សុខភាព៖ បញ្ហាខ្វះឈាម ឬអាការៈស្លេកស្លាំងច្រើនតែកើតឡើងដោយសាររាងកាយខ្វះជាតិដែក ដែលជាសមាសធាតុសំខាន់ក្នុងការផលិតគ្រាប់ឈាមក្រហម។ ដើម្បីបំប៉នឈាមឱ្យមានសុខភាពល្អ និងបង្កើនថាមពលដល់រាងកាយ អ្នកគួរជ្រើសរើសទទួលទានក្រុមអាហារដែលមានជាតិដែកខ្ពស់ និងសម្បូរបែប។

ក្រុមអាហារដែលផ្តល់ជាតិដែកប្រភេទ Heme Iron ដែលរាងកាយងាយស្រូបយកបំផុតនោះគឺ ថ្លើម ឈាម និងសាច់សត្វ ជាពិសេសសាច់ក្រហម ដែលអ្នកជំនាញណែនាំឱ្យញ៉ាំយ៉ាងហោចណាស់ ១-២ ដងក្នុងមួយសប្តាហ៍។ ក្រៅពីនេះ គ្រឿងសមុទ្រ ត្រី សាច់បក្សី និងផ្នែកលឿងនៃស៊ុត ក៏ជាប្រភពជាតិដែកដ៏អស្ចារ្យ ដែលរាងកាយអាចយកទៅប្រើប្រាស់បានយ៉ាងរហ័ស និងមានប្រសិទ្ធភាព។

ចំពោះអ្នកដែលនិយមរបបអាហារបែបបន្លែ ឬមិនសូវចូលចិត្តញ៉ាំសាច់ អ្នកអាចបំពេញជាតិដែកតាមរយៈ ធញ្ញជាតិ (អាល់ម៉ុន ល្ង សណ្តែកក្រហម សណ្តែកខ្មៅ) និងបន្លែបៃតងចាស់ ដូចជា ខាត់ណា ប្រូខូលី និងម្រុំ។ ទោះជាយ៉ាងណាក៏ដោយ ជាតិដែកពីបន្លែ ​គឺពិបាកស្រូបយកបន្តិច ដូច្នេះអ្នកចាំបាច់ត្រូវញ៉ាំវាទន្ទឹមនឹងផ្លែឈើដែលមាន វីតាមីន C ខ្ពស់ (ដូចជា ល្ហុង ក្រូច ឬក្រូចឆ្មារ) ដើម្បីជួយជំរុញការស្រូបយកជាតិដែកទៅក្នុងឈាមបានកាន់តែប្រសើរ។

បន្ថែមពីនេះ ការជ្រើសរើស អង្ករសំរូប ឬអង្ករខ្មៅ ជំនួសអង្ករស គឺជាជម្រើសដ៏ល្អ ព្រោះវាសម្បូរជាតិដែក និងអាស៊ីតហ្វូលិក។ បន្លែពណ៌ស្រស់ដូចជា ការ៉ុត ល្ពៅ និងប៉េងប៉ោះ ក៏មានជាតិដែកខ្លះដែរ ប៉ុន្តែគួរទទួលទានលាយជាមួយសាច់ទើបផ្ដល់ផលខ្ពស់។ កុំភ្លេចបន្ថែមគ្រឿងទេសដូចជា ខ្ទឹមស ម្ទេស និងរមៀត ក្នុងមុខម្ហូប ដើម្បីជួយឱ្យប្រព័ន្ធរបត់ឈាមដើរបានស្រួល និងការញ៉ាំ ទឹកប្រទាលកន្ទុយក្រពើ ដែលមានសមត្ថភាពជួយកម្ចាត់កាកសំណល់ក្នុងឈាម និងជំរុញការផលិតគ្រាប់ឈាមថ្មីៗឱ្យកាន់តែមានសុខភាពល្អ​៕