សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានអះអាងថា លោកមិនចាប់អារម្មណ៍ក្នុងការចរចាជាមួយអ៊ីរ៉ង់…
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានអះអាងថា លោកមិនចាប់អារម្មណ៍ក្នុងការចរចាជាមួយអ៊ីរ៉ង់ ហើយបានលើកឡើងពីលទ្ធភាពដែលសង្គ្រាមអ៊ីរ៉ង់នឹងបញ្ចប់ លុះត្រាតែទីក្រុងតេហេរ៉ង់បាត់បង់សមត្ថភាពយោធា ឬថ្នាក់ដឹកនាំសេសសល់ក្នុងអំណាចបច្ចុប្បន្ន។ នេះបើយោងតាមប្រភពពីទីភ្នាក់ងារសារព័ត៌មាន Reuters ចេញផ្សាយនៅថ្ងៃទី៨ ខែមីនា ឆ្នាំ២០២៦។
ថ្លែងទៅកាន់អ្នកយកព័ត៌មាននៅលើយន្តហោះ Air Force One កាលពីថ្ងៃទី៧ ខែមីនា ឆ្នាំ២០២៦ (ម៉ោងនៅសហរដ្ឋអាមេរិក) លោក ត្រាំ ថ្លែងថា ប្រតិបត្តិការណ៍ផ្លូវអាកាសអាចធ្វើឱ្យការចរចាក្លាយជាចំណុចគ្មានន័យ បើមេដឹកនាំមានសក្តានុពលទាំងអស់របស់អ៊ីរ៉ង់ត្រូវបានសម្លាប់ ហើយយោធាអ៊ីរ៉ង់ត្រូវបានបំផ្លាញ។ លោកនិយាយថា «នៅចំណុចណាមួយ ខ្ញុំមិនគិតថានឹងមាននរណាម្នាក់នៅសេសសល់ដើម្បីនិយាយថា យើងចុះចាញ់ហើយ នោះទេ»។
ងាកទៅខាងអ៊ីរ៉ង់ឯណោះវិញ ប្រធានាធិបតីប្រទេសនេះ លោក ម៉ាស៊ូដ ប៉េហ្សេសគីយ៉ាន (Masoud Pezeshkian) បានសុំទោសប្រទេសជិតខាង ចំពោះការវាយប្រហាររបស់អ៊ីរ៉ង់ទៅលើមូលដ្ឋានទ័ពអាមេរិកក្នុងប្រទេសទាំងនោះ នៅក្នុងគោលបំណងបន្ធូរបន្ថយកំហឹងនៅទូទាំងមជ្ឈិមបូព៌ា ប៉ុន្តែការសុំទោសនេះ បានបង្កឱ្យមានការរិះគន់យ៉ាងខ្លាំងពីឥស្សរជននៅក្នុងរចនាសម្ព័ន្ធអំណាចអ៊ីរ៉ង់ ជាពិសេសក្នុងកងឆ្មាំបដិវត្តន៍អ៊ីស្លាម (IRGC)។
ប្រធានាធិបតីអ៊ីរ៉ង់បានថ្លែងថា «ខ្ញុំផ្ទាល់សូមអភ័យទោសដល់ប្រទេសជិតខាងដែលរងផលប៉ះពាល់ដោយសកម្មភាពរបស់អ៊ីរ៉ង់»។ លោកក៏បានជំរុញឱ្យប្រទេសជិតខាងទាំងនោះ កុំចូលរួមក្នុងការវាយប្រហាររបស់អាមេរិក និងអ៊ីស្រាអែលលើអ៊ីរ៉ង់។ ទន្ទឹមនឹងនេះលោកបានច្រានចោលការទាមទាររបស់លោក ត្រាំ សម្រាប់ការសុំចុះចាញ់ដោយគ្មានលក្ខខណ្ឌរបស់អ៊ីរ៉ង់ថាជាសុបិនមួយ ប៉ុន្តែលោកបាននិយាយថា ក្រុមប្រឹក្សាភិបាលបណ្ដោះអាសន្នរបស់ខ្លួន បានយល់ព្រមផ្អាកការវាយប្រហារលើប្រទេសជិតខាង លុះត្រាតែការវាយប្រហារលើអ៊ីរ៉ង់មានប្រភពចេញពីទឹកដីរបស់ពួកគេ៕
ចែករំលែកព័តមាននេះ