អន្តរជាតិ ៖ តម្លៃមាសអន្តរជាតិបានធ្លាក់ចុះយ៉ាងខ្លាំង ដោយសារតែសម្ពាធពីប្រាក់ដុល្លារអាមេរិកកើនឡើង និងការព្រួយបារម្ភពីអត្រាការប្រាក់ខ្ពស់ ខណៈដែលសង្គ្រាមនៅតំបន់មជ្ឈិមបូព៌ាបានបន្តដល់សប្តាហ៍ទី ២ ហើយប្រេងឆៅអន្តរជាតិបានកើនលើសពី ១១០ ដុល្លារក្នុង១បារ៉ែល…
អន្តរជាតិ ៖ តម្លៃមាសអន្តរជាតិបានធ្លាក់ចុះយ៉ាងខ្លាំង ដោយសារតែសម្ពាធពីប្រាក់ដុល្លារអាមេរិកកើនឡើង និងការព្រួយបារម្ភពីអត្រាការប្រាក់ខ្ពស់ ខណៈដែលសង្គ្រាមនៅតំបន់មជ្ឈិមបូព៌ាបានបន្តដល់សប្តាហ៍ទី ២ ហើយប្រេងឆៅអន្តរជាតិបានកើនលើសពី ១១០ ដុល្លារក្នុង១បារ៉ែល (ធុង)។ នេះបើតាមប្រភពពីសារព័ត៌មាន Bloomberg ចេញផ្សាយនៅថ្ងៃទី៩ ខែមីនា ឆ្នាំ២០២៦។
តម្លៃមាសអន្តរជាតិធ្លាក់ចុះដល់ ២,៥% មកនៅក្រោម ៥,០៥០ ដុល្លារក្នុងមួយអោន ឬ ៦ ០៨៤ ដុល្លារក្នុង១តម្លឹងក្នុងការជួញដូរដំបូងនៃថ្ងៃទី៩ ខែមីនា ឆ្នាំ២០២៦ មុនពេលរក្សាតម្លៃត្រឹម ៥ ០៧៥ ដុល្លារ/អោន ឬ ៦ ១១៤ ដុល្លារ/តម្លឹង គិតត្រឹមម៉ោង ៩ និង ៣០ នាទីព្រឹក (ម៉ោងនៅកម្ពុជា)។
ក្រុមហ៊ុនផលិតប្រេងធំៗនៅតំបន់ឈូងសមុទ្រពែក្ស (Persian Gulf) បានកាត់បន្ថយផលិតផលរបស់ខ្លួន ដោយសារតែសង្គ្រាមអាមេរិក និងអ៊ីស្រាអែលជាមួយអ៊ីរ៉ង់ ដែលមិនទាន់បង្ហាញសញ្ញាថមថយ ឬដំណោះស្រាយណាមួយនៅឡើយ ចំពេលសន្ទស្សន៍ប្រាក់ដុល្លារអាមេរិកបានកើនឡើងដល់ទៅ ០,៦%។
បើទោះជាការជួញដូរមានភាពប្រែប្រួល និងសន្ទុះតម្លៃកើនឡើងបានជាប់គាំងក៏ពិតមែន ប៉ុន្តែមាសនៅតែកើនឡើងប្រហែល ១៧% រហូតទល់ពេលនេះ សម្រាប់ឆ្នាំ២០២៦។ ការផ្លាស់ប្តូរពាណិជ្ជកម្មសកល និងភូមិសាស្ត្រនយោបាយរបស់ប្រធានាធិបតីអាមេរិក លោក ដូណាល់ ត្រាំ (Donald Trump) ក៏ដូចជាការគំរាមកំហែងដល់ឯករាជ្យភាពរបស់ធនាគារកណ្តាលសហរដ្ឋអាមេរិក (Fed) បានជំរុញតម្លៃមាសដែលត្រូវបានចាត់ជាទ្រព្យសកម្មដ៏មានសុវត្ថិភាពបំផុត អំឡុងពេលភាពមិនប្រាកដប្រជាសកលនោះបានកើនឡើង ដោយបំបែកកំណត់ត្រាតម្លៃជាបន្តបន្ទាប់។ ការទិញរបស់បណ្តាធនាគារកណ្តាលពិភពលោកកើនឡើង ក៏បានគាំទ្រដល់កំណើនតម្លៃផងដែរ ជាពិសេសធនាគារចិនបានទិញមាសបន្ថែមទៀតនៅក្នុងខែកុម្ភៈ ដោយពង្រីកការទិញរបស់ខ្លួនដល់ ១៦ ខែជាប់គ្នា។
អ្នកជំនាញ កាលពីថ្ងៃទី៧ ខែមីនា ឆ្នាំ២០២៦ លើកឡើងថា ការបញ្ចប់ជម្លោះឆាប់រហ័សទំនងជានឹងធ្វើឱ្យប្រាក់ដុល្លារធ្លាក់ចុះ ហើយពេលនោះ មាសនឹងឡើងថ្លៃ ខណៈសង្គ្រាមអូសបន្លាយនឹងធ្វើឱ្យប្រាក់ដុល្លារឡើងថ្លៃ ដោយសារការរំពឹងទុកនៃអតិផរណាខ្ពស់ ដែលជាលទ្ធផលបង្កើតលទ្ធភាពនៃការកាត់បន្ថយអត្រាការប្រាក់៕
ចែករំលែកព័តមាននេះ