រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអំពាវនាវដល់ម្ចាស់ស្ថានីយប្រេងឥន្ធនៈ កុំឆ្លៀតឱកាសដំឡើងថ្លៃ ដែលនឹងធ្វើឱ្យប៉ះពាល់ដល់ប្រជាពលរដ្ឋអ្នកប្រើប្រាស់ បន្ទាប់ពីមានម្ចាស់អាជីវកម្ម…
រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអំពាវនាវដល់ម្ចាស់ស្ថានីយប្រេងឥន្ធនៈ កុំឆ្លៀតឱកាសដំឡើងថ្លៃ ដែលនឹងធ្វើឱ្យប៉ះពាល់ដល់ប្រជាពលរដ្ឋអ្នកប្រើប្រាស់ បន្ទាប់ពីមានម្ចាស់អាជីវកម្ម និងស្ថានីយប្រេងឥន្ធនៈមួយចំនួន បានឆ្លៀតឱកាសដំឡើងថ្លៃហួសហេតុ ដល់ទៅជាង៦ពាន់រៀល ក្នុង១លីត្រ ។
ប្រមុខដឹកនាំរាជរដ្ឋាភិបាល បានអំពាវនាវបែបនេះ នៅក្នុងពិធីបិទ “បិទសន្និបាតបូកសរុបលទ្ធផលការងារ ឆ្នាំ២០២៥ និងលើកទិសដៅការងារ ឆ្នាំ២០២៦ របស់អាជ្ញាធរជាតិប្រយុទ្ធប្រឆាំងគ្រឿងញៀន” រសៀលថ្ងៃទី០៦ ខែមីនា ឆ្នាំ២០២៦ នៅសណ្ឋាគារសុខាភ្នំពេញ ។
សម្តេចធិបតី នាយករដ្ឋមន្ត្រី ក៏បានប្រគល់ភារកិច្ចឱ្យក្រសួងពាណិជ្ជកម្ម ក្រសួងរ៉ែ និងថាមពល និងក្រសួងសេដ្ឋកិច្ច និងហិរញ្ញវត្ថុ តាមដានទិន្នន័យ និងការប្រែប្រួលអំពីបញ្ហានាំចូល ការផ្គត់ផ្គង់ និងតម្លៃប្រេង ។
សម្ដេចធិបតី ហ៊ុន ម៉ាណែត បញ្ជាក់ថា ៖ «រឿងបរិមាណ ការនាំចូលកម្រិតណា ? តើមានប្រទេសណា ដែលគ្រោងបិទការនាំចេញ ? ព្រោះស្ថានភាព បើយូរអង្វែងអាចមានការបិទការនាំចេញ ដែលនាំឱ្យមានការខ្វះប្រេង អ៊ីចឹងត្រូវតាមដានឱ្យជាប់ដាក់វិធានការឱ្យទាន់ពេលវេលា» ។
សូមជម្រាបថា នៅល្ងាចថ្ងៃទី៦ ខែមីនា ឆ្នាំ២០១៦នេះ ក្រសួងពាណិជ្ជកម្ម បានចេញសេចក្តីជូនដំណឹង ស្តីពីការគ្រប់គ្រងហានិភ័យ នៃការទិញ-លក់ ប្រេងឥន្ធនៈ និងសុវត្ថិភាពអ្នកប្រើប្រាស់ ក្រសួងពាណិជ្ជកម្ម សូមជម្រាបជូនដំណឹងដល់សាធារណជន ក្រុមហ៊ុនចែកចាយប្រេងឥន្ធនៈ និងម្ចាស់ស្ថានីយប្រេងឥន្ធនៈទាំងអស់នៅតាមបណ្តារាជធានី ខេត្ត មេត្តាជ្រាបថា ដើម្បីធានាបាននូវការគ្រប់គ្រង ហានិភ័យនៃការទិញ-លក់ និងសន្តិសុខ-សុវត្ថិភាពរបស់អ្នកប្រើប្រាស់ ដែលអាចកើតឡើងពីការស្តុកប្រេងឥន្ធនៈ ដោយមិនសមស្របតាមលក្ខណៈស្តង់ដាបច្ចេកទេស ហើយធានាបាន នូវនិរន្តរភាព នៃការផ្គត់ផ្គង់ប្រេងឥន្ធនៈនៅតាមស្ថានីយ ក្រសួងពាណិជ្ជកម្ម សូមអំពាវនាវដល់អ្នកប្រើប្រាស់ និងម្ចាស់ស្ថានីយលក់ប្រេងឥន្ធនៈទាំងអស់ ត្រូវអនុវត្តតាមលក្ខណៈស្តង់ដាបច្ចេកទេស នៃការលក់ ការស្តុកទុក និងការអនុវត្តល្អ ស្របតាមស្តង់ដា និងក្រមប្រតិបត្តិ ដែលស្ថានីយលក់ប្រេងឥន្ធនៈ ជាទូទៅបានអនុវត្ត និងគ្រប់គ្រងហានិភ័យល្អកន្លងមក ។
ជាមួយគ្នានេះ ក្រសួងពាណិជ្ជកម្ម សូមលើកទឹកចិត្តបងប្អូនប្រជាពលរដ្ឋទាំងអស់ មេត្តាចូលរួមអនុវត្ត និងយោគយល់ចំពោះស្ថានីយលក់ ប្រេងឥន្ធនៈ ដែលបានខិតខំប្រឹងប្រែងគ្រប់គ្រងហានិភ័យ និងចូលរួមសន្សំសំចៃ ក្នុងការប្រើប្រាស់ប្រេងឥន្ធនៈ ព្រមទាំងចៀសវាងការសម្រុកទិញប្រេងឥន្ធនៈស្តុកទុក លើសពីតម្រូវការចាំបាច់ ដែលអាចបង្កឱ្យមានហានិភ័យឆាបឆេះ និងប៉ះពាល់ដល់ទ្រព្យសម្បត្តិ និងការរស់នៅរបស់ប្រជាពលរដ្ឋនៅក្នុងមូលដ្ឋាន ។
មន្ត្រីជំនាញរបស់អគ្គនាយកដ្ឋានកិច្ចការពារអ្នកប្រើប្រាស់ និងការប្រកួតប្រជែង នៃក្រសួងពាណិជ្ជកម្ម និងមន្ទីរពាណិជ្ជកម្ម រួមទាំងមន្ទីររ៉ែ និងថាមពល រាជធានី ខេត្ត បាននឹងកំពុងបន្តចុះតាមដាន-ត្រួតពិនិត្យការលក់ ជាប្រចាំ ដើម្បីធានាការលក់ និងជំរុញឱ្យស្ថានីយប្រេងឥន្ធនៈអនុវត្តឱ្យបានគត់មត់ តាមលក្ខណៈស្តង់ដាបច្ចេកទេស និងបង្ការការឆ្លៀតឱកាសដំឡើងថ្លៃប្រេងឥន្ធនៈខុសប្រក្រតីជាដើម ។
សេចក្តីដូចបានជម្រាបជូនខាងលើ សូមសាធារណជន ក្រុមហ៊ុនចែកចាយ និងម្ចាស់ស្ថានីយប្រេងឥន្ធនៈទាំងអស់ ជ្រាបជាព័ត៌មាន និងត្រូវអនុវត្តប្រកបដោយស្មារតីទទួលខុសត្រូវខ្ពស់ ៕
ចែករំលែកព័តមាននេះ