ទីក្រុងម៉ូស្គូ៖ ប្រទេសរុស្ស៊ីបានផ្ដល់ទៅឱ្យអ៊ីរ៉ង់នូវព័ត៌មានសម្ងាត់ពាក់ព័ន្ធនឹងទីតាំងយោធា ទីតាំងអាវុធយុទ្ធភ័ណ្ឌ យន្តហោះ នាវាចម្បាំងជាដើម អីចឹងហើយបានជាអ៊ីរ៉ង់វាយប្រហារចំគោលដៅល្អ។ នេះបើយោងតាមមន្ត្រីរដ្ឋាភិបាល២នាក់ដែលដឹងកិច្ចការផ្ទៃក្នុងរបស់ភ្នាក់ងារសម្ងាត់អាមេរិក។ មន្ត្រីទាំង២រូបដែលស្នើសុំមិនបញ្ចេញឈ្មោះអះអាងថារហូតមកដល់ពេលនេះ ផ្នែកស៊ើបការណ៍សម្ងាត់អាមេរិកមិនទាន់ដឹងរឿងនេះនៅឡើយទេថារុស្ស៊ីកំពុងផ្ដល់ការណែនាំទៅអ៊ីរ៉ង់ថាតើព័ត៌មានសម្ងាត់ដែលរុស្ស៊ីប្រាប់នោះត្រូវចាត់ចែងបែបណាខ្លះ។
មែនទែនទៅ នេះមិនមែនជាលើកទីមួយទេដែលគេស្ដាប់ឮថារុស្ស៊ីជាប់ពាក់ព័ន្ធនឹងសង្គ្រាមនេះ។ រុស្ស៊ីស្ថិតនៅក្នុងចំណោមប្រទេសមួយចំនួនទៀតដែលនៅតែរក្សាទំនាក់ទំនងជិតស្និទ្ធជាមួយរដ្ឋាភិបាលទីក្រុងតេអេរ៉ង់។ សេតវិមានច្រានចោលដំណឹងស្ដីពីរុស្ស៊ីជួយផ្ដល់ព័ត៌មានសម្ងាត់ទៅឱ្យអ៊ីរ៉ង់។ សេតវិមានថាបើទុកជារឿងនេះកើតឡើងមែនក៏មិនបានធ្វើឱ្យសភាពការណ៍ប្រែប្រួលដែរ។ ជាក់ស្ដែងយើងបានកម្ទេចពួកគេទាំងស្រុងបាត់ទៅហើយ។
អ្នកនាំពាក្យសេតវិមាន លោកស្រីខារ៉ូឡាញ ឡេវីត សូមមិនឆ្លើយនឹងសំណួរថាតើលោកត្រាំបានសន្ទនាគ្នាជាមួយលោកពូទីនដែរឬទេពាក់ព័ន្ធនឹងដំណឹងថារុស្ស៊ីផ្ដល់ព័ត៌មានសម្ងាត់ឱ្យអ៊ីរ៉ង់។ លោកស្រីចង់ទុកបញ្ហានេះ និងបញ្ហាដទៃទៀតឱ្យលោកត្រាំជាអ្នកបកស្រាយដោយខ្លួនលោកចុះ។ អ្នកសារព័ត៌មានបានសាកសួរអ្នកនាំពាក្យវិមានក្រឹមឡាំងដើម្បីចង់ដឹងថាក្រៅពីការជួយគាំទ្រផ្នែកនយោបាយ និងការទូត តើរុស្ស៊ីជួយអ្វីឱ្យលើសពីនេះទៀតទេ?
