ទីក្រុងតេអេរ៉ង់៖ នៅទីបំផុត អ៊ីរ៉ង់ប្រកាសទទួលស្គាល់ថារដ្ឋមន្ត្រីក្រសួងស៊ើបការណ៍សម្ងាត់របស់ខ្លួនពិតជាបានស្លាប់នៅក្នុងការវាយប្រហារកាលពីយប់ថ្ងៃអង្គារឆ្លងចូលថ្ងៃពុធពិតប្រាកដដូចអ៊ីស្រាអែលប្រកាសមែន។ រដ្ឋមន្ត្រីអ៊ីរ៉ង់ លោកអេស្មាអ៊ីល ខាធីប (Esmail Khatib) ត្រូវបានតែងតាំងជារដ្ឋមន្ត្រីក្រសួងស៊ើបការណ៍សម្ងាត់កាលពីឆ្នាំ២០២១ដោយអតីតប្រធានាធិបតីអ៊ីរ៉ង់ លោកអេប្រាហ៊ីម រ៉ៃស៊ី (Ebrahim Raisi) (លោករ៉ៃស៊ីបានទទួលអនិច្ចកម្មនៅក្នុងឧបទ្ទវហេតុធ្លាក់ឧទ្ធម្ភាគចក្រតាំងពីឆ្នាំ២០២៤)។
ប្រធានាធិបតីអ៊ីរ៉ង់បច្ចុប្បន្ន លោកម៉ាស៊ុត ប៉េហ្សេស្កៀន (Masoud Pezeshkian) ទទួលស្គាល់ពីការស្លាប់របស់លោកអេស្មាអ៊ីល ខាធីប (Esmail Khatib)។ ហេតុការណ៍ស្លាប់នេះកើតឡើងត្រឹមតែមួយថ្ងៃប៉ុណ្ណោះបន្ទាប់ពីមន្ត្រីជាន់ខ្ពស់ផ្នែកសន្តិសុខ និងការពារជាតិរបស់អ៊ីរ៉ង់ក៏ត្រូវបានអ៊ីស្រាអែលធ្វើឃាតផងដែរ។ ដូច្នេះ គិតទាំងមុនទាំងក្រោយ មន្ត្រីជាន់ខ្ពស់អ៊ីរ៉ង់បីនាក់ហើយបានស្លាប់ត្រឹមតែរយៈពេល២ថ្ងៃប៉ុណ្ណោះ។ អ៊ីស្រាអែលទំនងជាមិនទាន់បញ្ឈប់សកម្មភាពត្រឹមនេះទេ។
យោធាអ៊ីស្រាអែលដាក់ផែនការតាមធ្វើឃាតមេដឹកនាំកំពូលថ្មីរបស់អ៊ីរ៉ង់ លោកម៉ុចតាបា ខាមេនី ថែមទៀត (Mojtaba Khamenei)។ មែនទែនទៅ គេមិនដែលបានឃើញ ឬស្ដាប់ឮសំឡេងរបស់មេដឹកនាំរូបនេះម្ដងណាទេ ហើយក៏មិនដឹងថាតើគាត់មានសុខទុក្ខយ៉ាងណានោះដែរ។ ប្រភពខ្លះថាគាត់ត្រូវរបួសធ្ងន់ និងសន្លប់បាត់ស្មារតីជារៀងរហូត។ លោកអេស្មាអ៊ីល ខាធីប (Esmail Khatib) ដែលទើបតែស្លាប់ថ្មីៗនេះគឺជាបព្វជិតម្នាក់ និងជាសម្ព័ន្ធមិត្តដ៏ជិតស្និទ្ធរបស់អតីតមេដឹកនាំកំពូលអ៊ីរ៉ង់ លោកអាយ៉ាតូឡា អាលី ខាមេនី (Ayatollah Ali Khamenei)។
កាលពីមុនឡើងកាន់តំណែងជារដ្ឋមន្ត្រីផ្នែកស៊ើបការណ៍សម្ងាត់ លោកអេស្មាអ៊ីល ខាធីប (Esmail Khatib) ធ្លាប់មានមុខតំណែងធំៗនៅក្នុងវិស័យស៊ើបការណ៍សម្ងាត់ និងយុត្តិធម៌។ តាមមើលទៅ អ៊ីស្រាអែលប្រហែលជាមិនត្រូវការដូររបបដឹកនាំនៅអ៊ីរ៉ង់ទេ ប៉ុន្តែតាមកម្ចាត់មន្ត្រីកំពូលៗរបស់អ៊ីរ៉ង់ឱ្យអស់តែម្ដង។ រដ្ឋមន្ត្រីការពារជាតិអ៊ីស្រាអែលថ្លែងថាលោក និងលោកណឺតាន់យ៉ាហ៊ូសម្រេចផ្ដល់សិទ្ធិពិសេសទៅពួកយោធា (អ៊ីស្រាអែល) ដើម្បីតាមកម្ចាត់មន្ត្រីជាន់ខ្ពស់អ៊ីរ៉ង់ដែលស្ថិតនៅក្នុងបញ្ជីខ្មៅរបស់អ៊ីស្រាអែលដោយមិនចាំបាច់រង់ចាំការអនុម័តពីថ្នាក់លើទេ៕ ប្រភព៖ អេភី (AP), ប៊ីប៊ីស៊ី (BBC) និងប្រភពដទៃទៀត
ចែករំលែកព័តមាននេះ