សង្គ្រាមអ៉ីរ៉ង់ ៖ អ៉ីរ៉ង់អះអាង នាថ្ងៃទី៨ មីនា ថា ខ្លួនអាចបន្តប្រយុទ្ធជាមួយអាមេរិក និងអ៉ីស្រាអែលបានយ៉ាងតិច៦ខែទៀត ខណៈអ៉ីស្រាអែលនាព្រឹកព្រលឹមថ្ងៃនោះ វាយប្រហារសណ្ឋាគារមួយនៅកណ្ដាលក្រុងបេរូតរដ្ឋធានីលីបង់…
សង្គ្រាមអ៉ីរ៉ង់ ៖ អ៉ីរ៉ង់អះអាង នាថ្ងៃទី៨ មីនា ថា ខ្លួនអាចបន្តប្រយុទ្ធជាមួយអាមេរិក និងអ៉ីស្រាអែលបានយ៉ាងតិច៦ខែទៀត ខណៈអ៉ីស្រាអែលនាព្រឹកព្រលឹមថ្ងៃនោះ វាយប្រហារសណ្ឋាគារមួយនៅកណ្ដាលក្រុងបេរូតរដ្ឋធានីលីបង់ ដោយចាត់ទុកសណ្ឋាគារនោះថា ជាកន្លែងស្នាក់របស់បណ្ដាប្រមុខកងឆ្មាំបដិវត្តន៍ ។
សង្គ្រាមនៅអ៉ីរ៉ង់មកដល់ថ្ងៃទី៨មីនា ឈានចូលថ្ងៃទី៩ ជាថ្ងៃមានការវាយប្រហារតាមអាកាសនាពេលយប់ថ្មីៗ ក្នុងប្រទេសជាច្រើននៅឈូងសមុទ្រពែរ្ស៍ ។ លោកអាលីម៉ូហាម៉ាដណាអ៉ីនី អ្នកនាំពាក្យកងឆ្មាំបដិវត្តន៍អ៉ីរ៉ង់ថ្លែងថា កងទ័ពអ៉ីរ៉ង់មានលទ្ធភាពបន្តសង្គ្រាមខ្លាំងក្លាដូចក្នុងសង្វាក់បច្ចុប្បន្នបានយ៉ាងតិច៦ខែទៀត ។
នាពេលយប់ក្នុងចម្ងាយ១៥០០គីឡូម៉ែត្រ ពីអ៉ីរ៉ង់ អ៉ីស្រាអែលនិយាយថា បានវាយប្រហារចំៗមេបញ្ជាការសំខាន់ៗរបស់កងកម្លាំងQODS ជាសាខាវាយប្រហារខាងក្រៅប្រទេស របស់កងឆ្មាំបដិវត្តន៍ដែលអ៉ីស្រាអែលចោទថា ជាក្រុមវាយប្រហារភេរវកម្ម ។ តាមក្រសួងសុខាភិបាលលីបង់ថា អ៉ីស្រាអែលបានវាយប្រហារសណ្ឋាគារមួយ នៅកណ្ដាលក្រុងបេរូតបណ្ដាលឲ្យមនុស្សស្លាប់៤នាក់និងរបួស១០នាក់ ។ ការវាយប្រហារនោះសំដៅសណ្ឋាគារRAMADA ទល់មុខសមុទ្រ ។
ក្នុងសង្កថាមួយតាមទូរទស្សន៍នាយករដ្ឋមន្ត្រីអ៉ីស្រាអែលលោកបេនចាមីននេតាន់យ៉ាហ៊ូអះអាងនាពេលមុននេះថា ប្រទេសលោកនឹងបន្តសង្គ្រាម ដោយពេញកម្លាំងប្រឆាំងអ៉ីរ៉ង់តាមផែនការជាមួយរឿងដែលគួរឲ្យភ្ញាក់ផ្អើលបំផុត។
ចំណែកប្រធានាធិបតីអាមេរិកលោកដូណាល់ត្រាំវិញ បានលើកកាលពីថ្ងៃទី៧ មីនា ពីលទ្ធភាពបញ្ជូនកងទ័ពជើងគោកអាមេរិកមកកាន់ដែនដីអ៉ីរ៉ង់ដើម្បីត្រួតត្រាការស្តុកអ៊ុយរ៉នីញ៉ូមចម្រាញ់របស់ប្រទេសនោះ ។ ក្នុងយន្តហោះប្រធានាធិបតីAIR FORCE ON លោកត្រាំថ្លែងទៅកាន់បណ្ដាអ្នកកាសែតថា ប្រហែលជាក្នុងពេលណាមួយយើងនឹងធ្វើបែបនេះ។ នោះជារឿងដែលយើងអាចធ្វើបាន នាពេលខាងមុខតែមិនមែនក្នុងពេលនេះឡើយ ។
រីឯសេតវិមានវិញអះអាងថា អ៉ីរ៉ង់បានបន្តស្តុកអ៊ុយរ៉ានីញ៉ូមចម្រាញ់ដែលជិតដល់កម្រិតអាចផលិតគ្រាប់បែកនុយក្លេអ៊ែរបាន ។ តាមព័ត៌មាននានាថា អ៉ីរ៉ង់ចម្រាញ់អ៊ុយរ៉ានីញ៉ូមកម្រិត៦០%បានប្រមាណជា៤៦០កីឡូក្រាម ហើយនឹងឈានទៅចម្រាញ់បានដល់កម្រិត៩០%ដែលអាចផលិតគ្រាប់បែកនុយក្លរអ៊ែរបាន ៕
ចែករំលែកព័តមាននេះ