ទីក្រុងវៀងចន្ទន៍៖ មនុស្សតម្រង់ជួរគ្នាយ៉ាងវែងអន្លាយដើម្បីរង់ចាំចាក់សាំងនៅតាមស្ថានីយប្រេងឥន្ធនៈនានាទូទាំងរដ្ឋធានីវៀងចន្ទន៍ ប្រទេសឡាវ។ ទិដ្ឋភាពនេះកើតឡើងចំពេលដែលប្រេងឥន្ធនៈកាន់តែរលស់អស់ពីក្នុងស្តុក។ ទន្ទឹមនឹងនោះ សង្គ្រាមនៅមជ្ឈិមបូព៌ាបន្តឆាបឆេះមិនទាន់ដឹងថានឹងរលត់ទៅវិញនៅពេលណាពិតប្រាកដឡើយ។ សព្វថ្ងៃនេះ ប្រទេសឡាវពឹងផ្អែកខ្លាំងទៅលើការនាំចូលប្រេងពីប្រទេសថៃ។ និយាយឱ្យចំទៅនាំចូលពីថៃសឹងតែ១០០%បាត់ទៅហើយ។
ប៉ុន្តែថៃរកប្រេងប្រើមិនសូវគ្រប់គ្រាន់ខ្លួនឯងដែរ។ ដូចនេះ ពីដំបូងដៃ ថៃប្រកាសផ្អាកនាំចេញប្រេង។ ប៉ុន្តែក្រោយមក ថៃចេញមុខធានាអះអាងថាប្រេងនឹងបន្តដឹកទៅផ្គត់ផ្គង់ជាហូរហែឱ្យប្រទេសឡាវ។ កាលពីសប្ដាហ៍មុន នៅក្នុងចំណោមស្ថានីយប្រេងឥន្ធនៈទាំង២៥៣៨កន្លែងទូទាំងប្រទេសឡាវ ៤០%បានបិទទ្វារ។ នេះបើយោងតាមរបាយការណ៍របស់រដ្ឋាភិបាលដែលធ្វើបច្ចុប្បន្នភាពចុងក្រោយ។
គេឃើញថាស្ថានីយប្រេងជាង១៥កន្លែងត្រូវបិទទ្វារកាលពីថ្ងៃចន្ទ។ ពួកគេព្យួរផ្លាកនៅមុខស្ថានីយថា «អស់ប្រេងសម្រាប់លក់ហើយ»។ ស្ថានីយប្រេងដទៃទៀតបើទុកជាមានប្រេងសម្រាប់លក់ក៏មានតិចតួចប៉ុណ្ណោះ។ ជនជាតិឡាវម្នាក់ឈ្មោះវត្តវិស័យ ផែងវិស័យ អាយុ២៩ឆ្នាំ រស់នៅទីក្រុងវៀងចន្ទន៍ ប្រាប់ថាស្ថានីយប្រេង៣កន្លែងដែលស្ថិតនៅក្នុងរយៈចម្ងាយ៥គីឡូម៉ែត្រពីផ្ទះរបស់គាត់អស់ប្រេងរលីងពីក្នុងស្តុក។
គាត់ប្រាប់អាអែហ្វប៉េ (AFP) ថាជួនកាល យើងមានប្រាក់សម្រាប់ចាក់សាំង ប៉ុន្តែគ្មានសាំងសម្រាប់ចាក់។ ក្នុងនាមជាគ្រូបង្រៀន ពេលខ្លះគាត់ត្រូវធ្វើការលើសម៉ោង។ ដូចនេះត្រូវការសាំងសម្រាប់ធ្វើដំណើរផ្លូវឆ្ងាយ។ ចំណែកស្ថានីយដែលមានសាំងសម្រាប់ចាក់បែរជាស្ថិតនៅឆ្ងាយៗ ហើយបើទុកជាមានក៏ត្រូវឈរតម្រង់ជួរគ្នាដ៏វែងអន្លាយ។ ជួនកាលត្រូវរង់ចាំរហូតដល់២ម៉ោងទើបបានចាក់សាំង។ បុរសម្នាក់ជាអ្នករត់ម៉ូតូឌុបប្រាប់ថាលើកចុងក្រោយដែលគាត់ចាក់សាំងម៉ូតូគឺកាលពីថ្ងៃសុក្រសប្ដាហ៍មុន។
