សង្ក្រាមអ៉ីរ៉ង់ ៖ ស្ថាប័នសាសនាអ៉ីរ៉ង់ ក្នុងសេចក្ដីប្រកាសមួយចេញផ្សាយតាមបណ្ដាសារព័ត៌មានអ៉ីរ៉ង់គូសបញ្ជាក់ថា លោកអាយ៉ាតុលាម៉ូស្តាបាហូសីនីខាមេនី ត្រូវបានតែងតាំងជាមេដឹកនាំកំពូលទី៣នៃប្រព័ន្ធដឹកនាំរបស់សាធារណរដ្ឋអ៊ិស្លាមអ៉ីរ៉ង់ តាមរយៈការបោះឆ្នោតរបស់បណ្ដាសមាជិកសភានៃអ្នកជំនាញការ ។ ស្ថាប័ននោះបន្តថា សភានេះបានស្នើដល់ប្រជាជាតិអ៉ីរ៉ង់ទាំងមូល…
សង្ក្រាមអ៉ីរ៉ង់ ៖ ស្ថាប័នសាសនាអ៉ីរ៉ង់ ក្នុងសេចក្ដីប្រកាសមួយចេញផ្សាយតាមបណ្ដាសារព័ត៌មានអ៉ីរ៉ង់គូសបញ្ជាក់ថា លោកអាយ៉ាតុលាម៉ូស្តាបាហូសីនីខាមេនី ត្រូវបានតែងតាំងជាមេដឹកនាំកំពូលទី៣នៃប្រព័ន្ធដឹកនាំរបស់សាធារណរដ្ឋអ៊ិស្លាមអ៉ីរ៉ង់ តាមរយៈការបោះឆ្នោតរបស់បណ្ដាសមាជិកសភានៃអ្នកជំនាញការ ។
ស្ថាប័ននោះបន្តថា សភានេះបានស្នើដល់ប្រជាជាតិអ៉ីរ៉ង់ទាំងមូល ពិសេស បណ្ដាឥស្សរជននិងបណ្ដាបញ្ញាវ័ន្ត ឲ្យគោរពមេដឹកនាំថ្មីនិងរួបរួមគ្នាជុំវិញលោក។ លោកអាយ៉ាតុលាម៉ូស្តាបាហូសីនីខាមេនីអាយុ៥៦ឆ្នាំ ឡើងបន្តវេនពីឪពុកលោកអាយ៉ាតុលាអាលីខាមេនីអាយុ៨៦ឆ្នាំ ដែលស្លាប់ដោយសារការវាយប្រហាររបស់អាមេរិក និងអ៉ីស្រាអែល ក្រោយពីលោកកាន់អំណាចអស់ពេលជាង៣ទសវត្ស។ លោកខាមេនីជាអ្នកឡើងបន្តវេនពីស្ថាបនិកសាធារណរដ្ឋអ៊ិស្លាមអ៉ីរ៉ង់ លោកអាយ៉ាតុលារូហូលឡាហ៍ខូមេនីកាលពីឆ្នាំ១៩៨៩។
ការជ្រើសតាំងនោះត្រូវបានប្រកាសជាមហោឡារិកដោយទូរទស្សន៍រដ្ឋ ដោយពិធីករម្នាក់បានអានសេចក្ដីប្រកាសផ្លូវការរបស់សភាអ្នកជំនាញការដែលមានសមាជិក៨៨រូប ទទួលបន្ទុកតែងតាំងមេដឹកនាំកំពូលថ្មី។ បណ្ដារូបភាពនៃការតែងតាំងនោះបន្ទាប់មកត្រូវបានផ្សព្វផ្សាយដល់គ្រប់ទិសទីក្នុងប្រទេស។ ពលរដ្ឋអ៉ីរ៉ង់បាននាំគ្នាសាទរតាមរយៈការគ្រវីទង់ជាតិនាពេលយប់និងការបើកភ្លើងទូរស័ព្ទដៃព្រោងព្រាត។
ប្រធានាធិបតីអាមេរិកលោកដូណាល់ត្រាំអះអាងកាលពីថ្ងៃទី៦មីនាកន្លងទៅថា លោកត្រូវចូលរួមក្នុងការជ្រើសរើសមេដឹកនាំកំពូលថ្មីអ៉ីរ៉ង់ហើយលោកឲ្យដឹងថា លោកនឹងមិនទទួលយកកូនប្រុសលោកអាលីខាមេនីជាមេដឹកនាំកំពូលថ្មីអ៉ីរ៉ង់នាពេលខាងមុខឡើយ ។
ប្រធានាធិបតីអាមេរិកលោកដូណាល់ត្រាំបានគំរាមកាលពីថ្ងៃទី៨មីនាថា មេដឹកនាំកំពូលថ្មីអីុរ៉ង់នឹងមិនអាចឈរជើងបានយូរឡើយ បើគ្មានការយល់ស្របរបស់លោកទេនោះ។ ការគំរាមនេះត្រូវបានធ្វើមុនការតែងតាំងមេដឹកនាំកំពូលថ្មីអីុរ៉ង់នោះទៅទៀត។ ចំណែកអីុស្រាអែលវិញក៏គំរាមដែរថា មេដឹកនាំកំពូលថ្មីអីុរ៉ង់នឹងក៏ជាគោលដៅកម្ទេចដែរ៕
ចែករំលែកព័តមាននេះ