សង្គ្រាមអ៉ីរ៉ង់ ៖ ប្រធានាធិបតីអាមេរិក លោកដូណាល់ត្រាំគូសបញ្ជាក់ កាលពីថ្ងៃទី៥ មីនា ថា លោកត្រូវចូលរួមក្នុងការជ្រើសរើសមេដឹកនាំកំពូលអ៉ីរ៉់ង់នាពេលខាងមុខ ពេលប្រទេសលោក និងអ៉ីស្រាអែលកំពុងវាយប្រហារប្រទេសនេះ…
សង្គ្រាមអ៉ីរ៉ង់ ៖ ប្រធានាធិបតីអាមេរិក លោកដូណាល់ត្រាំគូសបញ្ជាក់ កាលពីថ្ងៃទី៥ មីនា ថា លោកត្រូវចូលរួមក្នុងការជ្រើសរើសមេដឹកនាំកំពូលអ៉ីរ៉់ង់នាពេលខាងមុខ ពេលប្រទេសលោក និងអ៉ីស្រាអែលកំពុងវាយប្រហារប្រទេសនេះ ចូលដល់ថ្ងៃទី៧ហើយ ។ អ៉ីរ៉ង់ក៏បន្តវាយប្រហារតបតវិញប្រឆាំងអ៉ីស្រាអែល និងបណ្ដាមូលដ្ឋានយោធាអាមេរិក ព្រមទាំងបណ្ដាប្រទេសក្នុងតំបន់រហូតដល់ក្រៅតំបន់។
ថ្លែងទៅកាន់កាសែតអាមេរិក AXIOS លោកត្រាំបដិសេធការជ្រើសតាំងលោកម៉ូសតាបាខាមេនីអាយុ៥៦ឆ្នាំ សម្រាប់ជំនួសបិតាលោកដែលស្លាប់ក្នុងថ្ងៃដំបូងនៃការវាយប្រហាររបស់អាមេរិក និងអ៉ីស្រាអែលលើអ៉ីរ៉ង់។ ការលើកឡើងបែបនេះរបស់លោកត្រាំ នាំឲ្យមានការលើកពីបញ្ហាដែលចង់ដឹងថា តើអាមេរិក និងអ៉ីស្រាអែលចង់ផ្ដួលរំលំសាធារណរដ្ឋអ៊ិស្លាមអ៉ីរ៉ង់ ឬគ្រាន់តែផ្លាស់ប្ដូរនយោបាយរបស់ប្រទេសនេះ ។
ទន្ទឹមនឹងនេះ សង្គ្រាមកាន់តែបង្កើនពីមួយថ្ងៃទៅមួយថ្ងៃ ដែលប៉ះពាល់ដល់ប្រទេស១៤ទៀតនៅ
មជ្ឈឹមបូព៌ា និងហួសពីតំបន់នោះ។ អ៉ីរ៉ង់ថ្លែងថា អាមេរិកនឹងជួបប្រទះភាពល្វីងជូរចត់គួរឲ្យសោកស្ដាយ ដែលបានប្រើនាវាមុជទឹកបាញ់គ្រាប់បែកបុកកមេ្ទចនាវាពិឃាតអ៉ីរ៉ង់ ក្នុងដែនទឹកស្រីលង្កានៃមហាសមុទ្រឥណ្ឌា ។ រដ្ឋមន្ត្រីការបរទេសអ៉ីរ៉ង់លោកអាប់បាស់អារ៉ាសជី បានចោទប្រកាន់កងម៉ារីនអាមេរិកថា ប្រព្រឹត្តអំពើសាហាវព្រៃផ្សៃមួយក្នុងសមុទ្រ ដោយបាញ់ពន្លិចនាវាពិឃាតIRIS DENAក្នុងមហាសមុទ្រឥណ្ឌា បណ្ដាលឲ្យមនុស្សស្លាប់យ៉ា់ងតិច៨៧នាក់។ តាមបណ្ដាញសង្កមលោកសរសេរថា ចូរអ្នកចាំសម្ដីរបស់ខ្ញុំគឹថា សហរដ្ឋអាមេរិកនឹងស្ដាយក្រោយដ៏ជូរចត់ចំពោះអំពើរបស់ខ្លួន។
បណ្ដាប្រទេសក្នុងតំបន់ឈូងសមុទ្រ ក៏រាយការណ៍ដែរពីការវាយប្រហាររបស់អ៉ីរ៉ង់។ នៅក្រុងអាប៊ូដាប៊ីប្រទេសអេមីរ៉ាត់អារ៉ាប់រួម មនុស្ស៦នាក់រងរបួស ពេលដ្រូនមួយគ្រឿងត្រូវបាញ់ទម្លាក់នៅជិតមូលដ្ឋានអាកាសចរណ៍អាល់ដាហ្វ្រា ដែលទទួលកងទ័ពអាមេរិកហើយអំបែងគ្រាប់បែកបានធ្លាក់មកលើដី។ ប្រទេសកាតាវិញនាថ្ងៃទី៥ មីនា បានជម្លៀសប្រជាជនចេញ ពីជិតស្ថានទូតអាមេរិកប្រចាំក្រុងដូហា ដើម្បីជាការប្រុងប្រយ័ត្ន បន្ទាប់មករាយការណ៍ពីការវាយប្រហារដោយគ្រាប់រ់ុក្កែតមួយ។
