សហរដ្ឋអាមេរិក ៖ សហរដ្ឋអាមេរិក និងប្រទេសអ៊ីស្រាអែលបានបើកការវាយប្រហាររួមគ្នាលើប្រទេសអ៊ីរ៉ង់ ចាប់តាំងពីថ្ងៃទី២៨ ខែកុម្ភៈ ឆ្នាំ២០២៦ ប៉ុន្តែទោះយ៉ាងណាក៏ដោយ រដ្ឋមន្ត្រីក្រសួងសង្គ្រាមអាមេរិក លោក…
សហរដ្ឋអាមេរិក ៖ សហរដ្ឋអាមេរិក និងប្រទេសអ៊ីស្រាអែលបានបើកការវាយប្រហាររួមគ្នាលើប្រទេសអ៊ីរ៉ង់ ចាប់តាំងពីថ្ងៃទី២៨ ខែកុម្ភៈ ឆ្នាំ២០២៦ ប៉ុន្តែទោះយ៉ាងណាក៏ដោយ រដ្ឋមន្ត្រីក្រសួងសង្គ្រាមអាមេរិក លោក Pete Hegseth នៅថ្ងៃទី៥ ខែមីនា ឆ្នាំ២០២៦ (ម៉ោងនៅសហរដ្ឋអាមេរិក) បានថ្លែងថា អ៊ីរ៉ង់កំពុងគិតខុស ប្រសិនបើពួកគេជឿថា សហរដ្ឋអាមេរិកមិនអាចទ្រទ្រង់សង្គ្រាមកំពុងបន្តនេះបាន ដោយលោកបន្ថែមថា ទីក្រុងវ៉ាស៊ីនតោនទើបតែចាប់ផ្តើមការប្រយុទ្ធ។
ថ្លែងចេញពីទីបញ្ជាការកណ្តាលសហរដ្ឋអាមេរិក (CENTCOM) ដែលកំពុងត្រួតពិនិត្យតំបន់មជ្ឈិមបូព៌ា ប្រធានមន្ទីរបញ្ចកោណ លោក Hegseth បានលើកឡើងថា សហរដ្ឋអាមេរិកកំពុងគ្រប់គ្រងពេលវេលានៃសកម្មភាពនៅក្នុងប្រទេសអ៊ីរ៉ង់ ហើយនឹងធ្វើដូច្នេះ រហូតទាល់តែវាត្រូវបានធានាថា សហរដ្ឋអាមេរិកសម្រេចបានគោលបំណងរបស់ខ្លួន។ លោកថ្លែងដូច្នេះថា «យើងកំណត់ល្បឿន យើងកំណត់ពេលវេលាដែលកំពុងដឹកនាំដោយមេបញ្ជាការដីគោក»។
ទន្ទឹមគ្នានោះ ជុំវិញការលើកឡើងអំពីស្តុកអាវុធរបស់សហរដ្ឋអាមេរិក លោក Hegseth បាននិយាយថា «គ្រាប់រំសេវរបស់យើងពេញស្តុកហើយ ហើយឆន្ទៈរបស់យើងគឺនៅតែរឹងមាំ»។ មិនតែប៉ុណ្ណោះ លោកបានប្រាប់បណ្តាអ្នកយកព័ត៌មានទៀតថា «យើងទើបតែចាប់ផ្តើមការប្រយុទ្ធ និងប្រយុទ្ធយ៉ាងម៉ឺងម៉ាត់។ អ៊ីរ៉ង់សង្ឃឹមថា យើងមិនអាចទ្រទ្រង់រឿងនេះបានទេ ដែលនេះជាការគណនាខុសដ៏អាក្រក់មួយ»។ លោកក៏បានបន្ថែមទៀងថា សង្គ្រាមអាចអូសបន្លាយដល់៨សប្តាហ៍ ដែលជាពេលវេលាយូរបំផុតដែលផ្តល់ដោយរដ្ឋបាលលោក ត្រាំ រហូតមកដល់ពេលនេះ។
នៅថ្ងៃជាមួយគ្នានោះដែរ យោធាអ៊ីស្រាអែលបានប្រកាសថា ខ្លួនបានចាប់ផ្តើមបើកការវាយប្រហារតាមអាកាសប្រឆាំងនឹងអ្វីដែលខ្លួនពិពណ៌នាថា ហេដ្ឋារចនាសម្ព័ន្ធដែលជាកម្មសិទ្ធិរបស់ក្រុមហេសបូឡា ភាគខាងត្បូងទីក្រុងបេរូត (Beirut) ខណៈដែលខ្លួនបានបង្កើនការវាយប្រហារលើក្រុមប្រដាប់អាវុធដែលគាំទ្រដោយអ៊ីរ៉ង់នៅទូទាំងប្រទេសលីបង់មួយនេះ៕ ប្រភព ៖ France24, BBC និង The Times of Israel
ចែករំលែកព័តមាននេះ