សុខភាព៖ យោងតាមការចុះផ្សាយពីប្រភពបរទេស បាតុភូតដែលធ្វើឱ្យអ្នកចូលចិត្តកាហ្វេភាគច្រើនត្រូវប្រញាប់រត់ទៅបន្ទប់ទឹកភ្លាមៗក្រោយពេលទទួលទាន មិនមែនជារឿងចៃដន្យឡើយ ប៉ុន្តែវាគឺជាលទ្ធផលនៃប្រតិកម្មអ័រម៉ូនដ៏អស្ចារ្យក្នុងរាងកាយ។

នៅពេលកាហ្វេចូលទៅដល់ក្រពះ វានឹងជំរុញឱ្យរាងកាយផលិតអ័រម៉ូន Gastrin និង Cholecystokinin ដែលផ្ដល់សញ្ញាឱ្យពោះវៀនធំចាប់ផ្ដើមកន្ត្រាក់ និងបញ្ជូនកាកសំណល់ចេញមកក្រៅយ៉ាងលឿនតាមរយៈប្រតិកម្ម Gastrocolic reflex។ អ្វីដែលកាន់តែភ្ញាក់ផ្អើលនោះគឺ សូម្បីតែកាហ្វេដែលគ្មានជាតិកាហ្វេអ៊ីន​ក៏នៅតែមានសមត្ថភាពដាស់ពោះវៀនឱ្យភ្ញាក់ឡើងបានដែរ ដោយសារសមាសធាតុគីមីធម្មជាតិរាប់រយប្រភេទផ្សេងទៀតដែលមាននៅក្នុងគ្រាប់កាហ្វេផ្ទាល់តែម្ដង។

ការទទួលទានកាហ្វេនៅពេលព្រឹកព្រលឹម ដែលជាពេលប្រព័ន្ធរំលាយអាហារទើបចាប់ផ្ដើមដំណើរការ កាន់តែធ្វើឱ្យប្រតិកម្មភ្ញោចពោះវៀននេះកើតឡើងខ្លាំងក្លា និងរហ័សបំផុត។ តាមការសិក្សា មនុស្សប្រហែល ២៩% តែងតែជួបប្រទះបញ្ហានេះ ប៉ុន្តែវាមិនមែនជាសញ្ញានៃជំងឺអ្វីឡើយ ផ្ទុយទៅវិញវាគ្រាន់តែជាការបង្ហាញថា ប្រព័ន្ធរំលាយអាហាររបស់អ្នកកំពុងឆ្លើយតបយ៉ាងសកម្ម និងមានប្រសិទ្ធភាពទៅនឹងភេសជ្ជៈមួយនេះប៉ុណ្ណោះ។

ដូច្នេះ ប្រសិនបើអ្នកគឺជាមនុស្សម្នាក់ក្នុងចំណោមនោះ ចូរចាត់ទុកវាជា “សញ្ញាជួយសម្អាតពោះវៀន” ដ៏ល្អប្រចាំថ្ងៃ និងគួរត្រៀមបន្ទប់ទឹកឱ្យរួចរាល់ក្រោយពេលក្រេបកាហ្វេពេលព្រឹករួច​៕​​​​