អារ៉ាប៊ីសាអូឌីតបានកម្ទេចដ្រូនមួយ ក្នុងខេត្តជាប់ព្រំដែនជាមួយហ្ស៊កដានី។ ស្នូរស៊ីរ៉ែនបានលាន់ឮនារសៀលថ្ងៃទី៥ មីនា នៅបារ៉ែន ចំណែកក្រសួងការពារប្រទេសនោះថ្លែងថា កងទ័ពខ្លួនបានស្ទាក់កម្ទេចមីស៊ីលអ៉ីរ៉ង់៧៥គ្រាប់ និងដ្រូន១២៤គ្រឿងតាំងពីចាប់ផ្ដើមសង្គ្រាមមក ។ បារ៉ែនអះអាងថាមីស៊ីលអ៉ីរ៉ង់មួយគ្រាប់បានវាយប្រហាររោងចក្រចម្រាញ់ប្រេងកាតមួយ បណ្ដាលឲ្យមានភ្លើងឆាបឆេះកាលពីយប់ថ្ងៃទី៥ មីនា ហើយត្រូវបានពន្លត់ និងថារោងចក្រនោះនៅអាចដំណើរការនិងពុំមានជនរងគ្រោះឡើយ ។
នាវាដឹកប្រេង១គ្រឿងរងការវាយប្រហារ ក្នុងដែនទឹកគុយវ៉ែត កាលពីព្រឹកថ្ងៃទី៥មីនា ដែលពង្រីកថែមទៀតតំបន់នាវាចរណ៍ពាណិជ្ជកម្មដែលមានគ្រោះថ្នាក់។ ទោះយ៉ាងណានាវានោះមិនបានផ្ទុះឆេះឡើយ។ តាំងពីចាប់ផ្ដើមសង្គ្រាមមកបណ្ដានាវារងការវាយប្រហារក្នុងឈូងសមុទ្រអូម៉ង់ និងច្រកសមុទ្រORMUZ ជាផ្លូវដឹកប្រេងឆ្លងកាត់ប្រមាណជា១ភាគ៥នៃប្រេងពិភពលោក។ បែបនេះនាំឲ្យតម្លៃប្រេងហក់ឡើងខ្ពស់ ។
អ៉ីរ៉ង់វាយប្រហារលើអាហ្សែបៃហ្សង់
កាលពីថ្ងៃទី៥ មីនា អាហ្សែបៃហ្សង់បានចោទប្រកាន់អ៉ីរ៉ង់ថា វាយប្រហារដោយដ្រូនតែក្រុងតេហេរ៉ង់បានបដិសេធ ។ ប្រធានាធិបតីអាហ្សែបៃហ្សង់លោកអ៉ីលហាមអាលីយេវចោទអ៉ីរ៉ង់ថា ប្រព្រឹត្តអំពើវិបត្តិភ័យ និងឈ្លានពានគ្មានមូលដ្ឋានបន្ទាប់ពីដ្រូនមួយបានធ្លាក់នាថ្ងៃទី៥ មីនា នៅជិត
ព្រលានយន្តហោះNAKHITCHEVAN ជាតំបន់មួយស្តិតនៅជិតព្រំដែនអ៉ីរ៉ង់។ ដ្រូនមួយគ្រឿងទៀតបានធ្លាក់ជិតសាលារៀនមួយ។ អគ្គរដ្ឋអាជ្ញាអាហ្សែបៃហ្សង់រាយការណ៍ថា ជនស៊ីវិល៤នាក់ដែលធ្វើការនៅព្រលានយន្តបានរងរបួស។ ប្រធានាធិបតីអាហ្សែបៃហ្សង់អះអាងថាកងទ័ពលោកទទួលបទបញ្ជា ឲ្យរៀបចំនិងអនុវត្តវិធានការសងសឹកវិញ។
សេនាធិការដ្ឋានកងទ័ពអ៉ីរ៉ង់បានបដិសេធថា មិនបានបញ្ជូនដ្រូនទៅកាន់អាហ្សែបៃហ្សង់ឡើយ។ អ៉ីរ៉ង់ក៏បដិសេធច្រើនលើកដែរថា មិនបានរើសគោលដៅវាយប្រហារបណ្ដាហេដ្ឋារចនាសម្ព័ន្ធប្រេងនិងគោលដៅស៊ីវិលដទៃៗទៀតឡើយ ខណៈដែលដ្រូននិងមីស៊ីលវាយបប្រហារបណ្ដាទីតាំងទាំងនោះ ៕
ចែករំលែកព័តមាននេះ