សុខភាព៖ យោងតាមការចុះផ្សាយពីប្រភពបរទេស ការបន្ថែមចេកទុំចំនួន ២ ផ្លែទៅក្នុងរបបអាហារប្រចាំថ្ងៃ គឺជាវិធីសាស្ត្រដ៏សាមញ្ញ ប៉ុន្តែផ្ដល់អត្ថប្រយោជន៍មហាសាលដល់រាងកាយទាំងមូល ចាប់តាំងពីប្រព័ន្ធរំលាយអាហាររហូតដល់សុខភាពផ្លូវចិត្ត។

ជាតិសរសៃពី ៣ ទៅ ៥ ក្រាមក្នុងចេកមួយផ្លែ ជួយឱ្យប្រព័ន្ធរំលាយអាហារដំណើរការបានយ៉ាងរលូន ខណៈដែលជាតិប៉ូតាស្យូមដ៏សម្បូរបែប ដើរតួយ៉ាងសំខាន់ក្នុងការបញ្ចេញជាតិសូដ្យូមលើសពីរាងកាយ ជួយឱ្យសរសៃឈាមសម្រាក និងរក្សាសម្ពាធឈាមឱ្យមានស្ថិរភាព ដែលជាខែលការពារយ៉ាងរឹងមាំសម្រាប់សុខភាពបេះដូង។ សម្រាប់អ្នកដែលចូលចិត្តហាត់ប្រាណ ការញ៉ាំចេកនឹងជួយបំពេញជាតិរ៉ែដែលបាត់បង់ បង្ការការរមួលក្រពើ និងផ្ដល់ថាមពលដល់សាច់ដុំបានយ៉ាងរហ័ស។

ក្រៅពីអត្ថប្រយោជន៍ខាងរាងកាយ ចេកក៏ជា “អាហារផ្ដល់ក្ដីសុខ” ផងដែរ ដោយសារវាសម្បូរទៅដោយសារធាតុ Tryptophan ដែលរាងកាយបំប្លែងទៅជា Serotonin ជួយកាត់បន្ថយភាពតានតឹង និងធ្វើឱ្យអារម្មណ៍ស្រស់ស្រាយ។ ចំពោះអ្នកដែលកំពុងព្យាយាមផ្ដាច់បារី វីតាមីន និងជាតិរ៉ែក្នុងចេកអាចជួយកាត់បន្ថយការឃ្លានជាតិកូទីន និងសម្រាលអាការៈតប់ប្រមល់បានយ៉ាងប្រសើរ។ ទោះបីជាចេកមានជាតិស្ករធម្មជាតិក៏ដោយ ប៉ុន្តែការញ៉ាំវាជាមួយប្រភពប្រូតេអ៊ីន ឬខ្លាញ់ល្អដូចជា យ៉ាអួ ឬគ្រាប់ធញ្ញជាតិ នឹងជួយរក្សាតុល្យភាពជាតិស្ករក្នុងឈាម និងជួយឱ្យអ្នកមានអារម្មណ៍ឆ្អែតបានយូរ ដែលជាជំនួយការដ៏ល្អក្នុងការគ្រប់គ្រងទម្ងន់ និងពង្រឹងប្រព័ន្ធការពាររាងកាយឱ្យកាន់តែរឹងមាំ​៕