អ្នកនាំពាក្យវិមានក្រឹមឡាំងឆ្លើយតបថាអ៊ីរ៉ង់មិនបានស្នើសុំអ្វីឱ្យលើសពីនេះទេ។ យើងបន្តការសន្ទនាគ្នាជាមួយអ៊ីរ៉ង់ ហើយនឹងបន្តការសន្ទនាគ្នាបែបនេះតទៅពេលអនាគត។ នៅពេលអ្នកសារព័ត៌មានសួរសង្ខុញដើម្បីឱ្យអ្នកនាំពាក្យរូបនេះបញ្ជាក់ឱ្យបានច្បាស់ថាតើរុស្ស៊ីពិតជាបានផ្ដល់ជំនួយយោធា និងព័ត៌មានសម្ងាត់ដែរឬទេ? លោកសូមមិនធ្វើអត្ថាធិប្បាយលើបញ្ហានេះទេ។
រុស្ស៊ី និងអ៊ីរ៉ង់ចាប់ផ្ដើមរឹតបន្តឹងទំនាក់ទំនងទ្វេភាគីដល់កម្រិតកំពូល។ រុស្ស៊ីត្រូវការដ្រូន និងមីស៊ីលរបស់អ៊ីរ៉ង់ដើម្បីយកទៅធ្វើសង្គ្រាមទល់នឹងអ៊ុយក្រែន។ អ៊ីរ៉ង់ទំនងជាមានជំនាញខ្ពស់ខាងផលិតដ្រូន។ តាំងពីជំនាន់លោកបៃដិន ផ្នែកស៊ើបការណ៍សម្ងាត់អាមេរិករកឃើញថាអ៊ីរ៉ង់បានផ្ដល់ទៅឱ្យរុស្ស៊ីនូវដ្រូនអត្តឃាត និងជួយបើករោងចក្រផលិតដ្រូននៅលើទឹកដីរុស្ស៊ីតែម្ដង។ អាមេរិកចោទអះអាងថាអ៊ីរ៉ង់ក៏បានបញ្ជូនមីស៊ីលផ្លោងរយៈចម្ងាយខ្លីទៅឱ្យរុស្ស៊ីផងដែរ។
ដំណឹងស្ដីពីរុស្ស៊ីលួចផ្ដល់ព័ត៌មានសម្ងាត់ទៅឱ្យអ៊ីរ៉ង់ត្រូវបានចុះផ្សាយមុនគេដោយសារព័ត៌មានវ៉ាស៊ីនតោនប៉ុស្តិ៍។ នៅពេលអ្នកសារព័ត៌មានសួរថាតើការទម្លាយអាថ៌កំបាំងនេះអាចបង្កើតការមិនទុកចិត្តគ្នារវាងលោកត្រាំ និងលោកពូទីនដែរឬទេ? ជាពិសេសអ្វីដែលលោកត្រាំធ្លាប់តែមានជំនឿថាអាចនឹងមានកិច្ចព្រមព្រៀងសន្តិភាពនៅអ៊ុយក្រែន? អ្នកនាំពាក្យសេតវិមានឆ្លើយតបថាលោកត្រាំមុខជានិយាយថាសន្តិភាពនៅតែអាចសម្រេចបាននៅអ៊ុយក្រែន។
នៅក្នុងសង្គ្រាមអ៊ីរ៉ង់លើកនេះ គេឃើញថាអ៊ីរ៉ង់ហាក់ដូចជាមានក្រឡាហក់ខ្លាំងព្រោះមានដ្រូនទំនើបៗអាចហោះទៅវាយប្រហារបានឆ្ងាយៗដល់រាប់ពាន់គីឡូម៉ែត្រ។ ហេតុនេះ អាមេរិកកំពុងងាកទៅស្នើសុំជំនួយពីអ៊ុយក្រែនដើម្បីចាត់ការដ្រូនរបស់អ៊ីរ៉ង់ព្រោះអ៊ុយក្រែនមានបទពិសោធលើផ្នែកនេះស្រាប់ និងមានជោគជ័យក្នុងការបាញ់ទម្លាក់ដ្រូនអត្តឃាតរបស់អ៊ីរ៉ង់ដែលរុស្ស៊ីបញ្ជូនទៅវាយប្រហារ។ ប្រមុខដឹកនាំអ៊ុយក្រែន លោកហ្សេឡិនស្គីបានទាក់ទងទៅបណ្ដាប្រទេសសម្ព័ន្ធមិត្តរបស់អាមេរិក និងដែលរងការវាយប្រហារពីអ៊ីរ៉ង់។ លោកថាលោកបានទាក់ទងទៅអារ៉ាប់រួម កាតា បារ៉ែន ហ្សកដង់ និងគូវែត៕ ប្រភព៖ អេភី (AP) និងប្រភពដទៃទៀត
ចែករំលែកព័តមាននេះ