប់នៅតំបន់ហ្សាប៉ូរីហ្ស៊ីយ៉ា និងតំបន់ឌីនីប្រូប៉េត្រូវស្ក៍ ។ បណ្ដាបំណែកដ្រូនក៏ធ្លាក់ដែរនៅកណ្ដាលក្រុងគៀវ។ ប្រធានាធិបតីអ៊ុយក្រែនអះអាងតាមបណ្ដាញសង្គមកាលពីថ្ងៃទី១៧ មីនា ថា រុស្ស៊ីពេលនេះ បានកាត់បន្ថយការផលិតមីស៊ីល ហើយប្រមូលប្រាក់មកបង្កើនផលិតកម្មដ្រូនវិញ ។ លោកថា នាពេលបច្ចុប្បន្នរុស្ស៊ីបានងាកមកប្រើដ្រូនក្នុង១ថ្ងៃរវាងពី៣៥០ ទៅ៥០០គ្រឿងក្នុង១ថ្ងៃដើម្បីវាយប្រហារអ៊ុយក្រែន ហើយគ្រោងប្រើ
ដ្រូនក្នុងថ្ងៃពី៦០០គ្រឿងទៅ៨០០គ្រឿងក្នុង១ថ្ងៃក្នុងឆ្នាំ២០២៦ ទោះបីទិសដៅខ្លួនគ្រោងប្រើដល់១០០០គ្រឿងក្នុង១ថ្ងៃក្ដី ។
លោកហ្សេឡេស្គីបន្តថា ចំនួននោះត្រូវតែបាញ់ទម្លាក់ដោយដ្រូនស្ទាក់កម្ទេច ដូច្នេះ គេត្រូវការដ្រូនស្ទាក់កម្ទេចយ៉ាងតិចពី២០០០ ទៅ៣០០០គ្រឿងក្នុង១ថ្ងៃដែរ។ ដ្រូនស្ទាក់កម្ទេចត្រូវបានអ៊ុយក្រែនផលិតបានរយៈពេលប៉ុន្មានឆ្នាំចុងក្រោយនេះ ហើយដ្រូនទាំងនោះផលិតសម្រាប់បុក និងកម្ទេចបណ្ដាដ្រូនរយៈឆ្ងាយដូចជាដ្រូនរបស់អ៉ីរ៉ង់ជាដើម ។ សង្គ្រាមនៅអ៊ុយក្រែនពេលនេះហាក់ដូចជាលេបបាត់ដោយសារសង្គ្រាមនៅមជ្ឈឹមបូព៌ា ៕
ចែករំលែកព័តមាននេះ