ឥឡូវនេះ ម៉ូតូអស់សាំងបាត់ទៅហើយ។ បើរកកន្លែងចាក់សាំងមិនបានទេ គាត់ប្រហែលជាត្រូវផ្អាករកស៊ីពីរបីថ្ងៃសិនហើយ។ បន្ទាប់ពីទទួលរងការវាយប្រហារពីអាមេរិក និងអ៊ីស្រាអែលកាលពីថ្ងៃទី២៨ ខែកុម្ភៈ អ៊ីរ៉ង់ក៏ចាត់ការវាយប្រហារទៅលើបណ្ដាប្រទេសដែលនាំប្រេងចេញនៅតំបន់ឈូងសមុទ្រ។ ហេតុនេះ ការដឹកជញ្ជូនប្រេងតាមកប៉ាល់ធំៗកាត់ច្រកហ័រម៉ូសត្រូវរងការរំខានខ្លាំង។ ក្រោយមក អ៊ីរ៉ង់បិទខ្ទប់ច្រកនេះថែមទៀត។ ទាល់តែកប៉ាល់ណាដែលអ៊ីរ៉ង់អនុញ្ញាតឱ្យបើកចេញចូលទើបអាចចេញចូលបាន។
ងាកមកបរិបទប្រទេសឡាវ តម្លៃប្រេងឥន្ធនៈចេះតែហក់ឡើងខ្ពស់ជាលំដាប់។ តម្លៃប្រេងម៉ាហ្ស៊ូតឡើងថ្លៃជិត៥០%។ ពោលគឺមួយលីត្រលក់ចេញថ្លៃ៣១៥៦០គីប (kip) (ឬប្រហាក់ប្រហែលនឹង១,៤៧ដុល្លារ)។ យោងតាមរបាយការណ៍របស់ក្លូបល ប៉េត្រូល ប៉្រាយ (Global Petrol Prices) គ្រាន់តែសង្គ្រាមចាប់ផ្ដើមផ្ទុះឡើងនៅអ៊ីរ៉ង់ភ្លាម ប្រទេសឡាវចាប់ផ្ដើមឡើងថ្លៃប្រេងឥន្ធនៈខ្ពស់លំដាប់ទី២នៅលើពិភពលោក។ ប្រទេសនេះនាំចូលប្រេងស្ទើរតែទាំងស្រុងពីប្រទេសថៃ។
កាលពីពេលដែលថៃប្រកាសផ្អាកលក់ប្រេងឱ្យឡាវកាលពីចុងខែកុម្ភៈ មនុស្សនាំគ្នាសម្រុកចាក់សាំងយ៉ាងគគ្រឹកគគ្រេងព្រោះភ័យខ្លាចអស់សាំងខានបានចាក់។ ហេតុនេះធ្វើឱ្យស្ថានីយទូទាំងទីក្រុងវៀងចន្ទន៍ត្រូវបិទទ្វារព្រោះអស់សាំងត្រឹមតែរយៈពេលប៉ុន្មានម៉ោងប៉ុណ្ណោះ។ ក្រោយមក ថៃលក់សាំងឱ្យឡាវ១២លានលីត្រថែមទៀតសម្រាប់ដោះស្រាយបញ្ហានៅក្នុងគ្រាបន្ទាល់។ ប៉ុន្តែនៅពេលដែលប្រេងដឹកទៅដល់ស្ថានីយមិនយូរប៉ុន្មានក៏អស់ពីស្តុកទៀត៕ ប្រភព៖ ឆេនណល ញូស៍ អេស៊ា (Channel News Asia) និងប្រភពដទៃទៀត
ចែករំលែកព័តមាននេះ